កាលពីរសៀលថ្ងៃទី២៧ ខែវិច្ឆិកា ឆ្នាំ២០២៤នេះ មនុស្សប្រមាណ៥០០នាក់ បានចូលរួមជិះកង់ ដើម្បីអបអរសាទរយុទ្ធនាការ ១៦ថ្ងៃ ដើម្បីបញ្ឃប់អំពើហិង្សាលើស្ត្រី និងក្មេងស្រី ដែលការជិះនេះ គឺចេញដំណើរពីសួនច្បារព្រះរាជដំណាក់ ក្រុងខេត្តសៀមរាប ឆ្លងកាត់បណ្ដាផ្លូវមួយចំនួនក្នុងក្រុង រហូតមកដល់ទីតាំងដើមវិញ ដែលពិធីនេះប្រព្រឹត្តិទៅក្រោមវត្តមាន លោកស្រី ម៉ននី រង្សី អភិបាលរងខេត្តសៀមរាប និងជាអនុប្រធានអចិន្ត្រៃយ៍លេខាធិការដ្ឋាន នៃគណ:កម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ) និងដោយមានការចូលរួមពីអ្នកពាក់ព័ន្ធជាច្រើនរូប។
លោកស្រី ឃឹម ពិសី នាយិកាប្រតិបត្តិអង្គការការមជ្ឈមណ្ឌលធនធានស្ត្រី បានឱ្យដឹងថា នេះជាលើកទី១១ហើយ ក្រោមកិច្ចសហការគ្នារវាងដៃគូពាក់ព័ន្ធ ក្នុងការរៀបចំយុទ្ធនាការនេះឡើង ដើម្បីបង្កើន និងលើកកម្ពស់ការយកចិត្តទុកដាក់ក្នុងការចូលរួមទប់ស្កាត់ និងឆ្លើយតបចំពោះអំពើហិង្សាទាក់ទងនឹងយេនឌ័រ ពីអ្នកពាក់ព័ន្ធទាំងអស់ ទាំងផ្នែកសាសនា សិល្បៈ និងវិស័យឯកជន ក្នុងគោលដៅលើកកម្ពស់ឥរិយាបថវិជ្ជមានរបស់សាធារណជន និងអ្នកផ្តល់សេវាចំពោះជនរងគ្រោះ ជនងាយរងគ្រោះដោយអំពើហិង្សាទាក់ទងនឹងយេនឌ័រ។
លោកស្រីនាយិកា បញ្ជាក់ថា យុទ្ធនាការនេះ ត្រូវបានរៀបចំឡើងនៅទូទាំងសកលលោក ហើយសម្រាប់ឯកសណ្ឋានអាវនៅក្នុងយុទ្ធនាការនេះ គឺចង់សំដៅទៅលើពិភពលោកមួយដែលពោរពេញទៅដោយពណ៌ទឹកក្រូច គឺជាពណ៌ដែលបញ្ឃប់រាល់សកម្មភាពនានា ដែលបង្កអំពើហិង្សាលើស្ត្រី កុមារ និងក្មេងស្រី។ លោកស្រីក៏សូមអរគុណដល់គ្រប់អ្នកពាក់ព័ន្ធ ដែលតែងតែសហការ និងគាំទ្ររាល់សកម្មភាពកន្លង ដែលបញ្ជាក់ឱ្យឃើញពីស្មារតី និងសន្ទុះក្នុងការរួមគ្នាពន្លឿនការអនុវត្តសកម្មភាព និងអនុវត្តច្បាប់ជាតិ អន្តរជាតិ ព្រមទាំងផែនការសកម្មភាពជាតិ ដើម្បីបញ្ចប់អំពើហិង្សាលើស្ត្រី និងក្មេងស្រី។
មានប្រសាសន៍ក្នុងឱកាសនោះ លោកស្រី ម៉ននី រង្សី អភិបាលរងខេត្ត សង្កត់ធ្ងន់ថា អំពើហិង្សាលើស្ត្រី និិងក្មេងស្រី គឺនៅតែបន្តកើតមាននៅក្នុងប្រទេសកម្ពុជាយ៉ាងសកម្ម។ ដូច្នេះសូមជំរុញឱ្យអង្គការនានា បង្កើនការសហការជាមួយអាជ្ញាធរពាក់ព័ន្ធ ក្នុងការផ្សព្វផ្សាយរាល់រូបភាព ឬសកម្មភាពនានា ឱ្យបានទូលំទូលាយ ក្នុងន័យដើម្បីបញ្ឃប់អំពើហិង្សានេះ ពីព្រោះថាអំពើហិង្សាលើស្ត្រី គឺមិនមែនជាវប្បធម៌របស់ខ្មែរយើងនោះទេ វាជាការរំលោភទៅលើសិទ្ធិមនុស្ស និងប៉ះពាល់ជាអវិជ្ជមានយ៉ាងខ្លាំងទៅលើធនធានស្ត្រី មិនតែប៉ុណ្ណោះកូនៗរបស់ពួកគេក៏នឹងទទួលរងនូវផលវិបាកនៃការរំលោភសិទ្ធិ និងអំពើហិង្សានេះជាបន្តបន្ទាប់ទៅអនាគតផងដែរ។
លោកស្រីសង្ឃឹមថា តាមរយៈយុទ្ធនាការមួយនេះ នឹងក្លាយជាផ្នែកមួយដ៏សំខាន់ក្នុងការបង្ហាញឱ្យសាធារណជនទូទៅបានឃើញ បានយល់ដឹង និងចូលរួមអស់គ្នាដើម្បីបញ្ឃប់អំពើហិង្សាលើស្ត្រី និងក្មេងស្រី នៅទូទាំងពិភពលោក៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
