អាជ្ញាធរស្រុកសូទ្រនិគម ខេត្តសៀមរាប បានបង្ហាញថា ការផលិតជីកំប៉ុសជន្លេន នឹងជួយជំរុញឱ្យវិស័យបរិស្ថាន អនាម័យ នៅក្នុងស្រុកកាន់តែមានភាពល្អប្រសើរ និងជួយឱ្យប្រជាពលរដ្ឋអាចផលិតនូវផលិតផលកសិកម្មដែលមានសុវត្ថិភាពផងដែរ។
ក្នុងពិធីសម្ពោធរោងកែច្នៃជីកំប៉ុសជន្លេនរបស់សហគមន៍ប្រជាពលរដ្ឋក្នុងស្រុកសូទ្រនិគម ខេត្តសៀមរាប នាព្រឹកថ្ងៃទី២៧ ខែវិច្ឆិកា ឆ្នាំ២០២៤នេះ លោក គិម វណ្ណៈ អភិបាលស្រុកសូទ្រនិគម បានបញ្ជាក់ថា ការបើកដំណើរការនូវទីតាំងផលិតជីកំប៉ុសនេះ ជាសកម្មភាពចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍ និងលើកកម្ពស់វិស័យកសិកម្ម បរិស្ថាន ហើយដំណើរការនេះក៏នឹងឱ្យសហគមន៍ទទួលបានជីសរីរាង្គ ដែលមានគុណភាព តម្លៃសមរម្យសម្រាប់សហគមន៍កសិកម្ម និងសុខមាលភាពសង្គមផងដែរ ទីតាំងផលិតជីកំប៉ុសជន្លេននេះ ក៏ជាសាលារៀនផ្តល់បទពិសោធដល់សហគមន៍ និស្សិត បានមករៀនសូត្រនាពេលអនាគតផងដែរ។
លោកអភិបាលស្រុក បានបង្ហាញក្ដីរំពឹងថា ថ្ងៃនេះជាថ្ងៃចាប់ផ្តើមដំណើរការជាផ្លូវការ ប៉ុន្តែរោងផលិតជីនេះ បានប្រមូលសំរាម ដែលអាចស្អុយរលួយនានាយកមកផលិតជាជីកំប៉ុសបានមួយចំនួនធំ។ ដូច្នេះនាពេលអនាគតទីតាំងនេះ ក៏នឹងដើរតួយ៉ាងសំខាន់បន្ថែមទៀតនៅក្នុងការជួយដល់បរិស្ថាន និងអនាម័យក្នុងស្រុកសូទ្រនិគមទាំងមូល តាមរយៈការកែច្នៃសំរាម ធ្វើជាជីកំប៉ុសនេះ។ រោងជីកំប៉ុសជន្លេននេះ ត្រូវបានបង្កើតមុនគេនៅក្នុងខេត្តសៀមរាប កាលពីដើមឆ្នាំ២០២៤ ដោយមានប្រជាពលរដ្ឋចូលរួមជាសមាជិកប្រមាណជា៥០នាក់ ក្រោមការជួយឧបត្ថម្ភគាំទ្រពីអង្គការហ្គ្រេត (Gret)។
ព័ត៌មានជាតិ ថ្មីៗ
លោកស្រី កែវ សុជាតា តំណាងអង្គការហ្គ្រេត (Gret) ប្រចាំប្រទេសកម្ពុជា បានឱ្យដឹងថា បច្ចុប្បន្នអង្គការហ្គ្រេត បាននឹងកំពុងអនុវត្តនូវ គម្រោង SMART សៀមរាប ឬការគ្រប់គ្រងសំរាម សំណល់រឹងទីប្រជុំជនប្រកបដោយនិរន្តរភាព និងប្រព័ន្ធកសិកម្មអេកូឡូស៊ី ដើម្បីភាពធន់ និងឆ្ពោះទៅកាន់ក្រុងបៃតងក្នុងខេត្តសៀមរាប ដែលបានចាប់ផ្តើមក្នុងឆ្នាំ២០២២ រហូតដល់បច្ចុប្បន្ន។ គម្រោងនេះធ្វើឡើងក្នុងគោលបំណងដើម្បីបង្កើនប្រសិទ្ធភាពនៃឧបករណ៍ផ្សព្វផ្សាយពីការប្រមូលសំរាម និងអេកូឡូស៊ី ដែលវាត្រូវបានរចនាសាកល្បង និងប្រើប្រាស់ដោយរដ្ឋបាលស្រុក និងប្រតិបត្តិករ និងរីឯគុណភាពជីកំប៉ុសត្រូវបានបញ្ជាក់តាមរយៈការធ្វើតែស្តនៅមន្ទីរពិសោធន៍ និងការអនុវត្តជាក់ស្តែង។ នៅចុងបញ្ចប់នៃគម្រោង ប្រតិបត្តិករអាចលក់យ៉ាងហោចណាស់ ៧០ភាគរយ នៃជីកំប៉ុសដែលបានផលិត។
លោកស្រី កែវ សុជាតា បន្តថា តាមរយៈការអនុវត្តកន្លងមក កិច្ចការងារទាំងអស់នេះ អាចទទួលបានជោគជ័យបាន ក៏ដោយសារមានការសហការ និងគាំទ្រពីស្ថាប័នរដ្ឋ ដៃគូអភិវឌ្ឍន៍ និងវិស័យឯកជន ដូចជារដ្ឋបាលស្រុកសូទ្រនិគម កម្មវិធីISD របស់កិច្ចសហប្រតិបត្តិការ អន្តរជាតិអាល្លឺម៉ងGIZ ក្រុមហ៊ុនស៊ីនទ្រី សហគមន៍ចំការសុវត្ថិភាព Ecofarm និងប្រធានផ្សារដំដែក។ល។ បើមិនមានការចូលរួមទេ គម្រោងនេះមិនទទួលបានជោគជ័យនោះទេ។
បើតាមតំណាងប្រជាសហគមន៍បានឱ្យដឹងថា បន្ទាប់ពីការអនុវត្តសាកល្បងបានដោយជោគជ័យគម្រោងរបស់សហគមន៍មួយនេះ នឹងជួយលើផ្នែកបរិស្ថាន ផ្នែកអនាម័យ និងសុខមាលភាព តាមរយៈការប្រមូលសំរាមដែលអាចស្អុយរលួយមកធ្វើជាចំណីសត្វជន្លេន ហើយលាមករបស់សត្វជន្លេនក៏នឹងក្លាយជាជីកំប៉ុសសម្រាប់ជួយដល់ដំណាំកសិកម្ម ដោយកសិករអាចផលិតបានកសិផលដែលមានសុវត្ថិភាព។ ទោះយ៉ាងណាតំណាងសហគមន៍ ក៏បានសំណូមពរដល់អាជ្ញាធរមូលដ្ឋានជួយគាំទ្រ និងជួយផ្សព្វផ្សាយដល់ប្រជាពលរដ្ឋបន្ថែមទៀតអំពីការទុកដាក់សំរាម ដោយធ្វើការញែកសំរាមប្លាស្ទិក និងសំរាមស្អុយរលួយចេញពីគ្នា៕
អត្ថបទ និងរូបថត៖ លោក ជា ស្រស់
កែសម្រួល៖ លោក អ៊ុន ណារាជ្យ
