នៅរសៀលថ្ងៃទី២៨ ខែវិច្ឆិកា ឆ្នាំ២០២៤នេះ លោក សេង ផល្លី ប្រធានមន្ទីរព័ត៌មានខេត្តសៀមរាបស្ដីទី បានដឹកនាំបើកកិច្ចប្រជុំដើម្បីត្រួតពិនិត្យវឌ្ឍនភាពការងារដែលអនុវត្តបានកន្លងមក និងលើកទិសដៅបន្ត ជាពិសេសផ្សព្វផ្សាយពីអនុសាសន៍ណែនាំរបស់ ឯកឧត្តមរដ្ឋមន្ត្រីក្រសួងព័ត៌មាន លើការអនុវត្តការងារប្រចាំថ្ងៃ និងការងារសំខាន់សម្រាប់ឆ្នាំ២០២៥ ធ្វើយ៉ាងណាពង្រឹងគុណភាពការងារឱ្យស្របទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា ដោយកិច្ចប្រជុំនេះដែរ ក៏មានការចូលរួមពីថ្នាក់ដឹកនាំមន្ទីរ ការិយាល័យ និងមន្ត្រីក្រោមឱវាទជាច្រើនរូប។
លោក សេង ផល្លី មានប្រសាសន៍ថា មន្ទីរព័ត៌មានខេត្តសៀមរាប ជាសេនាធិការមួយរបស់ក្រសួងព័ត៌មាន និងរដ្ឋបាលខេត្ត ហើយកំពុងមានភាពលេចធ្លោ និងបោះពួយទៅមុខជាបន្តបន្ទាប់គួរឱ្យកត់សម្គាល់។ ក្នុងនោះខេត្តសៀមរាប ជាគោលដៅរៀបចំព្រឹត្តិការណ៍ និងកម្មវិធីធំៗជាច្រើន បន្ទាប់ពីរាជធានីភ្នំពេញ។ ដូច្នេះវិស័យព័ត៌មាន មានតួនាទីយ៉ាងសំខាន់ក្នុងការជំរុញផ្សព្វផ្សាយពីព្រឹត្តិការណ៍ និងកម្មវិធីទាំងនោះទៅកាន់ថ្នាក់ដឹកនាំ និងសាធារណជនទូទៅ បានដឹងប្រកបដោយព័ត៌មានច្បាស់ការ ត្រឹមត្រូវផងដែរ។
លោក សេង ផល្លី ក៏បានរំលឹកពីអនុសាសន៍ណែនាំរបស់ ឯកឧត្តមរដ្ឋមន្ត្រី នេត្រ ភក្ត្រា ដោយបានជំរុញឱ្យគ្រប់មន្ទីរអង្គភាពទាំងអស់ ត្រូវពង្រឹង និងពង្រីកពីវិសាលភាពផ្សព្វផ្សាយ និងការងាររបស់ខ្លួនបន្ថែមទៀត ធ្វើយ៉ាងណាជំរុញឱ្យមានភាពសកម្មក្នុងការបំពេញការផ្សព្វផ្សាយពីគោលនយោបាយ សមិទ្ធផលរបស់រាជរដ្ឋាភិបាល ក៏ដូចជាសមិទ្ធផល និងការអភិវឌ្ឍនានាក្នុងខេត្តរបស់ខ្លួនដល់បងប្អូនប្រជាពលរដ្ឋ និងសាធារណជនទូទៅ។ ជាមួយនោះ ត្រូវបង្កើននូវស្មារតីទទួលខុសត្រូវខ្ពស់ក្នុងការបំពេញភារកិច្ចរបស់ខ្លួន និងត្រូវតែសកម្ម មានភាពមោះមុតនឹងការងារដោយផ្អែកលើទស្សនាទាន គឺរួមគិត រួមផ្តល់យោបល់ រួមធ្វើ និងជំរុញការផ្សព្វផ្សាយ ឆ្លើយតបឱ្យបានលឿនរហ័ស និងមានប្រសិទ្ធភាពនូវព័ត៌មានលេចធ្លោរបស់ខេត្តខ្លួនលើគ្រប់មធ្យោបាយ និងបណ្តាញផ្សព្វផ្សាយសង្គមឱ្យបានទូលំទូលាយ។ ក្នុងនោះដែរ ការងារព័ត៌មាន និងសាធារណមតិ ព្រោះវាមានភាពចាំបាច់ណាស់សម្រាប់គ្រប់គ្រងសតិអារម្មណ៍ប្រជាពលរដ្ឋក្នុងបរិបទនៃការរីកចម្រើននៃបច្ចេកវិទ្យាព័ត៌មាន ដែលក្រសួងស្ថាប័នទាំងអស់ត្រូវបង្កើនការយកចិត្តទុកដាក់ខ្ពស់បំពេញភារកិច្ចផ្សព្វផ្សាយ បំភ្លឺ និងការឆ្លើយតបបានទាន់ពេលវេលា។
ក្នុងឱកាសនោះដែរ លោកប្រធានមន្ទីរស្ដីទី ក៏បានណែនាំដល់មន្ត្រីក្រោមឱវាទ ត្រូវយកចិត្តទុកដាក់ពង្រឹងសមត្ថភាព និងតួនាទីការងាររបស់ខ្លួនបន្ថែមទៀត ធ្វើយ៉ាងណាជំរុញការផ្សព្វផ្សាយរបស់យើងឱ្យមានការរីកចម្រើន និងទូលំទូលាយជាងនេះបន្ថែមទៀត ស្របទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា ក្នុងអាណត្តិទី៧នេះ ពិសេសក្រសួងព័ត៌មាន ដែលបានកំណត់ចក្ខុវិស័យក្នុងការធ្វើឱ្យក្រសួងព័ត៌មានទៅជាស្ថាប័នទំនាក់ទំនងសាធារណៈរបស់រដ្ឋាភិបាលមួយប្រកបដោយភាពសកម្ម បុរេសកម្ម អន្តរសកម្ម គុណភាព និងប្រសិទ្ធភាពផងដែរ៕
អត្ថបទ និងរូបភាព៖ លោកអ៊ុន ណារាជ្យ និងលោក ធន់ ពូថេ
