គិតមកទល់ពេលនេះ អាជ្ញាធរពាក់ព័ន្ធកំពុងពន្លឿនការងារអនុវត្តគម្រោងរបស់រាជរដ្ឋាភិបាលកម្ពុជា ក្នុងការផ្គត់ផ្គង់ទឹកស្អាតក្នុងខេត្តសៀមរាប ឱ្យបាន១០០ភាគរយ ក្នុងឆ្នាំ២០២៥ ខណៈបច្ចុប្បន្នក្នុងខេត្តសៀមរាប មានប្រជាពលរដ្ឋប្រមាណ ៨០ភាគរយហើយ បានតភ្ជាប់បណ្ដាញទឹកស្អាតសម្រាប់ប្រើប្រាស់ប្រចាំថ្ងៃ។
ក្នុងកម្មវិធីសន្ទនាមតិ នៅថ្ងៃទី២១ ខែវិច្ឆិកា ឆ្នាំ២០២៤នេះ លោក សឿ សីហរិទ្ធិ អនុប្រធានមន្ទីរអភិវឌ្ឍន៍ជនបទខេត្តសៀមរាប បានបង្ហាញថា អគ្គនាយកដ្ឋានទឹកស្អាត ជាសេនាធិការឱ្យក្រសួងអភិវឌ្ឍន៍ជនបទ ក្នុងការគ្រប់គ្រង និងអភិវឌ្ឍន៍វិស័យទឹកស្អាត ដើម្បីការផ្តល់សេវាផ្គត់ផ្គង់ទឹកស្អាតប្រកបដោយគុណភាព សុវត្ថិភាព និរន្តរភាព និងថ្លៃសមរម្យ ក្នុងគោលបំណងចូលរួមលើកកម្ពស់សុខុមាលភាពសាធារណ និងជីវភាពរស់នៅរបស់ប្រជាពលរដ្ឋប្រកបដោយបរិយាបន្ន ព្រមទាំងទ្រទ្រង់ដល់ការអភិវឌ្ឍវិស័យសេដ្ឋកិច្ចជាតិផងដែរ។
លោកអនុប្រធានមន្ទីរ បានឱ្យដឹងថា ដើម្បីអនុវត្តសកម្មភាពផ្គត់ផ្គង់ទឹកស្អាតជូនប្រជាពលរដ្ឋកាន់តែមានប្រសិទ្ធភាពខ្ពស់ អគ្គនាយកដ្ឋានទឹកស្អាតមានភារកិច្ចសំខាន់ៗមួយចំនួន ដើម្បីផ្គត់ផ្គង់ទឹកស្អាតជូនសាធារណជនដូចជា៖ កសាងតាក់តែង និងត្រួតពិនិត្យការអនុវត្តច្បាប់ និងលិខិតបទដ្ឋានគតិយុត្តផ្សេងទៀត និងគោលនយោបាយផែនការយុទ្ធសាស្ត្រជាតិ ផែនការមេ ផែនការសកម្មភាព សម្រាប់ដឹកនាំគ្រប់គ្រងវិស័យទឹកស្អាត, រៀបចំតាក់តែង កំណត់ស្តង់ដាបច្ចេកទេសប្រព័ន្ធផ្គត់ផ្គង់ទឹកស្អាត និងគោលការណ៍ផ្សេងៗ និងអនុវត្ត បញ្ញត្តកម្មបច្ចកេទេស ដើម្បីធានាប្រសិទ្ធភាពនៅក្នុងដំណើរការផ្គត់ផ្គង់ទឹកស្អាត, ដឹកនាំកសាងផែនការរយៈពេលខ្លី មធ្យម និងវែងរបស់គ្រប់ប្រតិបត្តិករទឹកស្អាត ដើម្បីសម្រេចឱ្យបានទិសដៅរបស់រាជរដ្ឋាភិបាលលើវិស័យទឹកស្អាត, ចាត់តាំងអនុវត្តផែនការសុវត្ថិភាពទឹកធន់នឹងអាកាសធាតុ និងការត្រួតពិនិត្យគុណភាពទឹក និងធ្វើបញ្ញត្តកម្មសេដ្ឋកិច្ចនិងសង្គម ដើម្បីធានាការពារផលប្រយោជន៍គ្រប់ភាគីពាក់ព័ន្ធឱ្យមានសមធម៌៕
អត្ថបទ និងរូបភាព៖ លោក ឈឹម ដេវីត
កែសម្រួល៖ លោក អ៊ុន ណារាជ្យ
