កន្លងមកស្រទាប់អូហ្សូនត្រូវបានគំរាមកំហែងយ៉ាងធ្ងន់ធ្ងរ ដែលប្រឈមទៅនឹងការធ្លុះធ្លាយ បង្កឡើងដោយសារសារធាតុគីមីផ្សេងៗ ដែលយើងប្រើប្រាស់ជាប្រចាំថ្ងៃ រួមមាន៖ការប្រើប្រាស់ទូទឹកកក បរិក្ខារត្រជាក់ និងឧបករណ៍ផ្សេងៗទៀត ដែលមានផ្ទុកសារធាតុក្លរ៉ូភ្លុយអរ៉ូកាបូន (CFC) និងសារធាតុហាយដ្រូក្លរ៉ូភ្លុយអរ៉ូកាបូន (HCFC) ជាដើម។
ក្នុងកិច្ចប្រជុំផ្សព្វផ្សាយការអនុវត្តពិធីសាម៉ុងរ៉េអាល់ ស្តីពីសារធាតុបំផ្លាញស្រទាប់អូហ្សូននៅកម្ពុជា ដែលរៀបចំឡើងដោយនាយកដ្ឋានគ្រប់គ្រងគុណភាពខ្យល់ សំឡេង និងរំញ័រ នៃអគ្គនាយកដ្ឋានគាំពារបរិស្ថាន នៅមន្ទីរបរិស្ថានខេត្តសៀមរាប នៅព្រឹកថ្ងៃទី២៦ ខែវិច្ឆិកា ឆ្នាំ២០២៤នេះ លោក លោក ប៉ាក វណ្ណលី អនុប្រធាននាយកដ្ឋាន បានឱ្យដឹងថា ស្រទាប់អូហ្សូន គឺបានដើរតួយ៉ាងសំខាន់សម្រាប់ជាខែលការពារផ្ទៃផែនដីពីកាំរស្មីអ៊ុលត្រាវីយូឡេ ដែលបង្កគ្រោះថ្នាក់ពីព្រះអាទិត្យ ប្រសិនបើមានការចុះខ្សោយនៃខែលជារបាំងការពារនេះ យើងងាយនឹងកើតជំងឺមហារីកស្បែក ឡើងបាយភ្នែក និងប្រព័ន្ធការពាររាងកាយចុះខ្សោយ។
ព័ត៌មានជាតិ ថ្មីៗ
លោកបន្តថា ដោយសារកត្តាទាំងអស់នេះហើយ ទើបអគ្គនាយកដ្ឋានគាំពារបរិស្ថានបានរៀបចំកិច្ចប្រជុំនេះឡើង ដើម្បីបញ្រ្ជាបបន្ថែមដល់អាជ្ញាធរពាក់ព័ន្ធ រដ្ឋបាលថ្នាក់ក្រោមជាតិ និងម្ចាស់សេវាកម្មជួសជុលយានយន្ត និងបរិក្ខារត្រជាក់ ក្នុងគោលបំណងបង្កើនការយល់ដឹងពីសារធាតុបំផ្លាញ ស្រទាប់អូហ្សូន សារៈសំខាន់នៃស្រទាប់អូហ្សូនសម្រាប់ជីវិតលើភពផែនដី ការការពារស្រទាប់អូហ្សូន កាត់បន្ថយការកើនកម្ដៅភពផែនដី រួមចំណែកដល់ការប្រែប្រួលអាកាសធាតុ។លោកសង្ឃឹមថា អ្នកពាក់ព័ន្ធដែលបានចូលរួមនាពេលនេះ នឹងព្យាយាមស្វែងយល់ពីសារៈសំខាន់នៃការការពារស្រទាប់អូហ្សូននេះ ព្រមទាំងយកទៅផ្សព្វផ្សាយបន្តដល់សាធារណៈទូទៅឱ្យពួកគាត់បានដឹង និងចូលរួមការងារទាំងអស់គ្នា ដើម្បីសុខភាព និងភពផែនដីយើង។
បើតាម លោក ណម គឹមអ៊ន អនុប្រធានមន្ទីរបរិស្ថានខេត្តសៀមរាប បានឱ្យដឹងថា សម្រាប់ខេត្តសៀមរាប ចន្លោះពីខែវិច្ឆិកា រហូតដល់ខែឧសភា គុណភាពខ្យល់ គឺមិនសូវល្អឡើយង ដែលកត្តាទាំងនេះមានការកើនឡើងជាអាទិ៍ មកពីការបញ្ចេញ ផ្សែងពីយានយន្តប្រើប្រាស់ប្រេងម៉ាស៊ូតនិងពីចំហេះឥន្ធនៈផ្សេងៗ ភ្លើងឆេះព្រៃ ការដុតរានដីព្រៃ ការដុតវាលស្មៅ ការដុតគល់ជញ្ជាំង ការដុតសំរាម ការដុតសំណល់រឹងនៅតាមទីវាលនិង ទីលានចាក់សំណល់ ការដ្ឋានសំណង់ជាដើម។ ការបំពុលខ្យល់ទាំងនេះ គឺមានបង្កឱ្យមានផលប៉ះពាល់យ៉ាងខ្លាំងដល់ស្រទាប់អូហ្សូន និងបង្កហានិភ័យដល់សុខភាពសាធារណៈ៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
