ថ្នាក់ដឹកនាំ និងក្រុមមន្ត្រីនៃបណ្តាខេត្តក្រុងសម្ព័ន្ធមេត្រីភាពរបស់កម្ពុជា-ចិន បានជួបប្រជុំគ្នានៅក្នុងខេត្តសៀមរាប ដើម្បីពិភាក្សាចែករំលែកបទពិសោធពីការអភិវឌ្ឍ និងការធ្វើឱ្យកាន់តែប្រសើរឡើង ជាពិសេសលើវិស័យទេសចរណ៍។
ឯកឧត្តម ប្រាក់ សោភ័ណ អភិបាលខេត្តសៀមរាប បានបង្ហាញថា ខេត្តសៀមរាប បានបង្កើតនូវចំណងសម្ព័ន្ធមេត្រីភាពជាមួយខេត្តក្រុង នៃប្រទេសចិន ចំនួន៣០ខេត្តក្រុង។ ផ្លែផ្កាដែលកើតចេញពីភាពបងប្អូនជាខេត្តក្រុងមេត្រីភាពនេះ បានរួមចំណែកជួយអភិវឌ្ឍខេត្តសៀមរាប ទទួលបាននូវសមិទ្ធផលជាច្រើនគួរឱ្យកត់សម្គាល់លើវិស័យទេសចរណ៍ អប់រំ កសិកម្ម ពាណិជ្ជកម្ម សុខាភិបាល វប្បធម៌ និងវិនិយោគ។ ជាពិសេសសមិទ្ធផលថ្មីដ៏សំខាន់ គឺអាកាសយានដ្ឋានអន្តរជាតិសៀមរាប-អង្គរ ដែលបម្រើវិស័យទេសចរណ៍ដ៏មានសក្តានុពល និងខឿនសេដ្ឋកិច្ចជាតិ ក៏ដូចជាសេដ្ឋកិច្ចប្រជាពលរដ្ឋក្នុងខេត្តសៀមរាបផងដែរ។ ក្រោយវិបត្តិកូវីដ-១៩ រយៈពេល១០ខែ ក្នុងឆ្នាំ២០២៤នេះ ខេត្តសៀមរាបទទួលបានភ្ញៀវ ២.៤៩៥.៣៥៣នាក់ ក្នុងនោះទេសចរចិនមានចំនួន ៥៩.៤៩៨នាក់។
ឯកឧត្តម វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា មានប្រសាសន៍ថា វិស័យទេសចរណ៍ជាកម្លាំងចលករជំរុញវិស័យសេដ្ឋកិច្ច ហើយប្រទេសចិន គឺបានយកចិត្តទុកដាក់ជាខ្លាំងក្នុងការអភិវឌ្ឍវិស័យទេសចរណ៍នេះ។ ហើយស្ថានទូតសាធារណរដ្ឋប្រជាមានិតចិនប្រចាំកម្ពុជា បានយកការងារអភិវឌ្ឍវិស័យទេសចរណ៍នេះជាការងារចម្បង។ ក្នុងនោះស្ថានទូតចិនបានធ្វើការងារជាច្រើន ជាមួយសម្ព័ន្ធទេសចរចិន ជាមួយក្រសួងទេសចរណ៍កម្ពុជា ដោយមានការរៀបចំសន្និសីទលើកទី១ ស្តីពីយន្តការនៃការផ្លាស់ប្តូរកិច្ចសហប្រតិបត្តិការទេសចរកម្ពុជា-ចិន ដោយទទួលបានផលល្អ។ ជាក់ស្តែងថ្ងៃនេះ ក៏មានការជួបគ្នារវាងខេត្តក្រុងមេត្រីភាពកម្ពុជា-ចិន ហើយក៏ឃើញថា មានក្រុមហ៊ុនអាកាសចរណ៍មួយចំនួនបានចូលរួម។ ជាមួយគ្នានេះយើងក៏មានគម្រោងបង្កើតជើងហោះហើរថ្មី ពីស៊ីអានហាពិន មកទីក្រុងភ្នំពេញ ដែលការងារនេះ នឹងជួយបង្កើនការហោះហើរពីប្រទេសចិនមកកម្ពុជាបានកាន់តែច្រើន។
ឯកឧត្តមឯកអគ្គរដ្ឋទូតបន្តថា យើងបានធ្វើការជំរុញកិច្ចសហប្រតិបត្តិការទេសចរនៅតាមមូលដ្ឋាន ដែលនៅក្នុងសន្និសីទខេត្តក្រុង មេត្រីភាពកម្ពុជា-ចិន ឆ្នាំ២០២៤នេះ ក៏ឃើញមានការចូលរួមពីសំណាក់តំណាងខេត្តក្រុងនៃប្រទេសចិនចំនួន៨ ហើយខេត្តក្រុងនៃប្រទេសកម្ពុជាចំនួន២៥ ដោយមានការពិភាក្សាគ្នា ហើយក៏មានការព្រមព្រៀងគ្នាជាច្រើនផងដែរ។ ជាមួយគ្នានេះ ខេត្តយូណានបានកំពុងជំរុញកិច្ចសហប្រតិបត្តិការលើវិស័យទេចរណ៍ជាមួយកម្ពុជា ដោយគ្រោងរៀបចំដំណើរកម្សាន្តយូណានទៅទស្សនានៅអង្គរឱ្យទៅជាគម្រោងទេសចរដែលប្រណិត ហើយខេត្តហើណាន ក៏កំពុងសហការជាមួយកម្ពុជាផងដែរ។ ដែលយើងសង្ឃឹមថា កិច្ចសហប្រតិបត្តិការទាំងនេះ នឹងជំរុញធ្វើឱ្យវិស័យទេសចរចិន-កម្ពុជា ឈានទៅមុខមួយកម្រិតទៀត។
ក្នុងឱកាសនោះដែរ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានមានប្រសាសន៍ថា សន្និសីទខេត្តក្រុងមេត្រីភាពកម្ពុជា-ចិន ឆ្នាំ២០២៤ មិនត្រឹមតែចូលរួមដល់ការពង្រឹងចំណងមិត្តភាព ការបង្កើនកិច្ចសហប្រតិបត្តិការល្អលើគ្រប់វិស័យ និងការផ្លាស់ប្តូរវប្បធម៌គ្នាទៅវិញទៅមករវាងកម្ពុជា-ចិន ប៉ុណ្ណោះទេ ប៉ុន្តែនឹងជួយជំរុញក្នុងការផ្សារភ្ជាប់ និងបង្កើតទំនាក់ទំនងទីក្រុងមេត្រីភាព កាន់តែច្រើនបន្ថែមរវាង កម្ពុជា-ចិន ដែលនឹងរួមចំណែកក្នុងការផ្សព្វផ្សាយកាន់តែទូលំទូលាយនូវ វប្បធម៌ ប្រពៃណី និងសក្តានុពលទេសចរណ៍របស់កម្ពុជា-ចិន ជាពិសេសការយកចិត្តទុកដាក់ជាអាទិភាពនូវប្រភពទីផ្សារចិន សម្រាប់វិស័យទេសចរណ៍កម្ពុជាផងដែរ។
ឯកឧត្តមរដ្ឋមន្ត្រី ក៏បានស្នើឱ្យសមាគមមិត្តភាពកម្ពុជា-ចិន និងសមាគមប្រជាជនចិនដើម្បីមិត្តភាពជាមួយបរទេស បន្តជំរុញកិច្ចសហការ និងសាមគ្គីភាព រវាងប្រជាជននិងប្រជាជននៃ ប្រទេសយើងទាំងពីរ កម្ពុជា-ចិន ឱ្យកាន់តែស៊ីជម្រៅបន្ថែមទៀត និងជំរុញការផ្សព្វផ្សាយអំពីវប្បធម៌ អរិយធម៌ ប្រពៃណី និងសក្តានុពលទេសចរណ៍កម្ពុជាទៅដល់ប្រជាជនចិន ជាពិសេសខេត្តសៀមរាប ដែនដីអច្ឆរិយៈ និងជាគោលដៅទេសចរណ៍ប្រកបដោយសក្តានុពលរបស់កម្ពុជា៕
អត្ថបទ និងរូបថត៖ លោក ជា ស្រស់, លោក យូ វង្ស
កែសម្រួល៖ លោក អ៊ុន ណារាជ្យ
