នៅព្រឹកថ្ងៃទី១១ ខែវិច្ឆិកា ឆ្នាំ២០២៤នេះ ក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលខេត្តសៀមរាប បានសហការជាមួយសាកលវិទ្យាល័យ Charles Sturt នៃប្រទេសអូស្ត្រាលី និងគម្រោងបច្ចេកវិទ្យាជលផលនៅតំបន់អាស៊ីអាគ្នេយ៍ បើកវគ្គបណ្តុះបណ្តាលស្តីពីពង្រឹងសមភាពយេនឌ័រពិការភាព និងបរិយាប័ន្នសង្គម បច្ចេកទេសរចនាប្លង់សាងសង់ជណ្តើរត្រីសម្រាប់ជំនាញការយុវជននៅកម្ពុជា ក្រោមអធិបតីភាព ឯកឧត្តម ឃុន សាវឿន រដ្ឋលេខាធិការក្រសួងកសិកម្ម ដោយមានការចូលរួមពី លោក អុឹង គឹមលាង អភិបាលរងខេត្តសៀមរាប រួមនឹងវត្តមានតំណាងក្រសួងស្ថាប័នពាក់ព័ន្ធមួយចំនួនទៀត។
លោក អុឹង គឹមលាង មានប្រសាសន៍ថា ទន្លេមេគង្គ គឺជាជម្រករបស់ត្រីជាច្រើន ដែលមិនបានឃើញពីកន្លែងណាផ្សេងទៀតក្នុងពិភពលោក ដែលមានត្រីទឹកសាបជាង ១.០០០ប្រភេទ។ ចំពោះការសាងសង់ជណ្តើរត្រីដែលបានរចនាយ៉ាងសមស្រប និងបច្ចេកវិទ្យាឆ្លងកាត់ត្រីផ្សេងទៀត អាចជួយសម្រួលដល់ការអភិវឌ្ឍធនធានទឹកប្រកបដោយនិរន្តរភាព ដោយការសាងសង់ជណ្តើរត្រី សម្រាប់ត្រីធ្វើការបន្លាស់ទី។ បច្ចុប្បន្នប្រទេសជាច្រើនជុំវិញពិភពលោក បានចាប់ផ្តើមដាក់បញ្ចូលបច្ចេកវិទ្យាជណ្តើរត្រីជាមួយទំនប់ធារាសាស្ត្រ ហើយបានបង្ហាញថា វាអាចទៅរួចក្នុងការផលិតអាហារ ទឹក និងថាមពលដោយមិនប៉ះពាល់ដល់ជលផល។
ឯកឧត្តម ឃុន សាវឿន មានប្រសាសន៍ថា ផ្អែកតាមយុទ្ធសាស្ត្ររបស់រាជរដ្ឋាភិបាលកម្ពុជា មានចក្ខុវិស័យកសិកម្មវែងឆ្ងាយចំនួន៤ គឺកសិករមានហូប មានប្រើ មានបាន និងមានរហូត។ ក្នុងន័យនេះធនធានជលផល ជាពិសេសត្រីពិតជាមានសារៈសំខាន់ណាស់សម្រាប់ទ្រទ្រង់ជីវភាពប្រចាំថ្ងៃរបស់ប្រជាជនដែលប្រកបរបរចិញ្ចឹមជីវិត និងអាស្រ័យដោយការនេសាទសម្រាប់ចំណូលគ្រួសារ។ ជាមួយនេះក្រសួងកសិកម្ម បានសាងសង់ជណ្តើរត្រីបង្ហាញ និងដាក់ឱ្យប្រើជាផ្លូវការជណ្តើរត្រីបង្ហាញនៅតាមបណ្តាខេត្តមួយចំនួន ដែលជាជំនួយរបស់ AustralianAid មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ។ ជណ្តើរត្រីមានសក្តានុពលក្នុងការធានានូវប្រសិទ្ធភាពបម្លាស់ទីរបស់ត្រីក្នុងអាងទឹកធម្មជាតិជាពិសេសជួយ បង្កើនផលិតភាពធនធានជលផល និងជួយគាំទ្រការអភិរក្សត្រីធម្មជាតិរបស់ប្រទេសកម្ពុជា។ គុណប្រយោជន៍នៃជណ្តើរត្រីត្រូវបានទទួលស្គាល់ដោយរាជរដ្ឋាភិបាលកម្ពុជា ក្នុងបរិបទនៃការងារគ្រប់គ្រង់ និងធានាបាននិរន្តរភាពនៃការគ្រប់គ្រងធនធានជលផល។
ឯកឧត្តមមានប្រសាសន៍បន្តថា វគ្គបណ្តុះបណ្តាលដែលបានរៀបចំឡើងនាពេលនេះ មានរយៈពេល៣ថ្ងៃ ចាប់ពីថ្ងៃទី១១-១៣ ខែវិច្ឆិកា ហើយវាពិតជាមានសារៈសំខាន់ណាស់ក្នុងការចូលរួមចំណែកគ្រប់គ្រងធនធានជលផល ប្រកបដោយប្រសិទ្ធភាព និងវិវត្តភាព សំដៅបង្កើនប្រាក់ចំណូលប្រជាជន និងធានានូវសន្តិសុខស្បៀង ដូច្នេះ ខ្ញុំស្នើសុំឱ្យអ្នកចូលរួមទាំងអស់យកចិត្តទុកដាក់ស្លាប់ការធ្វើបទបង្ហាញ និងទទួលការចែករំលែកបទពិសោធពីអ្នកជំនាញ ដើម្បីយល់ដឹងកាន់តែច្បាស់យកទៅអនុវត្ត។ ដូច្នេះស្នើសុំដល់គ្រប់អ្នកពាក់ព័ន្ធ បន្តផ្តល់ការគាំទ្របច្ចេកទេស និងសហប្រតិបត្តិការ ដើម្បីជួយកសាងជណ្តើរត្រីបង្ហាញនៅកម្ពុជា និងបណ្តុះបណ្តាលមន្ត្រីជំនាញជាបន្តបន្ទាប់ ដើម្បីចូលរួមថែរក្សា និងបង្កើនផលធម្មជាតិនៅកម្ពុជាបន្ថែមទៀត៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
