កាលពីរសៀលថ្ងៃទី០៦ ខែវិច្ឆិកា ឆ្នាំ២០២៤នេះ គណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានរៀបចំកម្មវិធីផ្សព្វផ្សាយទិវាជាតិគ្រប់គ្រងគ្រោះមហន្ដរាយ ១៣តុលា ២០២៤ និងផ្សព្វផ្សាយដាក់ឱ្យប្រើប្រាស់ជាផ្លូវការនូវសៀវភៅផែនការការត្រៀមបម្រុងសម្រាប់ឆ្លើយតបសង្គ្រោះបន្ទាន់គ្រោះមហន្ដរាយទឹកជំនន់ និងគ្រោះរាំងស្ងួត ឆ្នាំ២០២៤ ថ្នាក់ខេត្ដ ក្រុងស្រុក និងសង្កាត់ ដឹកនាំដោយ លោក អុឹង គឹមលាង អភិបាលរងខេត្ដ ដោយមានការចូលរួមពីអ្នកពាក់ព័ន្ធជាច្រើនរូប។
បើតាមរបាយការណ៍គណៈកម្មាធិការគ្រប់គ្រងគ្រោះមហន្តរាយខេត្តសៀមរាប អានដោយលោក ចឹក គឹមជុន នាយករងរដ្ឋបាលខេត្ដ បានឱ្យដឹងថា រយៈពេល៩ខែ គិតចាប់ពីថ្ងៃទី០១ ខែមករា ដល់ថ្ងៃទី២៥ ខែកញ្ញា ឆ្នាំ២០២៤ ខេត្តសៀមរាប មានគ្រោះមហន្តរាយកើតឡើងមួយចំនួនដូចជា៖ គ្រោះរាំងស្ងួត ជំនន់ទឹកភ្លៀង ខ្យល់កន្ត្រាក់ អគ្គិភ័យ រន្ទះបាញ់ សត្វល្អិតបំផ្លាញដំណាំ ករណីលង់ទឹក ដែលប៉ះពាល់ទូទាំងក្រុងស្រុកទាំង១៣ នៃខេត្តសៀមរាប។ ក្នុងនោះករណីខ្យល់កន្ត្រាក់ កើតឡើង៤៨ករណី បណ្តាលឱ្យប៉ះពាល់ឃុំសង្កាត់ចំនួន៣៣ មានគ្រួសាររងគ្រោះចំនួន៤៨៤គ្រួសារ បណ្តាលឱ្យខូចខាតផ្ទះ៥៨ខ្នង, ប៉ះពាល់ផ្ទះ៤១៤ខ្នង, សាលារៀន២ខ្នង និងប៉ះពាល់តូបលក់ដូរប្រជាពលរដ្ឋចំនួន១១តូប។
របាយការណ៍ដដែលបន្តថា ចំពោះករណីអគ្គិភ័យ កើតឡើង៣៩ករណី មានគ្រួសាររងគ្រោះចំនួន៣៩គ្រួសារ បណ្តាលឱ្យខូចខាតផ្ទះ៣០ខ្នង ប៉ះពាល់ផ្ទះ២ខ្នង, រោងសិប្បកម្ម១, ឆេះព្រៃ១៣៤ហិកតា និងរបួសមនុស្ស៥នាក់។ ចំពោះករណីរន្ទះបាញ់ កើតឡើង១៣ករណី និងករណីលង់ទឹកកើតឡើង១៧ករណី បណ្តាលឱ្យស្លាប់មនុស្ស១៨នាក់ ក្នុងនោះកុមារ១៣នាក់។ ហើយក្នុងរយៈពេល៩ខែដូចគ្នានេះ បានជួបគ្រោះរាំងស្ងួតចំនួន៣លើក ប៉ះពាល់ដំណាំស្រូវសរុប ២.១០១ហិកតា។ ដោយឡែកជំនន់ទឹកភ្លៀង និងជំនន់ទឹកបឹងទន្លេសាប ក៏បានរងផលប៉ះពាល់ដំណាំស្រូវជាច្រើនហិកតា ខូតខាតហេដ្ឋារចនាសម្ព័ន្ធផ្លូវថ្នល់ និងប៉ះពាល់ដល់ការរស់នៅប្រជាពលរដ្ឋជាច្រើនភូមិផងដែរ។
មានប្រសាសន៍ក្នុងឱកាសនោះ លោក អុឹង គឹមលាង អភិបាលរងខេត្ដ បានកោតសរសើរដល់គណៈកម្មាធិការគ្រប់គ្រងគ្រោះមហន្ដរាយខេត្ត ដែលបានយកចិត្ដទុកដាក់ក្នុងអនុវត្ដការងារកន្លងមកបានល្អប្រសើរ។ លោកថានៅឆ្នាំ២០២៤នេះ គ្រោះមហន្ដរាយដែលកើតឡើងពីគ្រោះធម្មជាតិ មានការថយចុះជាងឆ្នាំ២០២៣ ប៉ុន្ដែគ្រោះទឹកជំនន់ខ្លះបណ្ដាលមកពីការបើកទ្វារទឹកខ្វះបច្ចេកទេសនៅពេលទឹកឡើងខ្លាំងនៅទំនប់ម្កាក់ស្រុកជីក្រែង ដែលធ្វើឱ្យជនលិចស្រូវប្រជាពលរដ្ឋនៅតំបន់ខាងក្រោម។
លោកអភិបាលរងខេត្ត ក៏បានណែនាំដល់អាជ្ញាធរក្រុងស្រុក ឃុំសង្កាត់ នៅរដូវវស្សានេះត្រូវយកចិត្ដទុកដាក់ពីប្រព័ន្ធធារាសាស្ដ្រឱ្យបានហ្មត់ចត់ ដើម្បីកុំឱ្យស្ទះលូបង្ហូរទឹក ដែលធ្វើឱ្យលិចលង់ផ្ទះប្រជាពលរដ្ឋ ក៏ដូចជាដំណាំកសិកម្មរបស់ពួកគាត់។ ហើយនៅឆ្នាំ២០២៥ខាងមុខនេះ ក្រសួងធនធានទឹក មានគម្រោងជីកព្រែកមួយខ្សែ តភ្ជាប់ពីទន្លេល្ពៅ នៃខេត្ដព្រះវិហារ ដោយឆ្លងកាត់ខេត្ដឧត្ដរមានជ័យ ខេត្ដសៀមរាប និងតភ្ជាប់ទៅខេត្ដកំពង់ធំ ឆ្ពោះទៅបឹងទន្លេសាប ដែលគម្រោងសាងសង់នេះអាចមានរយៈពេលពីរ ទៅបីឆ្នាំ ហើយក្រោយពីសាងសង់រួចរាល់ហើយ សេដ្ឋកិច្ចខេត្ដសៀមរាប នឹងប្រសើរឡើង និងមានគម្រោងជាច្រើនទៀតពាក់ព័ន្ធធនធានទឹក នឹងត្រូវសាងសង់នៅក្នុងខេត្ដសៀមរាប៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
