នៅព្រឹកថ្ងៃទី២៧ ខែវិច្ឆិកា ឆ្នាំ២០២៤នេះ អង្គការបន្ទាយស្រី សហការជាមួយរដ្ឋបាលខេត្តសៀមរាប និងអង្គការដៃគូ បានរៀបចំយុទ្ធនាការ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ក្រោមប្រធានបទ “រួមគ្នាបញ្ឃប់អំពើហិង្សាលើស្ត្រី ដើម្បីវឌ្ឍនភាពសង្គម និងពិភពលោក” នៅសាលាគរុកោសល្យ និងវិក្រឹតការខេត្ត ក្រោមវត្តមាន លោកជំទាវ ស៊ិន ណម សមាជិកក្រុមប្រឹក្សាខេត្តសៀមរាប ដោយមានការចូលរួមពីតំណាងមន្ទីរអង្គភាព អង្គការដៃគូ យុវជន និងប្រជាពលរដ្ឋជាច្រើនរូប។
កញ្ញា ស្តើង ភារ៉ុង នាយិកាប្រតិបត្តិនៃអង្គការបន្ទាយស្រី បានឱ្យដឹងថា យុទ្ធនាការ១៦ថ្ងៃ ត្រូវបានធ្វើឡើងចាប់ពីថ្ងៃទី២៥ ខែវិច្ឆិកា ដល់ថ្ងៃទី១០ ខែធ្នូ ដោយមានសកម្មភាពជាច្រើនដូចជា ការរត់ ជិះកង សិក្ខាសាលា វេទិកាសាធារណៈ និងកម្មវិធីតាមប្រព័ន្ធឌីជីថលនានារបស់អង្គការជាតិ អន្តរជាតិ រួមនិងក្រសួងស្ថាប័នជាដើម។ ទោះបីយុទ្ធនាការនេះ មានរយៈពេល ១៦ថ្ងៃ ក្នុងមួយឆ្នាំក៏ពិតមែន បន្តែមការចូលរួមយ៉ាងសកម្មរបស់សកម្មជនសិទ្ធិស្ត្រី អង្គការសង្គមស៊ីវិល ស្ថាប័នរដ្ឋ និងអ្នកពាក់ព័ន្ធនានា គឺតែងតែមានជាបន្ទាប់ក្នុងការរួមលើកកម្ពស់ការយល់ដឹង និងអនុវត្តសកម្មភាពនានាដែលជាផ្នែកមួយដ៏សំខាន់ក្នុងការរួមចំណែកលុបបំបាត់ហិង្សាលើស្ត្រី និងក្មេងស្រី។ ក្នុងនោះអង្គការបន្ទាយស្រី តែងធ្វើសហការជាមួយក្រសួង មន្ទីរ និងអង្គការដៃគូ ក្នុងការអនុវត្តផែនការយុទ្ធសាស្ត្ររបស់អង្គការ ដែលផ្តោតសំខាន់ទៅលើគោលដៅ៣ សំខាន់ៗ៖ ទី១.ការពង្រឹងសមត្ថភាពស្ត្រីក្នុងតួនាទីជាអ្នកដឹកនាំ ,ទី២.ការពង្រឹងសេដ្ឋកិច្ចរបស់ស្ត្រី និងទី៣.ការដោះស្រាយវិបត្តិ ហិង្សាផ្អែកលើយេនឌ័រ។
លោក កាន់ កាល នាយកប្រចាំប្រទេស អង្គការដៀកូនៀ (Diakonia) ក៏បានឱ្យដឹងថា ការសហការឧបត្ថម្ភនេះ គឺមានគោលដៅរួមមួយ ដោយចង់ឃើញអាជ្ញាធរ អង្គការដៃគូ និងអ្នកពាក់ព័ន្ធទាំងអស់ បន្តចូលរួមនៅក្នុងការបញ្ឃប់រាល់សកម្មភាពហិង្សាលើស្ត្រី និងក្មេងស្រី ដើម្បីលើកកម្ពស់ឥរិយាបថវិជ្ជមាននៅក្នុងសហគមន៍លើតួនាទីយេនឌ័រ និងជំរុញសមភាពយេនឌ័រដល់ស្រ្តីនៅកម្ពុជា។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកជំទាវ ស៊ិន ណម បានសម្ដែងការគាំទ្រ និងអរគុណ ចំពោះអង្គការដៃគូ និងអ្នកពាក់ព័ន្ធទាំងអស់ ដែលតែងតែខិតខំប្រឹងប្រែងសហការគ្នាយ៉ាងស្អិតល្មួតនៅក្នុងការបង្កើតនៅកម្មវិធី និងយុទ្ធនាការផ្សេងៗកន្លងមកនៅក្នុងខេត្ត ក្នុងគោលដៅបំផុសស្មារតីឱ្យប្រជាជនទាំងអស់បានយល់ដឹង និងចូលរួមនៅក្នុងការបញ្ឃប់អំពើហិង្សាលើស្រី និងក្មេងស្រី។ លោកជំទាវ ក៏បានជំរុញឱ្យគ្រប់អង្គការ និងដៃគូរពាក់ព័ន្ធ សូមបន្តសកម្មភាពបែបនេះបន្តទៅមុខទៀត ដើម្បីគោលដៅស្នូលរួមចំណែកក្នុងការជំរុញឱ្យសម្រេចបាននូវផែនការជាតិនៃការលើកកម្ពស់សមភាពយេនឌ័រ និងផែនការអន្តរជាតិស្តីពី ការអភិវឌ្ឍប្រកបដោយចេរភាពឆ្នាំ២០៣០៕
អត្ថបទ និងរូបថត៖ លោក ស៊ុំ គីន
កែសម្រួល៖ លោក អ៊ុន ណារាជ្យ
