នៅព្រឹកថ្ងៃទី០៧ ខែវិច្ឆិកា ឆ្នាំ២០២៤នេះ ក្រសួងព័ត៌មានបានរៀបចំសិក្ខាសាលាស្តីពីការលើកកម្ពស់ការយល់ដឹងពីរបបអាហារមានសុខភាពល្អ និងការកាត់បន្ថយជាតិអំបិលតាមរយៈប្រព័ន្ធផ្សព្វផ្សាយ នៅខេត្តសៀមរាប ក្រោមអធិបតីភាព ឯកឧត្តម ឈាន លាង រដ្ឋលេខាធិការក្រសួងព័ត៌មាន ដោយមានការចូលរួមពីប្រតិភូអមដំណើរ តំណាង WHO ប្រធាន អនុប្រធានមន្ទីរព័ត៌មាន១៦រាជធានីខេត្ត រួមនឹងមន្ត្រីពាក់ព័ន្ធជាច្រើនរូប។
ឯកឧត្តម ប៉ាង ណាត អនុរដ្ឋលេខាធិការក្រសួងព័ត៌មាន មានប្រសាសន៍ដែរថា តួនាទីប្រព័ន្ធផ្សព្វផ្សាយ ដើម្បីលើកកម្ពស់របបអាហារដែលមានសុខភាពល្អ និងការកាត់បន្ថយអំបិលនេះ គឺបានដើរតួនាទីយ៉ាងសំខាន់ ក្នុងការលើកកម្ពស់ទម្លាប់នៃការទទួលទានអាហារដែលមានសុខភាពល្អ និងលើកកម្ពស់ការយល់ដឹង អំពីសារៈសំខាន់នៃការកាត់បន្ថយការទទួលទានអំបិល។ តាមរយៈការផ្សព្វផ្សាយតាមទូរទស្សន៍ វិទ្យុ និងបណ្តាញសង្គម យុទ្ធនាការសុខភាពសាធារណៈ គឺពិតជាបានផ្តល់នូវការអប់រំទស្សនិកជនយ៉ាងទូលំទូលាយនិងប្រកបដោយប្រសិទ្ធភាពផងដែរ។
ព័ត៌មានជាតិ ថ្មីៗ
លោកវេជ្ជបណ្ឌិត ឃឹម សំអាត មន្ត្រីបច្ចេកទេសទទួលបន្ទុកជំងឺមិនឆ្លង និងការការលើកកម្ពស់សុខភាពរបស់អង្គការសុខភាពពិភពលោកប្រចាំកម្ពុជា (WHO) បានបង្ហាញថា បច្ចុប្បន្ននេះជំងឺមិនឆ្លងនៅកម្ពុជាកំពុងកើតមានយ៉ាងគួរឱ្យកត់សម្គាល់ ដែលជំងឺនេះបានសម្លាប់ប្រជាជនជាច្រើននាក់ជារៀងរាល់ឆ្នាំ។ ចំពោះអ្នកកើតជំងឺមិនឆ្លងដែលបានស្លាប់ ក្នុងនោះមានការកើតជំងឺសរសៃឈាមបេះដូង ជំងឺមហារីក ជំងឺផ្លូវដង្ហើមរ៉ាំរ៉ៃ និងជំងឺទឹកនោមផ្អែម។ កត្តានេះហើយ ទើប WHO បានការសហការជាមួយអង្គភាព ក្រសួង ស្ថាប័ននានានៅក្នុងការផ្សព្វផ្សាយពីការថែរក្សាសុខភាពដោយការលើកកម្ពស់របបអាហារនេះ តាមរយៈការកាត់បន្ថយជាតិអំបិល ជាតិខ្លាញ់ និងជាតិស្ករ ហើយនិងការធ្វើលំហាត់ប្រាណដែលជួយឱ្យយើងមានសុខភាពល្អ។
ឯកឧត្តម ឈាន លាង មានប្រសាសន៍ថា សិក្ខាសាលានេះពិតជាមានសារៈសំខាន់ណាស់សម្រាប់សិក្ខាកាមដែលជាពិធីករ ពិធីការិនី ឬអ្នកយកព័ត៌មាន អ្នកផលិតកម្មវិធីវិទ្យុ និងទូរទស្សន៍ ក្នុងការចូលរួមចំណែកផលិត និងផ្សព្វផ្សាយព័ត៌មានផ្សាយប្រកបដោយគុណភាព តាមរយៈប្រព័ន្ធផ្សព្វផ្សាយរបស់ខ្លួនជូនដល់ប្រជាពលរដ្ឋ ដើម្បីចូលរួមចំណែកក្នុងការទប់ស្កាត់ និងកាត់បន្ថយជំងឺមិនឆ្លង ដែលកំពុងបន្តកើតមានក្នុងប្រទេសកម្ពុជា និងបណ្តាប្រទេសដទៃទៀត។
ឯកឧត្តមរដ្ឋលេខាធិការ ក៏បានជំរុញដល់អ្នកផលិតកម្មវិធីផ្សព្វផ្សាយនានា និងប្រព័ន្ធផ្សព្វផ្សាយទាំងអស់ទាំងវិស័យរដ្ឋ ឬវិស័យឯកជន បង្កើនការសហការគ្នានៅក្នុងការរៀបចំផលិតជាមាតិការវីដេអូ ឬស្ពតអប់រំនានាពាក់ព័ន្ធនឹងការលើកកម្ពស់ការយល់ដឹងពីរបបអាហារមានសុខភាពល្អ និងការកាត់បន្ថយជាតិអំបិល ដើម្បីបញ្ជ្រាបបន្ថែមដល់សាធារណៈទូទៅឱ្យបានយល់កាន់តែច្បាស់អំពីបញ្ហាសុខភាពនេះប្រកបដោយគុណភាពខ្ពស់៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
