ប្រតិភូរាជរដ្ឋាភិបាល និងជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានឲ្យដឹងថា បន្ទាប់ពីការសាងសង់អស់រយៈពេលមួយឆ្នាំ សារមន្ទីរតេជោសន្តិភាព ដែលមានរៀងជាគ្រាប់មីនធំជាងគេនោះ បានត្រៀមខ្លួនរួចរាល់នៅក្នុងការទទួលបដិសណ្ឋារកិច្ចគណៈប្រតិភូមកពីបណ្តាប្រទេសនានានៃអនុសញ្ញាអូតាវ៉ា ។
ឯកឧត្តម ហេង រតនា បានមានប្រសាសន៍ អនុញ្ញាអូតាវ៉ា មានរដ្ឋជាសមាជិកចំនួន១៦៤ប្រទេស ហើយចាប់ពីថ្ងៃទី២៤ ដល់២៩ខែវិច្ឆិកា ឆ្នាំ២០២៤នេះ ក្រុមប្រទេសទាំងនោះនឹងមកចូលរួមកិច្ចប្រជុំកំពូលនៅក្នុងក្រុងសៀមរាប ។ឯកឧត្តមបន្តថា មុននឹងបើកកិច្ចប្រជុំជាផ្លូវការ គណៈប្រតិភូនឹងមកទស្សនកិច្ចស្វែងយល់អំពីកិច្ចការដោះមីនរបស់កម្ពុជា។
ឯកឧត្តម ហេង រតនា បន្តថា កិច្ចប្រជុំកំពូលសៀមរាប-អង្គរ ស្តីពីពិភពលោកគ្មានមីននៃអនុសញ្ញាអូតាវ៉ានេះ មិនគ្រាន់តែជាឱកាសរបស់កម្ពុជា នៅក្នុងការផ្សព្វផ្សាយវិស័យទេសចរណ៍ វិស័យដោះមីននោះទេ ប៉ុន្តែវាក៏ជាឱកាសនៅក្នុងការផ្សព្វផ្សាយកាវិនិយោគផ្សេងៗផងដែរ។
សូមរម្លឹកថា នៅថ្ងៃទី៦ ខែវិច្ឆិកា ឆ្នាំ២០២៣ នៅសាលាក្រុងអូគីណាវ៉ា ប្រទេសជប៉ុន កម្ពុជានិងជប៉ុន បានចុះហត្ថលេខាកិច្ចព្រមព្រៀមសហប្រតិបត្តិការ សាងសង់សារមន្ទីរតេជោសន្ដិភាព ស្ថិតនៅក្នុងស្រុកប្រាសាទបាគង ខេត្តសៀមរាប ។
នៅក្នុងការសាងសង់នេះ មានអគារមួយក្នុងចំណោមអគារសំខាន់ៗនៃសារមន្ទីរតេជោសន្ដិភាព គឺជាសំណង់អាគារប្រវត្តិសាស្ត្រសង្គ្រាម ដែលជាជំនួយពីរាជរដ្ឋាភិបាលជប៉ុន មានរាងការ៉េខាងក្រោមមានទំហំ១០៨ម៉ែត្រគុណ១០៨ម៉ែត្រ និងខាងលើរាងមូលមានអង្កត់ផ្ចិត៥២ម៉ែត្រ មាន២ជាន់កម្ពស់១៧ម៉ែត្រ មានទំហំជាង១៥.០០០ម៉ែត្រក្រឡា ហើយវានឹងអាចក្លាយជាអគារ ដែលមានរាងគ្រាប់មីនប្រឆាំងមនុស្ស (PMN) ធំជាងគេនៅក្នុងពិភពលោក។
ព័ត៌មានជាតិ ថ្មីៗ
យោងតាមស៊ីម៉ាក់ សារមន្ទីរតេជោសន្ដិភាពនេះ គឺជាមរតកជាតិមួយក្នុងការដាក់បង្ហាញជូនសាធារណជនជាតិនិងអន្ដរជាតិ ឲ្យយល់កាន់តែច្បាស់ថែមទៀតនូវការខិតខំពុះពារប្ដូរផ្ដាច់របស់ សម្ដេចអគ្គមហាសេនាបតីតេជោ ហ៊ុន សែន ក្នុងការបញ្ចប់សង្គ្រាមនៅកម្ពុជា និងបានកសាងសន្ដិភាពយ៉ាងពេញលេញពិតប្រាកដមួយសម្រាប់ប្រជាជននិងប្រទេសជាតិដ៏កម្សត់មួយនេះ។
គម្រោងការកសាង សារមន្ទីរតេជោសន្តិភាព ពិតជាមានសារៈសំខាន់ណាស់ ដើម្បីបន្តអប់រំផ្សព្វផ្សាយពីគុណតម្លៃនៃសន្តិភាព។ ជាក់ស្តែងប្រទេសក្នុងតំបន់អាស៊ីមានចំនួន១៨ សុទ្ធតែមានសារមន្ទីរសន្តិភាព ក្នុងនោះដូចជា ប្រទេសជប៉ុនមានចំនួន៨៥កន្លែង កូរ៉េខាងត្បូងមានចំនួន២០កន្លែង និងប្រទេសចិនមានចំនួន១៤កន្លែង។
ការអប់រំផ្សព្វផ្សាយពីតម្លៃសន្តិភាពដល់ស្រទាប់យុវជន សិស្ស-និសិ្សត បាននិងបន្តជំរុញយ៉ាងខ្លាំងក្លានៅជប៉ុនដោយក្នុងមួយឆ្នាំៗតាមសារមន្ទីរសន្តិភាពនីមួយៗទទួលបានដំណើរទស្សនកិច្ចពីសិស្សសាលាបឋម ឬសាលាមធ្យមសិក្សាប្រមាណជាង២.០០០សាលារៀន និងមានអ្នកចូលទស្សនាជាទូទៅមានចំនួនជាង១លាននាក់។
ដោយឡែកចំពោះ សារមន្ទីរតេជោសន្តិភាពមួយនេះ នឹងត្រូវរៀបចំដាក់តាំងបង្ហាញពិព័ណ៌រូបភាព ខ្លឹមសារឯកសារ វត្ថុតាង និងសាក្សីអមជាមួយតឹកតាងប្រវត្តិសាស្រ្តឈឺចាប់ខ្លោចផ្សា និងការបំផ្លិចបំផ្លាញនានាដោយសារសង្គ្រាមនោះ សម្រាប់បម្រើការអប់រំផ្សព្វផ្សាយដែលអាចចូលរួមជំរុញនូវការផ្លាស់ប្តូរផ្នត់គំនិត ឥរិយាបថ និងពង្រឹងស្មារតីយុវជនជំនាន់ក្រោយៗឱ្យស្គាល់ពីតម្លៃដ៏មហាសាលនៃសន្តិភាព និងអាចជាចលនាគាំទ្រយ៉ាងពេញទំហឹងចំពោះទស្សនវិស័យ “អរគុណសន្តិភាព” ដ៏ប្រពៃរបស់សម្តេចអគ្គមហាសេនាបតីតេជោ។
ក្នុងរយ:ពេលជាង២៥ឆ្នាំកន្លងទៅនេះ ថ្នាក់ដឹកនាំអង្គភាពស៊ីម៉ាក់ ជាពិសេស ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានព្យាយាមខិតខំសិក្សាស្រាវជ្រាវនិងធ្វើដំណើរទៅតាមបណ្តាប្រទេសជឿនលឿនមួយចំនួនដូចជានៅសហរដ្ឋអាម៉េរិក អាឡឺម៉ង់ ស្វីស ស៊ុយអែត ដាណឺម៉ាក អូស្ត្រាលី ជាពិសេសនៅប្រទេសជប៉ុន។ ឯកឧត្តមប្រតិភូ បានអញ្ជើញទៅសិក្សាស្វែងយល់នៅប្រទេសជប៉ុនជាច្រើនលើកច្រើនសារ ក្នុងនោះបានទៅសិក្សាពីការរៀបចំសារមន្ទីរសន្តិភាពនៅទីក្រុងអូគីណាវ៉ាចំនួន៤លើក និងនៅសារមន្ទីរហេរ៉ូស៊ីម៉ាចំនួន៣លើកផងដែរ។
ដោយឡែកនៅក្នុងប្រទេសកម្ពុជាឯណេះវិញ ដំណើរការស្រាវជ្រាវប្រមែប្រមូលសន្សំនូវភស្តុតាង សក្ខីកម្ម រូបភាព និងឯកសារពាក់ព័ន្ធនានា ជាពិសេសការរៀបចំទីតាំងដីធ្លីសម្រាប់សាងសង់សារមន្ទីរតេជោសន្តិភាពនេះឡើងនៅលើទឹកដីអង្គរដ៏បវរ។
ក្រោមកិច្ចព្រមព្រៀងសហប្រតិបត្តិការ ដែលភាគីជប៉ុនឯកភាពផ្តល់ជំនួយក្នុងការគាំទ្រអភិវឌ្ឍន៍ធនធានមនុស្ស គោលដៅសំខាន់ គឺផ្តល់ការបណ្តុះបណ្តាលពង្រឹងសមត្ថភាពមន្ត្រីជំនាញសារមន្ទីរតេជោសន្តិភាពសៀមរាបរយៈពេល៣ឆ្នាំ គិតចាប់ពីឆ្នាំ២០២៤ ដល់ឆ្នាំ២០២៦។
សារមន្ទីរតេជោសន្តិភាព ខេត្តសៀមរាប ជាមជ្ឈមណ្ឌលប្រវត្តិសាស្ត្រពិតនៃសង្គ្រាមនៅកម្ពុជា ហើយក៏បានត្រៀមខ្លួនទទួលស្វាគមន៍ដំណើរទស្សនកិច្ចរបស់គណប្រតិភូរដ្ឋភាគីក្នុងសន្និសីទលើកទី៥នៃការត្រួតពិនិត្យឡើងវិញលើការអនុវត្តអនុសញ្ញាមីនអន្តរជាតិអូតាវ៉ា នៃកិច្ចប្រជុំកំពូលសៀមរាប-អង្គរ “ពិភពលោកមួយដែលគ្មានមីន” ដែលនឹងប្រព្រឹត្តិទៅនៅខេត្តសៀមរាបនាចុងខែវិចិ្ឆកា ឆ្នាំ២០២៤នេះ ដែលគេរំពឹងថានឹងមានតំណាងចូលរួមប្រមាណជាង៨០០នាក់មកពី១៦៤ប្រទេសនៃរដ្ឋសមាជិក។
ក្នុងកិច្ចប្រជុំកំពូលនេះប្រាកដណាស់ អង្គភាពស៊ីម៉ាក់នឹងរួមចំណែកផ្តល់បទពិសោធន៍ទាក់ទងនឹងការបោសសម្អាតមីននៅកម្ពុជា ការអភិវឌ្ឍក្រោយបោសសម្អាតមីន ជាពិសេសការរួមចំណែកក្នុងការ កសាងសន្តិភាពនៅកម្ពុជា តាមរយៈការតាំងបង្ហាញនូវសកម្មភាពនានានៅក្នុងសារមន្ទីរតេជោសន្តិភាព នៅក្នុងខេត្តសៀមរាប៕
អត្ថបទ៖លោក ជា ស្រស់
កែសម្រួល៖លោកស្រី សូ ស៊ីមាន
