នៅព្រឹកថ្ងៃទី១៩ ខែ វិច្ឆិកា ឆ្នាំ២០២៤នេះក្រសួងអប់រំយុវជននិងកីឡាបានបើកកិច្ចប្រជុំបូកសរុបចលនាប្រឡងប្រណាំង៣ល្អ”កូនល្អ សិស្សល្អ មិត្តល្អ”ថ្នាក់ជាតិ របស់ក្រុមប្រឹក្សាយុវជនកម្ពុជានិងក្រុមប្រឹក្សាកុមារកម្ពុជាក្រោមប្រធានបទ “ការចាប់ផ្តើមរបស់កុមារ និងយុវជនដើម្បីក្លាយខ្លួនជាប្រជាពលរដ្ឋ ឌីជីថល” របស់យុវជន និងកុមារឆ្នាំ២០២៤ ដែលមានរយៈពេល២ថ្ងៃគឺថ្ងៃទី១៩-២០ ខែវិច្ឆិកា នៅសណ្ឋាគាររីជិនស៊ីអង្គរក្នុងខេត្តសៀមរាប ក្រោមអធិបតីភាពលោកជំទាវ ស្រូយ សុជាតិ អគ្គនាយកនៃអគ្គនាយកដ្ឋានយុវជនក្រសួងអប់រំយុវជននិងកីឡា និងដោយមានការចូលរួមពីប្រធានប្រតិភូដឹកនាំនិងបេក្ខជនជាសមាជិកក្រុមប្រឹក្សាយុវជនកម្ពុជានិងសមាជិកក្រុមប្រឹក្សាកុមារកម្ពុជាដែលជាសិស្សានុសិស្សមកពីរាជធានីខេត្តទាំង២៥ នៃព្រះរាជាណាចក្រកម្ពុជា។
លោក ម៉ិល ផនសីហា ប្រធាននាយកដ្ឋានអប់រំយុវជននិងកុមារបានមានប្រសាសន៍ថា ដើម្បីលើកទឹកចិត្ត និងគាំទ្រដល់សមាជិក និងក្រុមប្រឹក្សាឆ្នើមប្រចាំឆ្នាំសិក្សានីមួយៗ ក្រសួងអប់រំ យុវជន និងកីឡា តែងតែរៀបចំកិច្ចប្រជុំបូកសរុបចលនាប្រឡងប្រណាំង ៣ល្អ “កូនល្អ សិស្សល្អនិងមិត្តល្អ” នេះឡើង ក្នុងគោលបំណងផ្តល់ឱកាសដល់ក្រុមប្រឹក្សាយុវជនកម្ពុជា និង ក្រុមប្រឹក្សាកុមារកម្ពុជា ធ្វើការចែករំលែកបទពិសោធ និងឧត្តមានុវត្តន៍ពីគ្នាទៅវិញទៅមក ទៅលើការអនុវត្តសកម្មភាពក្រុមប្រឹក្សានៅក្នុងសាលារៀន មានស្នាដៃល្អលើផ្នែកបរិស្ថាន អនាម័យ សោភ័ណសាលារៀន និងការចូលរួមចំណែកគាំទ្រដល់ការរៀននិងការបង្រៀនជាពិសេសសកម្មភាពក្រៅម៉ោងសិក្សាដើម្បីលើកកម្ពស់បំណិន ការគោរពវិន័យ និងសីលធម៌វិជ្ជមានសម្រាប់យុវជន និងកុមារ។ លោកក៏បានបន្តថា នៅក្នុងរយះពេលនៃការកិច្ចនេះក្រុមប្រឹក្សាយុវជនកម្ពុជា និងក្រុមប្រឹក្សាកុមារកម្ពុជា នឹងធ្វើផ្លាស់ប្តូរចំណេះដឹង បទពិសោធ និងផ្តល់ជាវិធីសាស្ត្រល្អៗ ក៏ដូចជាការចូលរួមផ្តល់ជាធាតុចូលថ្មីៗ ការក្នុងការស្វែងរកដំណោះស្រាយចំពោះបញ្ហាប្រឈម សិក្សាសាធារណៈ ឱ្យកាន់មានភាពល្អប្រសើរឡើង ក្នុងការអនុវត្តការងារក្រុមប្រឹក្សានៅតាមគ្រឹះស្ថានគាំទ្រដល់ការប្រែក្លាយសាលារៀនទៅជាសាលារៀនគំរូចូលរួមក្នុងការកែលម្អគុណភាពអប់រំនៅកម្ពុជាផងដែរ។
លោកជំទាវ ស្រូយ សុជាតិ អគ្គនាយកនៃអគ្គនាយកដ្ឋានយុវជនក្រសួងអប់រំយុវជននិងកីឡា បានថ្លែងថា ចលនា៣ល្អរបស់យុវជន និងកុមារ គឺជាចំណែកមួយ ដ៏សំខាន់បំផុតក្នុងគោលដៅនៃការអភិវឌ្ឍធនធានមនុស្សនៅកម្ពុជា។ បច្ចុប្បន្នវិស័យអប់រំកំពុងមានការអភិវឌ្ឍគ្រប់ផ្នែកដើម្បីលើកកម្ពស់សមត្ថភាពសិស្ស-និស្សិត និង ប្រជាពលរដ្ឋទូទៅឱ្យមានជំនាញបច្ចេកទេស និងវិទ្យាសាស្រ្តវ័យឆ្លាត ដើម្បីឆ្លើយតបទៅនឹងតម្រូវការនៃទីផ្សារការងារ ពិសេសផ្តោតការយកចិត្តទុកដាក់អភិវឌ្ឍកម្លាំងយុវជន ជាកម្លាំងដ៏ខ្លាំងក្លាសម្រាប់បន្តវេន្តអភិវឌ្ឍប្រទេសជាតិនាពេលបច្ចុប្បន្ន និងទៅអនាគត។
លោកជំទាវបន្តថាការរៀបចំកម្មវិធីប្រជុំបូកសរុបចលនាប្រឡងប្រណាំង ៣ល្អ របស់ក្រុមប្រឹក្សាយុវជនកម្ពុជា ក្រុមប្រឹក្សាកុមារកម្ពុជា គឺសំដៅបណ្តុះបំណិនសតវត្សរ៍ទី២១ និងសម្បទាចំនួន៤ប្រចាំជីវិតគឺ វិជ្ជាសម្បទា. បំណិនសម្បទា. ចរិយាសម្បទា .និងកាយសម្បទា។លោកជំទាវ ស្រូយ សុជាតិ បានមានប្រសាសន៍បន្ថែមថាឆ្លើយតបទៅនឹងចក្ខុវិស័យរបស់រាជរដ្ឋាភិបាលអាណត្តិទី៧ ចលនា៣ល្អរបស់ក្រុមប្រឹក្សាយុវជន-កុមារកម្ពុជា គឺជាចំណែកមួយដ៏សំខាន់ ក្នុងការលើកកម្ពស់ការចូលរួមការងារស្ម័គ្រចិត្ត ការគោរពវិន័យ និងកែប្រែសីលធម៌និង ឥរិយាបថរបស់យុវជន កុមារ ក្នុងគោលដៅ នៃការអភិវឌ្ឍមូលធនមនុស្សរបស់សង្គម។ ផ្តើមចេញពីសកម្មភាពជំរុញ ចលនា៣ល្អកន្លងមក ប្អូនៗយុវជន-កុមារជាច្រើនបានចាប់អារម្មណ៍ និងបានផ្លាស់ប្តូរផ្នត់គំនិត និងទំលាប់ធ្វើការងារ ស្ម័គ្រចិត្ត និងចូលរួមយ៉ាងសកម្មក្នុងការងារសង្គមប្រកបដោយមោទនភាពជាតិ និងការខិតខំកសាងអំពើល្អរបស់ខ្លួន ចេះយកចិត្តទុកដាក់ជួយមិត្តភ័ក្តិ គ្រួសារ និងសង្គមជាតិ ព្រមទាំងសង្វាតសិក្សារៀនសូត្របានជាបន្តបន្ទាប់។ លោកជំទាវក៏បានមានប្រសាសន៍ណែនាំ មន្ត្រីដឹកនាំយុវជនគ្រប់ថ្នាក់ ពិសេសក្មួយៗយុវជន-កុមារ ដែលបានចូលរួមការប្រជុំបូកសរុបចលនា៣ល្អនាពេលនេះ ត្រូវប្រើប្រាស់ឱកាសដ៏មានតម្លៃនេះ ធ្វើការពិភាក្សា ផ្លាស់ប្តូរបទពិសោធន៍នៃឧត្តមានុវត្តកន្លងមកពីគ្នាទៅវិញទៅមក និងវិភាគពិចារណារកវិធានការគន្លឹះសម្រាប់ ដោះស្រាយបញ្ហាប្រឈមនានា ដើម្បីពង្រឹងការអនុវត្តសេចក្តីណែនាំ ស្តីពីការលើកកម្ពស់ប្រសិទ្ធភាព នៃការអនុវត្ត ចលនាប្រឡងប្រណាំង ៣ល្អ របស់កុមារ និងយុវជន ក្លាយជាសកម្មភាពអនុវត្ត និងការបង្កើតក្រុមប្រឹក្សាយុវជន-កុមារកម្ពុជានៅតាមសាលារៀនប្រកបដោយប្រសិទ្ធភាព ក្នុងការស្រូបទាញសិស្សានុសិស្ស ចូលរួមឱ្យកាន់តែសកម្មពីមួយឆ្នាំទៅមួយឆ្នាំ ពីមួយជំនាន់ទៅមួយជំនាន់ផងដែរ៕
អត្ថបទ៖លោក ទ្រា ពន្លឺ
កែសម្រួល៖លោកស្រី សូ ស៊ីមាន
