នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះ ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញប្រកាសសមាសភាពប្រធាន និងអនុប្រធានសាខាមូលនិធិជាតិជំនួយសង្គម និងសាខាមូលនិធិជនពិការខេត្តសៀមរាប ចំនួន៧រូប និងជួបសំណេះសំណាលជាមួយថ្នាក់ដឹកនាំ និងមន្ត្រីរាជការ នៃមន្ទីរសង្គមកិច្ចខេត្តសៀមរាប ដោយបានការចូលរួមពី ឯកឧត្តម សួស សុខចាន់ សមាជិកក្រុមប្រឹក្សាខេត្តសៀមរាប និងលោក នាក់ ណេរ៉ុន អភិបាលរងខេត្ត រួមនឹងប្រតិភូអមដំណើរ ថ្នាក់ដឹកនាំមន្ទីរអង្គភាពពាក់ព័ន្ធក្នុងខេត្ត អាជ្ញាធរក្រុងស្រុកជាច្រើនរូប។
មានប្រសាសន៍ក្នុងឱកាសនោះ ឯកឧត្ដម ជា សុមេធី បានបង្ហាញការសាទរ ចំពោះលោកលោកស្រីដែលត្រូវបានប្រកាសតែងតាំងតួនាទីជាប្រធាន អនុប្រធាន សាខាមូលនិធិជាតិជំនួយសង្គម និងសាខាមូលនិធិជនពិការ នៃខេត្តសៀមរាប ដើម្បីដឹកនាំបំពេញតួនាទី ការងារបន្ត ជាសេនាធិការឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា និងមូលនិធិជាតិជំនួយសង្គម ក្នុងការផ្តល់សេវាជូនប្រជាពលរដ្ឋនៅក្នុងខេត្តសៀមរាប។ ក្នុងនោះ ឯកឧត្តម បានជំរុញដល់លោកលោកស្រីជាប្រធាន អនុប្រធាន និងសមាជិកសាខាទាំងអស់ ត្រូវយកចិត្តទុកដាក់ពង្រឹងតួនាទី និងភារកិច្ចការងារក្នុងការផ្ដល់សេវាជូនប្រជាពលរដ្ឋ សំដៅជួយធ្វើជាសេនាធិការជួយជំរុញការបំពេញតម្រូវការប្រជាពលរដ្ឋ។
ឯកឧត្ដមរដ្ឋមន្ត្រី ក៏បានវាយតម្លៃខ្ពស់ ចំពោះសមិទ្ធផលការងារប្រកបដោយផ្លែផ្កា ដែលថ្នាក់ដឹកនាំ និងមន្ត្រីរាជការនៃមន្ទីរសង្គមកិច្ចខេត្ត និងសាខាទាំង២ ដែលម្រេចបានរយៈពេលកន្លងមក ដោយបញ្ជាក់ថា សមិទ្ធផលទាំងនេះគឺកើតចេញពីការខិតខំប្រឹងប្រែងរួម របស់ថ្នាក់ដឹកនាំ និងមន្ត្រីរាជការក្រោមឱវាទទាំងអស់ ដែលបានយកចិត្តទុកដាក់បំពេញតួនាទីភារកិច្ច សហការគ្នាបានល្អ ជាមួយរដ្ឋបាលខេត្ត រដ្ឋបាលក្រុងស្រុក ឃុំសង្កាត់ ក្នុងការផ្តល់សេវាសង្គមកិច្ចនានាបានល្អប្រសើរជូនប្រជាពលរដ្ឋ ពិសេសការអនុវត្តកម្មវិធីជាតិជំនួយសង្គម ដែលត្រូវបានដាក់ឱ្យអនុវត្តចាប់ពីខែមេសា កន្លងទៅនេះ។
សូមជម្រាបថា នៅថ្ងៃដដែលនេះដែរ ឯកឧត្ដម ជា សុមេធី និងលោកជំទាវ រួមនឹងប្រតិភូអមដំណើរ ក៏បានបន្តធ្វើទស្សនកិច្ច និងប្រគល់អំណោយជូនដល់មណ្ឌលភូមិកុមារ អេសអូអេស អង្គរសៀមរាប និងមជ្ឈមណ្ឌលស្ដារលទ្ធភាពពលកម្មកាយសម្បទាខេត្តសៀមរាប នូវគ្រឿងឧបភោគបរិភោគ និងថវិកាមួយចំនួនផងដែរ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
