កិច្ចប្រជុំកំពូលសៀមរាប-អង្គរ ស្ដីពីពិភពលោកមួយគ្មានមីននៃអនុសញ្ញាអូតាវ៉ា ក្នុងទឹកដីខេត្តសៀមរាប ដែលនឹងធ្វើឡើងពីថ្ងៃទី២៣ ដល់ថ្ងៃទី២៩ ខែវិច្ឆិកា ឆ្នាំ២០២៤ខាងមុខនេះ ជាឱកាសដែលកម្ពុជាបង្ហាញពិភពលោកថា កម្ពុជាកំពុងមានសន្តិភាព មានស្ថិរភាពពេញលេញ។
ក្នុងឱកាសអញ្ជើញពិនិត្យមើលទីតាំងសម្រាប់ត្រៀមទទួលគណៈប្រតិភូមកពីបណ្តាប្រទេសនានាលើពិភពលោក ដែលមកចូលរួមកិច្ចប្រជុំកំពូលសៀមរាប-អង្គរ ស្ដីពីពិភពលោកមួយគ្មានមីននៃអនុសញ្ញាអូតាវ៉ា នារសៀលថ្ងៃទី១១ ខែវិច្ឆិកា ឆ្នាំ២០២៤នេះ ទេសរដ្ឋមន្រ្តី និងជាអនុប្រធានទី១ អាជ្ញាធរមីន ឯកឧត្តម លី ធុច បានបញ្ជាក់ថា កិច្ចប្រជុំនេះជាព្រឹត្តិការណ៍ប្រវត្តិសាស្ត្រថ្មីមួយទៀតសម្រាប់ប្រទេសកម្ពុជា ហើយប្រជាជនកម្ពុជា នឹងទទួលបាននូវអត្ថប្រយោជន៍យ៉ាងច្រើនពីដំណើរទស្សនកិច្ចរបស់គណៈប្រតិភូនានាជុំវិញពិភពលោក ជាពិសេសអ្នកខេត្តសៀមរាប និងអ្នករកស៊ីផ្នែកវិស័យសេវាកម្មទេសចរណ៍។
ឯកឧត្តម លី ធុច មានប្រសាសន៍បន្តថា ទឹកដីខេត្តសៀមរាប ជាទឹកដីមួយដែលញាំញីដោយសារសង្គ្រាម ហើយវាបានបន្សល់នូវគ្រាប់មីន និងយុទ្ធភណ្ឌមិនទាន់ផ្ទុះជាច្រើន។ ប៉ុន្តែពេលនេះកម្ពុជា ជាពិសេសខេត្តសៀមរាប អាចទទួលនូវភ្ញៀវជាតិ អន្តរជាតិមកពីគ្រប់ជាតិសាសន៍មកកម្សាន្ត មកបំពេញភារកិច្ចនានា បានយ៉ាងមានសេចក្តីសុខ ដែលនេះបង្ហាញឱ្យឃើញថា កម្ពុជាកំពុងមានសន្តិភាព មានស្ថិរភាពដ៏ពេញលេញ។ ឯកឧត្តមថា រហូតមកដល់ពេលនេះ មានប្រទេសប្រមាណជិត១០០ប្រទេស បានចុះឈ្មោះមកចូលរួមប្រជុំកំពូលនេះ។ ជាមួយគ្នានេះ ក៏នៅមានអង្គទូត និងបណ្តាអង្គការនានាមួយចំនួនទៀតក៏នឹងមកចូលរួមផងដែរ ដែលការណ៍នេះជាគោលបំណងរបស់អ្នកទាំងអស់គ្នាក្នុងគោលបំណងធ្វើយ៉ាងណាធ្វើឱ្យពិភពលោកគ្មានមីនប្រឆាំងមនុស្ស។
សូមជម្រាបថា កិច្ចប្រជុំកំពូលសៀមរាប-អង្គរ ស្ដីពីពិភពលោកមួយគ្មានមីននៃអនុសញ្ញាអូតាវ៉ា លើកទី៥នេះ ធ្វើឡើងដើម្បីពិនិត្យឡើងវិញនូវវឌ្ឍនភាពនៃការអនុវត្តផែនការសកម្មភាពទីក្រុងអូស្លូ ឆ្នាំ២០១៩-២០២៤ និងកំណត់វិធានការសកម្មភាពសំខាន់ៗសម្រាប់ការរៀបចំសេចក្តីថ្លែងការណ៍ និងផែនការសកម្មភាពរយៈពេល ៥ឆ្នាំខាងមុខ។ សេចក្តីថ្លែងការណ៍ និងផែនការសកម្មភាពនេះ នឹងត្រូវហៅថា “សេចក្តីថ្លែងការណ៍សៀមរាប-អង្គរ” និងផែនការសកម្មភាពសៀមរាប-អង្គរ ដែលនឹងចារឹកក្នុងប្រវត្តិសាស្ត្ររបស់អង្គការសហប្រជាជាតិ និងពិភពលោក ដែលឯកសារទាំងនេះគឺជាឯកសារតម្រង់ទិសសកម្មភាពមីនសម្រាប់ពិភពលោកទាំងមូល៕
អត្ថបទ និងរូបថត៖ លោក ជា ស្រស់
កែសម្រួល៖ លោក អ៊ុន ណារាជ្យ
