កាលពីថ្ងៃទី២១ ខែវិច្ឆិកា ឆ្នាំ២០២៤ ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីប្រកាសសមាសភាព សាខាមូលនិធិជាតិជំនួយសង្គម និងសាខាមូលនិធិជនពិការ ខេត្តសៀមរាប នៅសាលប្រជុំមន្ទីរសង្គមកិច្ចខេត្ត ដោយបានការចូលរួមពី ឯកឧត្តម សួស សុខចាន់ សមាជិកក្រុមប្រឹក្សាខេត្ត លោក នាក់ ណេរ៉ុន អភិបាលរងខេត្ត ប្រតិភូថ្នាក់ជាតិ ថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត អភិបាលក្រុងស្រុក និងកងកម្លាំងប្រដាប់អាវុធជាច្រើនរូប។
តាមរយៈរបាយការណ៍របស់លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប បានឱ្យដឹងថា ក្នុងរយៈពេល១០ខែកន្លងមកនេះ សាខាមូលនិធិជនពិការ បានទទួលជនមានពិការភាព ដែលមកទទួលសេវាស្ដារលទ្ធភាពពលកម្មកាយសម្បទា នៅក្នុងមជ្ឈមណ្ឌលស្ដារលទ្ធភាពពលកម្មកាយសម្បទាសរុបទាំងអស់ចំនួន១,០៥៨នាក់ ក្នុងនោះដែរសាខាមូលនិធិជនពិការបានផ្ដល់អំណោយឱ្យជនមានពិការភាពជាសម្ភារៈ និងថវិកាចំនួន២១គ្រួសារ។ រីឯការងារមូលនិធិជាតិជំនួយសង្គម កម្មវិធីស្តារជីវភាពឡើងវិញសម្រាប់ប្រជាជនដែលស្ម័គ្រចិត្តផ្លាស់ប្តូរទីលំនៅពីតំបន់ឧស្យានអង្គរទៅកាន់ ក្រុងរុនតាឯកតេជោសែន និងឃុំពាក់ស្នែង នៃស្រុកអង្គរធំ ដែលមានគ្រួសារទទួលប្រាក់ឧបត្ថម្ភចំនួនជិត១ម៉ឺនគ្រួសារ ដោយឡែកក្នុងរយៈពេលប្រមាណ៥ខែ ការអនុវត្តកម្មវិធីគាំពារសង្គម ក្នុងកម្មវិធីកញ្ចប់គ្រួសារ បានជួយដល់គ្រួសារដែលមានប័ណ្ណសមធម៌ (ក្រ១ ក្រ២) ជិត៥ម៉ឺន៤ពាន់ប័ណ្ណ និងអនុវត្តកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ០២ឆ្នាំក្នុងគ្រួសារក្រីក្រ ជិត១ម៉ឺន៧ពាន់ករណី។
ក្រោយពីបានស្ដាប់របាយការណ៍របស់លោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប រួចមក ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានវាយតម្លៃខ្ពស់ ចំពោះសមិទ្ធផលការងារប្រកបដោយផ្លែផ្កាគួរជាទីមោទនៈ ដែលសម្រេចបានរយៈពេលកន្លងមក ដោយបានបញ្ជាក់ថា សមិទ្ធផលទាំងនេះកើតចេញពីការខិតខំប្រឹងប្រែងរួម របស់ថ្នាក់ដឹកនាំ និងមន្ត្រីរាជការ នៃមន្ទីរសង្គមកិច្ច សាខាមូលនិធិជាតិជំនួយសង្គម និងសាខាមូលនិធិជនពិការ ក៏ដូចជាមន្ត្រីរាជការក្រោមឱវាទទាំងអស់ ដែលបានយកចិត្តទុកដាក់ បំពេញតួនាទីភារកិច្ច សហការគ្នាបានល្អ ជាមួយរដ្ឋបាលខេត្ត ក្រុង ស្រុក ឃុំ សង្កាត់ ក្នុងការផ្តល់សេវាសង្គម កិច្ចការនានាបានល្អប្រសើរ ជូនប្រជាពលរដ្ឋ។
ឯកឧត្ដមរដ្ឋមន្ត្រី បានសង្កត់ធ្ងន់ថា មន្ត្រីទាំងអស់ត្រូវបន្តយកចិត្តទុកដាក់ និងពង្រឹងការអនុវត្តការងារនេះឱ្យបានល្អបន្តទៀត ព្រោះកិច្ចការងារនេះទាមទារឱ្យមានការយកចិត្តទុកដាក់ខ្ពស់ និងអនុវត្តជាប្រចាំ ដោយឈរលើមូលដ្ឋានផលប្រយោជន៍ប្រជាពលរដ្ឋជាធំ។
គួរឱ្យដឹងថា រាជរដ្ឋាភិបាលការបង្កើតមូលនិធិជាតិជំនួយសង្គម និងមូលនិធិជនពិការ ក្នុងគោលបំណងដើម្បីបង្ខិតសេវាឲ្យកាន់តែជិត និងងាយស្រួលសម្រាប់ជូនអ្នកទទួលផល និងជាស្ពានចម្លងមួយក្នុងការចូលរួមចំណែកលើកកម្ពស់គុណភាពជីវិត ប្រកបដោយសុខុមាលភាពសម្រាប់ប្រជាជនទូទៅឱ្យមានសុខភាពល្អ។
អត្ថបទ និងរូបភាព៖ លោកហេង វន្នី
កែសម្រួល៖ លោកហាំ ម៉េងហួត
