អគ្គលេខាធិការដ្ឋានប្រជាជន និងអភិវឌ្ឍន៍ នៃក្រសួងផែនការ បានសហការជាមួយមន្ទីរផែនការខេត្តសៀមរាប រៀបចំសិក្ខាសាលាពិគ្រោះយោបល់សម្រាប់ការរៀបចំផែនការសកម្មភាពថ្នាក់ក្រោមជាតិ ស្ដីពីកម្មវិធីសកម្មភាពនៃសន្និសីទអន្តរជាតិ ស្ដីពីប្រជាជន និងអភិវឌ្ឍន៍ នៅខេត្តសៀមរាប ដែលសិក្ខាសាលានេះមានរយៈពេល ២ថ្ងៃ ចាប់ពីថ្ងៃទី០៥-០៦ ខែវិច្ឆិកា ឆ្នាំ២០២៤ ក្រោមវត្តមានដឹកនាំដោយ ឯកឧត្តមបណ្ឌិត ប៊ូច ប៉ុណ្ណាក់ រដ្ឋលេខាធិការក្រសួងផែនការ ដោយមានការចូលរួមពីឯកឧត្តមសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរអង្គភាព និងអាជ្ញាធរក្រុងស្រុកជាច្រើនរូប។
លោក សុខ ថុល អភិបាលរងខេត្តសៀមរាប មានប្រសាសន៍ថា គ្រប់វិស័យក្នុងខេត្តសៀមរាប កំពុងមានការរីកចម្រើនជាបន្តបន្ទាប់ឥតឈប់ឈរ ក្នុងនោះកំណើននៃភ្ញៀវទេសចរចូលមកខេត្តសៀមរាប ក៏កំពុងមានការកើនឡើងវិញកាន់តែល្អប្រសើរឡើង បន្ទាប់ពីវិបត្តិសាកលនៃជំងឺកូវីដ-១៩ ត្រូវបានបិទបញ្ចប់។ តែទោះជាយ៉ាងណាក៏ការងារជំរុញកំណើនសេដ្ឋកិច្ចប្រជាជន នៅតែជាបញ្ហាប្រឈម ដែលទាមទារឱ្យគ្រប់អ្នកពាក់ព័ន្ធចូលរួមយកចិត្តទុកដាក់ជួយដោះស្រាយ ធ្វើយ៉ាងណាជួយដោះស្រាយបញ្ហានេះ ឱ្យបានជោគជ័យទាំងអស់គ្នា ស្របតាមគោលនយោបាយរបស់រាជរដ្ឋាភិបាលកម្ពុជា ដែលបានចំណូលមធ្យមកម្រិតខ្ពស់នៅឆ្នាំ២០២៣០។
មានប្រសាសន៍បើកសិក្ខាសាលា ឯកឧត្តមបណ្ឌិត ប៊ូច ប៉ុណ្ណាក់ រដ្ឋលេខាធិការក្រសួងផែនការ បានបញ្ជាក់ថា ការរៀបចំសិក្ខាសាលានាពេលនេះ គឺមានគោលបំណងផ្សព្វផ្សាយ និងបញ្ជ្រាបការយល់ដឹងអំពី ក្របខ័ណ្ឌយុទ្ធសាស្ត្រកម្ពុជា ឆ្នាំ២០២៤-២០៣០ ដើម្បីអនុវត្តកម្មវិធីសកម្មភាពនៃសន្និសីទអន្តរជាតិ ស្ដីពីប្រជាជន និងអភិវឌ្ឍន៍។ ជាពិសេសជាការជំរុញឱ្យមានការរៀបចំសកម្មភាពសមស្របនៅស្នាក់ក្រោមជាតិ និងសកម្មភាពពាក់ព័ន្ធ ដើម្បីចូលរួមអនុវត្តនូវក្របខ័ណ្ឌនេះ និងពង្រឹងគណៈកម្មាធិការប្រជាជន និងអភិវឌ្ឍន៍រាជធានីខេត្ត ក្នុងការតាមដាន និងការពន្លឿនការអនុវត្តកម្មវិធីសកម្មភាពនៃសន្និសីទអន្តរជាតិ ស្ដីពីប្រជាជន និងអភិវឌ្ឍន៍។
ឯកឧត្តមសង្ឃឹមថា ក្រោយចប់សិក្ខាសាលានេះ សិក្ខាកាមទាំងអស់នឹងទទួលបាននូវបទពិសោធបន្ថែមថ្មីៗ និងការពិភាក្សាគ្នាស្វែងរកមធ្យោបាយ ដើម្បីដាក់ចូលទៅក្នុងផែនការសកម្មភាពរបស់យើង ក្នុងគោលបំណងលើកកម្ពស់សុខមាលភាពប្រជាជន ផ្ដល់ឱកាសឱ្យមានការចូលរួមពីសំណាក់ស្ត្រី និងកុមារឱ្យបានពេញលេញ ក្នុងបុព្វហេតុតែមួយគត់ គឺស្វែងរកផលភាគលាភដែលយើងកំពុងមាន៕
អត្ថបទ និងរូបភាព៖ លោក អ៊ុន ណារាជ្យ
