អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃនិងអង្គការUNHCRសហការជាមួយរដ្ឋបាលខេត្តសៀមរាប បានបើកវគ្គបណ្តុះបណ្តាលការងារអត្រានុកូលដ្ឋានស្របតាមច្បាប់ ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនិងលិខិតបទដ្ឋានគតិយុត្តក្រោមច្បាប់ពីថ្ងៃទី២១ដល់ថ្ងៃទី២២ខែវិច្ឆិកាឆ្នាំ២០២៤នៅខេត្តសៀមរាបជូនដល់មន្ត្រីអត្រានុកូលដ្ឋាន ឃុំ សង្កាត់ ស្មៀនឃុំ សង្កាត់និងមន្ត្រីទទួលបន្ទុកការងារអត្រានុកូលដ្ឋានថ្នាក់ខេត្ត ក្រុងស្រុកនៅខេត្តសៀមរាបសរុបចំនួនជាង៣០០នាក់។វគ្គបណ្តុះបណ្តាលធ្វើឡើងក្នុងគោលបំណងដើម្បីពង្រឹងនិងតម្រង់ទិសការងារចុះបញ្ជីអត្រានុកូលដ្ឋានស្របតាមច្បាប់ស្តីពីអត្រានុកូលដ្ឋានស្ថិតិអត្រានុកូលដ្ឋាននិងអត្តសញ្ញាណកម្មដល់មន្ត្រីអ្តានុកូលដ្ឋានដែលមានសមត្ថកិច្ចនិងអ្នកពាក់ព័ន្ឋឱ្យបានយល់អំពីបញ្ញតិនៃច្បាប់ដែលត្រូវយកមកអនុវត្តនិងលិតបទដ្ឋានគតិយុត្តពាក់ព័ន្ឋនឹងការឯកសារអត្រានុកូលដ្ឋានដែលនៅជាធរមានដើម្បីឆ្លើយតបទៅនឹងតម្រូវការជាក់ស្តែងជាពិសេសស្របតាមគតិយុត្តថ្មីៗដែលចេញជាបន្តបន្ទាប់។
ក្នុងនាមរដ្ឋបាលថ្នាក់ក្រោមជាតិនិងក្នុងនាមក្រុមប្រឹក្សា គណៈអភិបាលខេត្ត លោក លី សារី អភិបាលរងខេត្តតំណាង ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានសម្តែងការគាំទ្រចំពោះវគ្គបណ្តុះបណ្តាលនេះ ព្រោះពិតជាមានសារៈសំខាន់ណាស់ សម្រាប់អ្នកអនុវត្តការងារអត្រានុកូលដ្ឋានផ្ទាល់ ដើម្បីពង្រឹងសមត្ថភាព បន្ថែមទៀតដល់មន្ត្រីអត្រានុកូលដ្ឋាន ក៏ដូចជាអ្នកពាក់ព័ន្ធ នឹងការងារអត្រានុកូលដ្ឋានក្រុង ស្រុក ជាពិសេសមេឃុំ ចៅ សង្កាត់ និងស្មៀនឃុំសង្កាត់ត្រូវបន្តខិតខំយកចិត្តទុកដាក់ក្នុងការអនុវត្តការងារអត្រានុកូលដ្ឋានឱ្យបានល្អប្រសើរ ។លោកលីសារីកត់សម្គាល់ឃើញថា៖កន្លងមកបងប្អូនប្រជាពលរដ្ឋមួយចំនួនបានជួបបញ្ហាប្រឈមលើកំហុសទិន្នន័យអត្តសញ្ញាណរបស់ខ្លួននិងក្នុងគល់បញ្ជីអត្រានុកូលដ្ឋាននិងសំបុត្រអត្រានុកូលដ្ឋានជាមួយឯកសារអត្តសញ្ញាណដទៃទៀត។ទន្ទឹមនឹងនេះប្រជាពលរដ្ឋខ្លះបានចុះបញ្ជីអត្រានុកូលដ្ឋានប្រភេទតែមួយលើសពីមួយដង ដែលជាហេតុធ្វើឱ្យគាត់ជួបការលំបាកក្នុងការស្នើសុំសេវាផ្សេងៗ។ហេតុនេះសូមអំពាវនាវដល់អាជ្ញាធរមូលដ្ឋានគ្រប់ជាន់ថ្នាក់និងអ្នកពាក់ព័ន្ឋពិសេសមន្ត្រីជំនាញលើការងារអត្រានុកូលដ្ឋានទាំងអស់ត្រូវផ្សព្វផ្សាយដល់ប្រជាពលរដ្ឋឱ្យបានយល់ពីសារៈប្រយោជន៍អត្រានុកូលដ្ឋានឱ្យកាន់តែច្បាស់ថា សំបុត្រអត្រានុកូលដ្ឋានទាំងអស់មានសារៈសំខាន់កម្រិតណាសម្រាប់យើងម្នាក់ៗ ដើម្បីបង្កលក្ខណៈងាយស្រួលក្នុងការអនុវត្តការងារឱ្យមានប្រសិទ្ឋភាព ទាន់ពេលវេលា ជូនប្រជាពលរដ្ឋកាត់បន្ថយបាតុភាពនានាជាយថាហេតុ។
ឯកឧត្តម សុខ ចំរើន អគ្គនាយករង តំណាង ឯកឧត្តមឧត្តមសេនីយ៍ឯក តុប នេតអគ្គនាយក នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃមានប្រសាសន៍ថា៖ការផ្តល់សេវានៃការចុះបញ្ជីអត្រានុកូលដ្ឋានជូនប្រជាពលរដ្ឋ ឱ្យបានទាន់ពេលវេលានិង ត្រឹមត្រូវទៅតាមនីតិវិធី គឺជាការចាំបាច់ និងតម្រូវឱ្យមានការទទួលខុសត្រូវខ្ពស់ ចៀសវាងការមានកំហុសបច្ចេកទេស ឬការអាក់ខានណាមួយក្នុងការផ្តល់ជូនប្រជាពលរដ្ឋ។ ពីព្រោះ ថា សំបុត្រអត្រានុកូលដ្ឋាន មានសារៈសំខាន់ ណាស់ ពិសេសបងប្អូនប្រជាពលរដ្ឋគ្រប់រូបព្រោះវាគឺជាអត្តសញ្ញាណ សម្គាល់ខ្លួនម្នាក់ៗ។លោក សុខ ចំរើនបន្តថា៖ ការចុះសំបុត្រ អត្រានុកូលដ្ឋាន នេះធ្វើឱ្យបុគ្គលម្នាក់ៗទទួលបានសិទ្ធិ សេដ្ឋកិច្ច សង្គម នយោបាយ និងករណីយកិច្ចនានា រួមមានសិទ្ធិក្នុងការបោះឆ្នោត និងឈរឈ្មោះបោះឆ្នោត សិទ្ធិទទួលបានការអប់រំ និងការងារ សិទ្ធិទទួលបានយុត្តិធម៌ និង ការជំនុំជម្រះក្តីដោយយុត្តិធម៌ និងសិទ្ធិកាន់កាប់ កម្មសិទ្ធិ។
លោក អគ្គនាយករង បន្ថែមថា៖ចាប់តាំងពីឆ្នាំ២០០២រហូតមកដល់បច្ចុប្បន្ន ការចុះបញ្ជីអត្រានុកូលដ្ឋានបានចុះជាង២១លានបញ្ជី ក្នុងនេះមានទាំងការចុះបញ្ជីកំណើត ការចុះបញ្ជីអាពាហ៍ពិពាហ៍ ការចុះបញ្ជីមរណៈភាព ដែលនេះជាលទ្ឋផលគួរជាទីមោទនៈចំពោះការខិតខំប្រឹងប្រែងរបស់មន្ត្រីអត្រានុកូលដ្ឋានគ្រប់លំដាប់ថ្នាក់។ទន្ទឹមនឹងលទ្ឋផលនេះ តាមការកត់សម្គាល់របស់អគ្គនាយកដ្ឋានអត្តសញ្ញាណកម្មក្រសួងមហាផ្ទៃឃើញថា កន្លងមកកើតមានបញ្ហានៅឃុំសង្កាត់មួយចំនួនតូចដែលធ្វើឱ្យមានកំហុសឆ្គងទៅនឹងនីតិវិធី ការងារអត្រានុកូលដ្ឋាន ហើយកំហុសខ្លះបណ្តាលមកពីប្រជាពលរដ្ឋជាអ្នកសុំចុះបញ្ជីផងដែរដោយសារភាពស្រពិចស្រពិល ឬមិនច្បាស់របស់គាត់។លោក សុខ ចំរើនបានជំរុញដល់រដ្ឋបាលខេត្ត ក្រុងស្រុកឃុំសង្កាត់ ជំរុញការផ្សព្វផ្សាយព័ត៌មានដល់ប្រជាពលរដ្ឋដែលមានទារកទើបកើតឬប្រជាពលរដ្ឋដែលពុំទាន់មានសំបុត្រកំណើតឱ្យបានគ្រប់ៗគ្នានៅតាមឃុំសង្កាត់ និង ជួយសម្រួលនិងផ្ទៀងផ្ទាត់ឈ្មោះនិងថ្ងៃខែឆ្នាំកំណើតមុននឹងចេញឯកសារអត្រានុកូលដ្ឋានឱ្យគាត់ប្រើប្រាស់ ដើម្បីកាត់បន្ថយនូវកំហុសឆ្គងផ្សេងៗ។ល៕
