នៅរសៀលថ្ងៃទី០២ ខែធ្នូ ឆ្នាំ២០២៤នេះ រដ្ឋបាលខេត្តសៀមរាប បានរៀបចំកិច្ចប្រជុំក្រុមការងារតាមដានដោះស្រាយ និងឆ្លើយតបចំពោះសាធារណមតិលើបណ្ដាញសង្គម ក្រោមការដឹកនាំដោយ លោក សុខ ថុល អភិបាលរងខេត្តសៀមរាប ដោយមានការចូលរួមពីលោកលោកស្រីជាតំណាងមន្ទីរអង្គភាពពាក់ព័ន្ធក្នុងខេត្តជាច្រើនរូប។
លោក សុខ ថុល មានប្រសាសន៍ថា រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី បានជំរុញការងារព័ត៌មាននិងសាធារណៈមតិ ធ្វើយ៉ាងណាឱ្យបានខ្លាំងក្លាដើម្បីឆ្លើយតបបានរហ័ស និងមានប្រសិទ្ធភាពទាំងរឿងវិជ្ជមាន និងរឿងអវិជ្ជមាន។ ជំរុញប្រសិទ្ធភាពការងារឆ្លើយតបព័ត៌មានក្លែងក្លាយ តាមរយៈការរៀបចំយន្តការឆ្លើយតបឱ្យទាន់ពេលវេលាជាប្រព័ន្ធតួអង្គតែមួយ និងបង្កើនសមត្ថភាពយុទ្ធសាស្ត្របែបឌីជីថល។
លោកបញ្ជាក់ថា យើងទាំងអស់គ្នាត្រូវតាមដានរាល់ស្ថានការណ៍ដែលកើតឡើងក្នុងដែនសមត្ថកិច្ចយើង ដើម្បីក្តាប់ឱ្យណែននូវប្រធានបទសំខាន់ៗដែលមានការចាប់អារម្មណ៍ក្នុងចំណោមប្រជាពលរដ្ឋទូទៅ ក៏ដូចជាក្នុងសហគមន៍នៅតាមតំបន់នានាក្នុងខេត្ត ដោយមិនត្រូវបណ្តោយទុកឱ្យរឿងរ៉ាវណាមួយ នៅបណ្តែតក្នុងសាធារណមតិ ជាពិសេសលើបណ្តាញទំនាក់ទំនងសង្គម រហូតអាចប៉ះពាល់ដល់សតិអារម្មណ៍របស់មហាជន និងឈានដល់ធ្វើឱ្យប៉ះពាល់ដល់ប្រយោជន៍សាធារណៈ ឬបង្កហានិភ័យនានាជាយថាហេតុ រំខានដល់ភាពសុខសាន្តក្នុងសហគមន៍ជាដាច់ខាត។
លោកអភិបាលរងខេត្ត ក៏បានណែនាំដល់មន្ទីរអង្គភាព រដ្ឋបាលក្រុងស្រុកទូទាំងខេត្ត ត្រូវយកចិត្តទុកដាក់ខ្ពស់លើការងារព័ត៌មាន និងសាធារណៈមតិ ជាពិសេសមន្ទីរព័ត៌មានខេត្ត ត្រូវពង្រឹងតួនាទីរបស់ខ្លួន ដើម្បីជាសេនាធិការរបស់រដ្ឋបាលខេត្ត ក្នុងគោលបំណងផ្សព្វផ្សាយសមិទ្ធផលការងាររបស់ខ្លួនឱ្យប្រជាពលរដ្ឋបានជ្រាបកាន់តែទូលំទូលាយ តាមរយៈការផ្សព្វផ្សាយលើបណ្តាញទំនាក់ទំនងសង្គមដែលប្រជាជននិយម ដូចជា Facebook TikTok Telegram និង YouTube ជាដើម។ ក្នុងនោះត្រូវផ្តោតជាសំខាន់លើវិស័យអាទិភាពដែលកំណត់ដោយរដ្ឋបាលខេត្ត ដើម្បីជំរុញការអភិវឌ្ឍ និងលើកកម្ពស់ជីវភាពរស់នៅប្រចាំថ្ងៃរបស់ប្រជាពលរដ្ឋ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
