នៅថ្ងៃទី០៥ ទី០៦ ខែវិច្ឆិកា ឆ្នាំ២០២៤ នៅសណ្ឋាគារអេមព្រីសអង្គរ ខេត្តសៀមរាប ឯកឧត្តម រឿន រិទ្ធីរ័ត្ន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានកិច្ចការរដ្ឋបាល និងហិរញ្ញវត្ថុ តំណាងដ៏ខ្ពង់ខ្ពស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ) ព្រមទាំងវត្តមានចូលរួមរបស់ ឯកឧត្តម លោកជំទាវ លោក លោកស្រី ថ្នាក់ដឹកនាំនៅតាមអង្គភាពចំណុះក្រសួង តំណាងអគ្គនាយកដ្ឋានថវិកានៃក្រសួងសេដ្ឋកិច្ច និងហិរញ្ញវត្ថុ មន្ត្រីជំនាញជាន់ខ្ពស់នៃអគ្គលេខាធិការដ្ឋានដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ តំណាងអង្គការនៃគូរនានាសរុបប្រមាណជា១០០នាក់។
ថ្លែងបើសិក្ខាសាលានៅរសៀលថ្ងៃទី០៥ ខែវិច្ឆិកានេះ ឯកឧត្តម រឿន រិទ្ធីរ័ត្ន មានប្រសាសន៍ថា៖ កម្មវិធីនេះ ត្រូវបានប្រកាសដាក់ឲ្យអនុវត្តជាផ្លូវការតាំងពីឆ្នាំ២០០៤ និងបានក្លាយជាកម្មវិធីអាទិភាពមួយក្នុងចំណោមកម្មវិធីកែទម្រង់អាទិភាពផ្សេងទៀតរបស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា ដែលជាកម្មវិធីផ្តោចសំខាន់លើការពង្រឹងប្រសិទ្ធភាព និងស័ក្តិសិទ្ធភាពនៃការគ្រប់គ្រងចំណូល និងចំណាយថវិការដ្ឋ ក្នុងនោះបែងចែកជា ៤ដំណាក់កាល រួមមាន ៖
– ដំណាក់កាលទី១ ផ្តោតលើ ការកសាងភាពជឿទុកចិត្តនៃថវិកា
– ដំណាក់កាលទី២ ផ្តោតលើ ការកសាងគណនេយ្យភាពហិរញ្ញវត្ថុ
– ដំណាក់កាលទី៣ ផ្តោតលើ ការផ្សារភ្ជាប់ថវិកាទៅនឹងគោលនយោបាយ
– ដំណាក់កាលទី៤ ផ្តោតលើ ការកសាងគណនេយ្យភាពសមិទ្ធកម្ម។
ឯកឧត្តមបន្តថា៖សៀវភៅគោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈនេះផ្តោតសំខាន់លើវដ្តនៃថវិកា រួមមាន៖ ១.ដំណាក់កាលរៀបចំ និងអនុម័តថវិកា ២.ដំណាក់កាលអនុវត្តថវិកា និង៣.ដំណាក់កាលត្រួតពិនិត្យ និងតាមដានវាយតម្លៃថវិកា។ គោលការណ៍នេះ ក៏ត្រូវបានដាក់បញ្ចូលនូវសមាសធាតុសំខាន់ៗនៃប្រព័ន្ធគ្រប់គ្រងហិរញ្ញវត្ថុសាធារណៈទាំងផ្នែកចំណូល-ចំណាយ កិច្ចលទ្ធកម្មសាធារណៈ ការគ្រប់គ្រងទ្រព្យសម្បត្តិរដ្ឋ ការអនុវត្តប្រព័ន្ធ FMIS ការពិនិត្យតាមដាននិងវាយតម្លៃថវិកា ការងារសវនកម្ម និងអធិការកិច្ចហិរញ្ញវត្ថុ ជាដើម៕
អត្ថបទ និងរូបភាព៖ យូ វង្ស
កែសម្រួល៖ ហាំ ម៉េងហួត
