តំណាងគណបក្សនយោបាយដែលនិយមកណ្តាល មកពីបណ្តាប្រទេសនានាចំនួន២៤ បានប្តេជ្ញាចិត្តក្នុងការជំរុញការកសាងសន្តិភាពមួយសម្រាប់ពិភពលោកដែលមានលក្ខណៈយូរអង្វែង។ ការប្តេជ្ញាចិត្តនេះ បានធ្វើឡើងតាមរយៈសេចក្តីប្រកាសក្រុងសៀមរាប បន្ទាប់ពីក្រុមអ្នកនយោបាយទាំងនោះបានជួបប្រជុំគ្នាពេញមួយថ្ងៃនៅក្រុងសៀមរាប កាលពីថ្ងៃទី១៨ ខែវិច្ឆិកា ឆ្នាំ២០២៤។
នៅក្នុងសន្និសីទសារព័ត៌មាន ក្រោយពីបញ្ចប់កិច្ចប្រជុំពិសេសគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) ស្តីពី «សន្តិភាពសម្រាប់មនុស្សជាតិ និងភពផែនដី» នាថ្ងៃទី១៨ ខែវិច្ឆិកា ឆ្នាំ២០២៤ថា ខេត្តសៀមរាប ឯកឧត្តម André Pastrana (អានទ្រេ ផាសត្រាណា ) ប្រធានអង្គការ (IDC-CDI) និងជាអតីតប្រធានាធិបតីកូឡុំប៊ី បានថ្លែងថា ក្រុមអ្នកនិយមកណ្តាលមកពីគ្រប់ទិសទីបានសម្រេចចិត្តរួមគ្នា១៣ចំណុច ដែលពាក់ព័ន្ធនឹងសន្តិសុខពិភពលោក ពាក់ព័ន្ធនឹងតំបន់ ពាក់ព័ន្ធជាមួយប្រទេសមួយចំនួនដែលកំពុងស្ថិតក្នុងស្ថានភាពសង្គ្រាម ដូចជាប្រទេសអ៊ុយក្រែន តំបន់ហ្គាហ្សាជាដើម។
ឯកឧត្តមបន្តថា ដូច្នេះការជួបប្រជុំនាពេលនេះជាការបើកឱកាសមួយយ៉ាងល្អពីសំណាក់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា និងជាអនុប្រធានគណបក្សប្រជាជនកម្ពុជា ដែលបានអនុញ្ញាតឲ្យអ្នកនិយមកណ្តាលមកពីប្រទេសខុសគ្នា សញ្ជាតិខុសគ្នា វប្បធម៌ខុសគ្នា មកចូលរួមបញ្ចេញគំនិតរួមគ្នាដើម្បីសន្តិភាពប្រជាជន និងភពផែនដី។
ចំណែកឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ នៃរដ្ឋសភាកម្ពុជា និងជាអនុប្រធាន IDC-CDI បានមានប្រសាសន៍ថា បច្ចុប្បន្ននេះ ដោយសារបញ្ហាបណ្តាញសង្គម បញ្ហាព័ត៌មានក្លែងក្លាយ រួមផ្សំជាមួយនឹងការកើនឡើងនូវពួកប្រជានិយមផងបានធ្វើឲ្យលទ្ធិប្រជាធិបតេយ្យមានការធ្លាក់ចុះ។ ដូច្នេះកិច្ចប្រជុំជាអន្តរជាតិនេះ តំណាងគណបក្សដែលនិយមកណ្តាល មកពីបណ្តាតំបន់អាម៉េរិកឡាទីន មកពីអឺរ៉ុប ទ្វីបអាហ្វ្រិក ទ្វីបអាស៊ី ជាពិសេសបណ្តាប្រទេសក្នុងតំបន់អាស៊ីអាគ្នេយ៍ បានធ្វើការសម្រេចផ្នែកនយោបាយរួមមួយដើម្បីកសាងសន្តិភាពមួយពេញលេញយូរអង្វែង។
ឯកឧត្តម សួស យ៉ារ៉ា ថ្លែងថា “ចឹងដូច្នេះហើយការសម្រេចចិត្តរបស់យើងបណ្តាបក្សនយោបាយតាមតំបន់នីមួយៗបានចូលរួមក្នុងការវិភាគ និងសម្រេចចិត្តផ្នែកនយោបាយជាន់ខ្ពស់ដែលមានគណបក្សនយោបាយដឹកនាំអំណាច គណបក្សដែលយើងហៅថាគណបក្សសម្ព័ន្ធភាព ហើយក៏មានមកពីគណបក្សប្រឆាំងផងដែរ។ ចូលរួមទាំងអស់គ្នាហ្នឹង គ្រប់ទិស ចឹងហើយការសម្រេចចិត្តទាំងឡាយគឺពឹងផ្អែកលើការបញ្ចេញព័ត៌មានពិត ហើយឥលូវនេះដោយសារSocial Media បញ្ហាព័ត៌មានក្លែងក្លាយ ធ្វើឲ្យលិទ្ធិប្រជាធិបតេយ្យត្រូវបានស្រុតខ្សោយមួយចំនួនច្រើន”។
សូមបញ្ជាក់ថា កិច្ចប្រជុំអន្តរជាតិនេះ និងរៀបចំឡើងរយៈពេល៣ថ្ងៃ ចាប់ពីថ្ងៃទី១៧ ដល់ថ្ងៃទី១៩ ខែវិច្ឆិកា ឆ្នាំ២០២៤ ។ បច្ចុប្បន្ន អង្គការ CDI មានសមាជិកជាង ១០៩ គណបក្ស មកពី៨៣ ប្រទេស ដែលមានមនោគមវិជ្ជានយោបាយនិយមកណ្តាល មកពីទ្វីបអឺរ៉ុប អាមេរិកឡាទីន អាមេរិកខាងជើង អាហ្វ្រិក និងអាស៊ីប៉ាស៊ីហ្វិក។ គណបក្សប្រជាជនកម្ពុជាបានចូលជា សមាជិកពេញសិទ្ធិរបស់ CDI កាលពីខែមេសា ឆ្នាំ២០១៦ ហើយត្រូវបានបោះឆ្នោតជាអនុប្រធាន អង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែកក្កដា ឆ្នាំ២០១៨ ចំនួន ៣ អាណត្តិមកហើយ៕
អត្ថបទ និងរូបភាព៖ លោកជា ស្រស់ លោកអ៊ុន ណារាជ្យ
កែសម្រួល៖ លោក ហាំ ម៉េងហួត
