កាលពីថ្ងៃទី២៤ ខែវិច្ឆិកា ឆ្នាំ២០២៤ ម្សិលមិញនេះ ក្រុមការងាររាជរដ្ឋាភិបាលចុះមូលដ្ឋានក្រុងរុនតាឯកតេជោសែន ដឹកនាំដោយ ឯកឧត្ដម សែម រតនា អនុប្រធានក្រុមការងារ បានចុះជួបសួរសុខទុក្ខ និងនាំយកអំណោយមួយចំនួន ប្រគល់ជូនដល់គ្រួសារប្រជាពលរដ្ឋរងគ្រោះដោយសារភ្លើងឆេះផ្ទះ និងជនចាស់ជរាចំនួន ១០គ្រួសារ រស់នៅសង្កាត់រុនតាឯក ក្រុងរុនតាឯកតេជោសែន ខេត្តសៀមរាប ដើម្បីជាការជួយសម្រួលដល់ជីវភាពខ្វះខាតរបស់ពួកគាត់។
មានប្រសាសន៍ក្នុងឱកាសនោះ ឯកឧត្ដម សែម រតនា បានសម្ដែងការសោកស្ដាយ ចំពោះគ្រួសារប្រជាពលរដ្ឋដែលត្រូវបានភ្លើងឆេះផ្ទះ ធ្វើឱ្យបាត់បង់ទ្រព្យសម្បត្ដិ និងស្បៀងអាហារនានា។ គ្រួសារបងប្អូនដែលត្រូវភ្លើងឆេះផ្ទះនេះ មិនត្រឹមតែខ្វះខាតទេថែមទាំងជាស្រ្ដីមេម៉ាយមានកូនក្នុងបន្ទុកបន្ថែមទៀត។ ចំពោះអំណោយដែលបាននាំយកមកប្រគល់ជូននាពេលនេះ វានឹងអាចជួយសម្រួលដល់ជីវភាពបងប្អូនបានមួយរយៈពេល ជាពិសេសវាបានបង្ហាញពីការយកចិត្ដទុកដាក់ពីរាជរដ្ឋាបាល និងជាវប្បធម៌ចែករំលែក នៅពេលប្រជាពលរដ្ឋកំពុងជួបការលំបាក ដោយរាជរដ្ឋាភិបាល មិនទុកឱ្យប្រជាពលរដ្ឋដាច់បាយស្លាប់នោះទេ។
ឯកឧត្ដមបញ្ជាក់ថា ការនាំយកអំណោយមកផ្ដល់ជូន និងចុះសួរសុខទុក្ខពីសំណាក់ក្រុមការងារនាពេលនេះ វាក៏ជាសក្ខីភាពបញ្ជាក់ពីការយកចិត្ដទុកដាក់ពីថ្នាក់ដឹកនាំ ដោយមិនរើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។ ជាមួយនោះឯកឧត្ដម បានណែនាំដល់បងប្អូនប្រជាពលរដ្ឋត្រូវថែទាំសុខភាពឱ្យបានល្អ ខណៈដែលរដូវត្រជាក់បានមកដល់។ ចំពោះអំណោយដែលផ្ដល់ជូនណាពេលនេះ រួមមាន អង្ករ ស័ង្កសី ត្រីខ ទឹកស៊ីអ៊ីវ ប៊ីចេង អំបិល និងថវិកាមួយចំនួនទៀត៕
អត្ថបទ និងរូបថត៖ លោក ឈិត សាវី
កែសម្រួល៖ លោក អ៊ុន ណារាជ្យ
