អាជ្ញាធរជាតិអប្សរា គ្រោងបង្កើតវង់ទស្សនាភ្ជាប់ពីចម្លាក់មករ ទៅការដ្ឋានយកថ្មសម័យបុរាណ នៅក្នុងតំបន់ប្រាសាទបេងមាលា ស្រុកស្វាយលើ បន្ទាប់ពីបានកាយដីពង្រាបផ្លូវចាក់ដីគ្រួសក្រហមបំពេញជង្ហុកប្រវែងប្រមាណ ២គីឡូម៉ែត្រ ចាប់ពីក្បែររបងវត្តបឹងមាលា ទៅកាន់ទំនប់ទឹកមុជ ភូមិទឹកលិច ឃុំបេងមាលា ដើម្បីបង្កលក្ខណៈងាយស្រួលដល់ការធ្វើដំណើររបស់អ្នកទេសចរ ក៏ដូចជាប្រជាពលរដ្ឋដែលមានជំនឿបន់ស្រន់តាមបែបព្រហ្មញ្ញសាសនា ព្រោះថាជារៀងរាល់ថ្ងៃមានអ្នកទេសចរជាតិ និងអន្តរជាតិតិចតួច បានទៅកាន់ទីនោះដោយម៉ូតូ ឬគោយន្ត ចំពោះឡានទាបៗពិបាកចូលដល់ជាពិសេសរដូវភ្លៀងពិបាកធ្វើដំណើរ។
លោក សុខ វិសាល មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានបង្ហាញថា ការកាយពង្រាបផ្លូវ និងចាក់ដីបំពេញជង្ហុកនាពេលនេះ គ្រាន់តែបណ្តោះអាសន្នតែប៉ុណ្ណោះ ដែលទទួលបានការឧបត្ថម្ភគាំទ្រពីសប្បុរសជនជិតឆ្ងាយ សម្រាប់បង្កលក្ខណៈងាយស្រួលដល់អ្នកទេសចរដែលចង់ទៅឃើញចម្លាក់ទោលនៃសត្វមករ ព្រោះចម្លាក់នេះទើបតែបញ្ចប់ការជួសជុលជំហានទី១ នៅខែវិច្ឆិកា ឆ្នាំ២០២៤នេះ។ លោកថា ការសម្រួលផ្លូវនេះគឺក្នុងគោលបំណងពង្រីកគោលដៅទស្សនាក្នុងតំបន់ប្រាសាទបេងមាលា ឱ្យមានភាពប្រទាក់ក្រឡាគ្នាដោយការស្នើសុំការជួសជុលកែលម្អផ្លូវនេះមានប្រវែងសរុបប្រមាណ ៥គីឡូម៉ែត្រ។
អ្នកជំនាញបញ្ជាក់ថា មុនជួសជុលស្ថានភាពនៃចម្លាក់សត្វមករ ថ្មនៃដងខ្លួនបានចល័តចេញពីទីតាំងដើម នៅរាយប៉ាយជាមួយថ្មធម្មជាតិ លែងមានតួនាទីជាប្រព័ន្ធបង្ហូរបន្តទៀត ដោយសារកត្តាអាយុកាលពុំមានការថែទាំ ជាពិសេសការហូរច្រោះនៃទឹកបានបំផ្លាញគ្រឹះ និងរំកិលថ្មធម្មជាតិដែលទ្រដងខ្លួនមករជាដើម។ ការជួសជុលលើកតម្លៃចម្លាក់សត្វមករទោល ដែលមានទំហំធំ និងកម្ររួចរាល់ ភ្ញៀវទេសចរអាចមកទស្សនាស្វែងយល់ជារៀងរាល់ថ្ងៃទោះជាមិនច្រើនតែនេះក៏ជាការចាប់ផ្តើមគួរឱ្យកត់សម្គាល់ ហើយក្រោយពីជួសជុលកែលម្អផ្លូវវង់ទស្សនាមកកាន់តំបន់នេះរួច នោះនឹងមានភ្ញៀវជាតិ និងអន្តរជាតិមកទស្សនាចម្លាក់មករ និងទីតាំងយកថ្មសម័យបុរាណច្រើនជាមិនខាន។
អ្នកជំនាញដដែលក៏បានឱ្យដឹងថា ចម្លាក់សត្វមករនេះ ផ្នែកក្រៅមានទ្រង់ទ្រាយដងខ្លួននិងក្បូរក្បាច់នៅផ្នែកក្បាល តែខាងក្នុងនៃដងខ្លួនគឺប្រហោងទម្រង់ជាទរបង្ហូរទឹក ដែលមួយផ្នែកធំទៀតនៅក្នុងទំនប់នៅឡើយហើយទំនប់នេះគឺជាប្រយោជន៍ដល់ខ្មែរនៅសម័យនោះ សម្រាប់ប្រើប្រាស់ប្រចាំថ្ងៃមកស្នាក់នៅនិងធ្វើការដាប់ថ្ម អូសថ្ម យកមកសាងសង់ប្រាសាទនានានៅឯអង្គរ៕
អត្ថបទ និងរូបថត៖ លោក យូរ វង្ស
កែសម្រួល៖ លោក អ៊ុន ណារាជ្យ
