នៅថ្ងៃទី៥ ខែវិច្ឆិកា ឆ្នាំ២០២៤ លោក ង៉ូវ សេងកាក់ អភិបាលរងខេត្តសៀមរប បានអញ្ជើញជាអធិបតីភាពក្នុងទិវាសហគ្រិនភាពកម្ពុជា ២០២៤ ក្រោមប្រធានបទ ទេសចរណ៍ប្រកបដោយនិរន្តភាព ក្នុងខេត្តសៀមរាប ដោយមានការចូលរួមពីលោក លោកស្រី មន្ទីរអង្គភាពក្នុងខេត្ត សមាគមសហគ្រិនវ័យក្មេងកម្ពុជា សមាគម និងក្លឹបទេសចរណ៍ អាជីវករ ប្រតិបត្តិករ សិស្សនិស្សិតជាច្រើននាក់ផងដែរ។
លោក លួន អានចំណេះ ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប លើកឡើងថា ទិវានេះមានគោលបំណង លើកស្ទួយគោលគំនិតសហគ្រិនភាពនៃយុវជន សហគ្រិនវ័យក្មេង ធុរជន ម្ចាស់សហគ្រាស និងភ្ជាប់ស្ថាប័នក្នុងប្រព័ន្ឋអេកូឡូស៊ីទាំងអស់ ដែលធ្វើការគាំទ្រដល់សហគ្រិនភាពនៅកម្ពុជា ឱ្យមានការរីកចម្រើនប្រកបដោយថាមវន្ត និងបរិយាបន្ន ក៏ដូចជាការស្វែងយល់ពីវិស័យទេសចរណ៍ក្នុងខេត្តសៀមរាប។ ទិវាសប្តាហ៍សហគ្រិនភាពសកល (GEW – Global Entrepreneurship Week) គឺជាការអបអរសាទរដ៏ធំបំផុត នៅលើពិភពលោកដល់អ្នកផ្តួចផ្តើមគំនិត និងអ្នកបង្កើតការងារថ្មី ដែលបានចាប់យកនូវគំនិតល្អៗ សម្រាប់ដឹកនាំឱ្យ មានការរីកចម្រើនលើវិស័យសេដ្ឋកិច្ច។
ព័ត៌មានជាតិ ថ្មីៗ
លោក ង៉ូវ សេងកាក់ អភិបាលរងខេត្តសៀមរាប មានប្រសាសន៍ក្នុងឱកាសនោះថា ការប្រារព្ធទិវាសហគ្រិនភាពកម្ពុជា២០២៤ ពិតជាមានសារៈសំខាន់ សម្រាប់ខេត្តសៀមរាបដែលជាខេត្តទេសចរណ៍ដ៏សំខាន់មួយរបស់កម្ពុជា ដោយបានបង្កើតឱ្យមានការជជែកពិភាក្សាគ្នារវាងអាជ្ញាធរពាក់ព័ន្ធ រួមជាមួយវិស័យឯកជន ស្វែងរកបញ្ហាប្រឈម និងដំណោះស្រាយសមស្របសម្រាប់វិស័យទេសចរណ៍។
លោកបន្តថាខេត្តសៀមរាប ការអភិវឌ្ឍ ការរៀបចំផែនការនីមួយៗភាគច្រើន មានការចូលរួមពីវិស័យឯកជនជាធាតុចូល ក្នុងការរិះរកវិធានការ និងយន្តការ ដើម្បីដោះស្រាយនូវបញ្ហាប្រឈមដែលបានកើតមានឡើង ធានានិរន្តភាពនៃវិស័យទេសចរណ៍នៅក្នុងខេត្ត ដែលបានរងផលប៉ះពាល់ដោយវិបត្តិនៃជំងឺកូវីដ១៩នាពេលកន្លងមក។ ក្នុងនោះ តាមទិន្ន័យបង្ហាញថា រយៈពេល១០ខែឆ្នាំ២០២៤នេះ ក្រៅពីភ្ញៀវទេសចរក្នុងស្រុកដែលមានចំនួនប្រមាណជាង១លាន៧សែននាក់ ក៏មានភ្ញៀវទេសចរអន្តរជាតិ ចំនួនប្រមាណជាង៧៧ម៉ឺននាក់ ដែលបានមកកម្សាន្តក្នុងខេត្តសៀមរាប។ តាមរយៈការព្យាករណ៍សម្រាប់រយៈពេលពីរខែខាងមុខនេះ គឺក្នុងខែវិច្ឆិកា និងខែធ្នូ ចំនួនភ្ញៀវទេសចរបរទេសអាចនឹងកើនឡើង។
លោកបញ្ជាក់ថា រាជរដ្ឋាភិបាលតាមរយៈក្រសួងស្ថាប័នពាក់ព័ន្ធ បានយកចិត្តទុកដាក់យ៉ាងខ្លាំង ធ្វើយ៉ាងណាឱ្យវិស័យទេសចរណ៍ខេត្តសៀមរាប បានងើបឡើងវិញ ដោយបានដាក់ចេញផែនការ យុទ្ធសាស្ត្រ និងសកម្មភាពជាបន្តបន្ទាប់។ ក្នុងនោះផែនការជាគន្លឹះ សម្រាប់ឆ្នាំ២០២៥ខាងមុខ រាជរដ្ឋាភិបាលមានផែនការទាក់ទាញទេសចរក្នុងស្រុក ទេសចរបរទេស និងជនជាតិបរទេសដែលកំពុងស្នាក់នៅ និងបំពេញការងារនៅកម្ពុជា ចូលមកកម្សាន្តខេត្តសៀមរាបកាន់តែច្រើន។ ដូច្នេះដើម្បីឱ្យយន្តការទាំងនេះ សម្រេចទៅបានដោយជោគជ័យ មិនអាចខ្វះបានពីការចូលរួមពីបងប្អូនប្រតិបត្តិទេសចរណ៍ទាំងអស់ ក្នុងការផ្តល់នូវសេវាកម្មប្រកបដោយគុណភាព និងការបញ្ចុះតម្លៃសេវាកម្ម ក្នុងរដូវកាលណាមួយ ដើម្បីទាក់ទាញទេសចរចូលមកកម្សាន្តឲ្យច្រើនផងដែរ៕
អត្ថបទ និងរូបភាព៖ ធន់ ពូថេ
កែសម្រួល៖ ហាំ ម៉េងហួត
