អង្គការការីតាសកម្ពុជាប្រចាំខេត្តសៀមរាប នៅថ្ងៃទី២៦ ខែវិច្ឆិកា ឆ្នាំ២០២៤នេះ បានរៀបចុះសិក្ខាសាលាផ្សព្វផ្សាយលើកកម្ពស់ដ៏ទូលំទូលាយអំពីបរិយាបន្នសង្គម ដល់ជនងាយរងគ្រោះ ដែលមានជំងឺផ្លូវចិត្ត សង្គម រាយកាយ និងជំងឺរ៉ាំរៃ និងការបណ្តុះ-បណ្តាលវិជ្ជាជីវៈសម្រាប់កុមារ និងមនុស្សវ័យជំទង់ ក្រោមអធិបតីភាព លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប ដោយមានការចូលរួមពីតំណាងអង្គការការីតាសកម្ពុជា និងអ្នកពាក់ព័ន្ធជាច្រើនរូប។
លោកជំទាវ ស៊ិន ណម មានប្រសាសន៍ថា សិក្ខាសាលានាពេលនេះ បាននឹងកំពុងចូលរួមចំណែកបង្កើននូវការទំនាក់ទំនងដ៏ល្អមួយរវាងអាជ្ញាធរគ្រប់លំដាប់ថ្នាក់ និងសង្គមស៊ីវិល ក្នុងការលើកកម្ពស់ការដាក់បញ្ចូលបញ្ហា និងតម្រូវការរបស់ជនមានពិការភាពទៅក្នុងផែនការវិនិយោគឃុំ។ សិក្ខាសាលានេះ នឹងពិភាក្សាលើ ៤ចំណុចធំៗ លើប្រធានបទ សុខភាព មុខរបរ បណ្តុះបណ្តាលវិជ្ជាជីវៈ ឱកាសការងារ និងការអប់រំ។ ការងារនេះអាចធ្វើទៅបានជោគជ័យ លុះត្រាតែមានការផ្លាស់ប្តូរនូវអាកប្បកិរិយា ការរើសអើងចំពោះជនមានពិការភាព កិច្ចសហការល្អរវាង មន្រ្តី បុគ្គលិក អាជ្ញាធរ អង្គការជាតិ អន្តរជាតិ និងបងប្អូនជនមានពិការភាព។ ទោះបីជាយ៉ាងណាក៏ដោយ បញ្ហាទាំងនេះកំពុងតែបានមើលឃើញពីសំណាក់បណ្តាស្ថាប័ននានា រួមទាំងស្ថាប័នរដ្ឋ អង្គការ និងផ្នែកឯកជនទាំងឡាយបន្តិចម្តងៗ។
លោកជំទាវ ស៊ិន ណម មានប្រសាសន៍ទៀតថា ក្រសួងសង្គមកិច្ច បានផ្តល់នូវអាទិភាពដល់ការងារជនមានពិការភាព ក្នុងកម្មវិធីការងាររបស់ក្រសួង ដោយបានកសាងនូវគោលនយោបាយ និងលិខិតបទដ្ឋានជាបន្តបន្ទាប់ សំដៅពង្រឹង និងពង្រីក ការគោរពសិទ្ធិជាមូលដ្ឋានរបស់ជនមានពិការភាព។ គម្រោងគាំទ្រដល់ដំណើរការនៃការអភិវឌ្ឍមូលដ្ឋានសម្រាប់ទាំងអស់គ្នារបស់អង្គការការីតាសកម្ពុជា ក្រោមការឧបត្ថម្ភថវិកាពីរដ្ឋាភិបាលអាល្លឺម៉ង់ និងអង្គការការីតាសអាល្លឺម៉ង់ ក៏នឹងចូលរួមចំណែកយ៉ាងធំធេងក្នុងការជ្រើសរើសជនមានពិការភាព និងជនងាយរងគ្រោះឱ្យក្លាយជាអ្នកទទួលផល។
លោកជំទាវបង្ហាញក្ដីរំពឹងថា តាមរយៈសិក្ខាសាលានេះ យើងទាំងអស់គ្នាប្រាកដជាបានចូលរួមចែករំលែក និងកសាងផែនការ តាមរយៈកិច្ចពិភាក្សាជាក្រុម នាពេលបន្តិចទៀតនេះ។ ជាមួយនោះក៏សូមសំណូមពរដល់ស្ថាប័ននានា រួមទាំងស្ថាប័នរដ្ឋ អង្គការ និងផ្នែកឯកជនទាំងឡាយរួបរួមគ្នាដោយកុំឱ្យមានភាពស្ទាក់ស្ទើរ ក្នុងការដាក់បញ្ចូលបញ្ហាពិការភាព ទៅក្នុងរបៀបវារៈនៃការអភិវឌ្ឍរបស់ខ្លួនដើម្បីរួមចំណែកធ្វើយ៉ាងណា ប្រែក្លាយខ្លឹមសារនៃច្បាប់ ស្តីពីកិច្ចការពារ និងលើកកម្ពស់ សិទ្ធិជនពិការឱ្យលេចចេញជារូបរាង និងការអនុវត្តជាក់ស្តែងឱ្យខាងតែបាននាពេលអនាគត៕
អត្ថបទ រូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
