អគារសិក្សា១ខ្នង មាន២បន្ទប់ និងបរិក្ខាសម្ភារៈសិក្សាមួយចំនួនទៀត ជាជំនួយរបស់សប្បុរសជនប្រទេសអូស្ត្រាលី ផ្តល់តាមរយៈអង្គការ Rotary club អូស្ត្រាលី និងអង្គការចក្ខុវិស័យកម្ពុជា ផ្ដល់ជូនសាលាបឋមសិក្សាដំបូកខ្ពស់ ក្នុងឃុំតាសៀម ស្រុកស្វាយលើ ខេត្តសៀមរាប ត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី២៣ ខែវិច្ឆិកា ឆ្នាំ២០២៤កន្លងទៅនេះ។
លោក អៀង ពិសិដ្ឋ អភិបាលស្រុកស្វាយលើ បានថ្លែងអំណរគុណដល់ម្ចាស់ជំនួយ និងអង្គការ Rotary club អូស្ត្រាលី និងអង្គការចក្ខុវិស័យកម្ពុជា ដែលបានបរិច្ចាគជាថវិកាផ្ទាល់ខ្លួន សម្រាប់ជួយសាងសង់អគារសិក្សាមួយខ្នងនេះ ដែលជាការរួមយ៉ាងសកម្មលើវិស័យអប់រំ សុខាភិបាល និងជួយដល់ជនរងគ្រោះ ខ្វះខាតស្បៀង ផ្តល់អណ្តូងទឹក បង្គន់អនាម័យជាដើម។ កាយវិការដ៏សប្បុរសនេះ ក្នុងន័យជួយអភិវឌ្ឍន៍វិស័យអប់រំនៅកម្ពុជា ឱ្យកាន់តែមានការរីកចម្រើន ស្របពេលដែលប្រទេសកម្ពុជាកំពុងខ្វះខាតនូវធនធានមនុស្ស ហើយការជួយអគារសិក្សានេះទៀតសោត គឺប្រៀបបានដូចជាជួយសម្រេច នូវចក្ខុវិស័យកម្ពុជា ដើម្បីឆ្លើយតបតម្រូវការប្រជាពលរដ្ឋឱ្យចំគោលដៅ សំដៅដល់ការចូលរួមអភិវឌ្ឍសេដ្ឋកិច្ចជាតិ ប្រកបដោយនិរន្តភាព កាត់បន្ថយភាពក្រីក្រ និង លើកកម្ពស់គុណភាពជីវិតរបស់ប្រជាពលរដ្ឋ។
លោកអភិបាលស្រុក មានប្រសាសន៍ថា រាជរដ្ឋាភិបាលកម្ពុជា បានចាត់ទុកការអភិវឌ្ឍមូលធនមនុស្ស គឺជាលក្ខខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ច ប្រកបដោយបរិយាបន្ន និងភាពធន់។ ហើយមូលធនមនុស្សមានគុណភាពខ្ពស់ និងសុខភាពល្អ គឺជាទ្រព្យសកម្មជាតិដ៏រឹងមាំសម្រាប់បង្កើនតម្លៃសេដ្ឋកិច្ច លើកកម្ពស់តម្លៃវប្បធម៌ និងបង្កើតគំនិតថ្មីៗសំដៅធានាចីរភាពនិងជីវភាពនៃការអភិវឌ្ឍក្នុងសង្គម និងកំណើនសេដ្ឋកិច្ចរយៈពេលឱ្យបានយូរអង្វែង។
លោក ស៊ត់ ចន្ថា នាយកប្រតិបត្តិអង្គការចក្ខុវិស័យកម្ពុជា បានឱ្យដឹងថា អគារសិក្សា១ខ្នងនេះ មាន២បន្ទប់ ធ្វើអំពីថ្ម ប្រកស័ង្កសីអុីសូឡង់ ចំណាយទឹកប្រាក់ចំណាយអស់ ៣១.២៧៣ដុល្លារ។ លោកថាកន្លងមក អង្គការចក្ខុវិស័យកម្ពុជា បម្រើផលប្រយោជន៍ជូនដល់ប្រជាពលរដ្ឋ ក្នុងភូមិសាស្ត្រស្រុកស្វាយលើ ក្នុងវិស័យអប់រំ ការផ្តល់ស្បៀងអាហារជូនដល់ប្រជាពលរដ្ឋជួបការខ្វះខាត ការសាងសង់អគារសិក្សា ជួសជុលអគារសិក្សា និងបង្គន់អនាម័យ អណ្តូងទឹកស្អាត និងសុខាភិបាលជាដើម ដែលធ្វើយ៉ាងណាសមស្របនឹងយុទ្ធសាស្ត្ររាជរដ្ឋាភិបាលកម្ពុជា ក្នុងការជំរុញវិស័យអប់រំដល់តំបន់ជនបទដាច់ស្រយាល៕
អត្ថបទ និងរូបថត៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
