មន្ត្រីជំនាញនៃមន្ទីរសង្គមកិច្ច បានឱ្យដឹងថា ជនមានពិការភាព គឺសំដៅចំពោះមនុស្សដែលមានពិការភាពផ្លូវកាយ ផ្លូវចិត្ត បញ្ញា ឬសតិអារម្មណ៍រយៈពេលវែង ដែលក្នុងអន្តរកម្មជាមួយឧបសគ្គផ្សេងៗ នៃអាកប្បកិរិយា និងបរិស្ថាន ដែលរារាំងដល់ការចូលរួមយ៉ាងពេញលេញ និងការរើសអើងនៅក្នុងសង្គម។
ក្នុងកម្មវិធីសន្ទនាមតិ កាលពីថ្ងៃទី២៦ ខែវិច្ឆិកា ឆ្នាំ២០២៤នេះ លោក បឹង ពេជ្រ អនុប្រធានមន្ទីរសង្គមកិច្ច អតីតយុវជន និងយុវនីតិសម្បទា ខេត្តសៀមរាប បានឱ្យដឹងថា នៅទូទាំងខេត្តសៀមរាប សម្រាប់ជនមានពិការភាពមានចំនួនប្រមាណជាង ៤ម៉ឺននាក់ ហើយក្នុងនោះពួកគាត់ គឺត្រូវបានទទួលការកំណត់អត្តសញ្ញាណជនមានពិការភាព ដែលជាផ្នែកមួយជួយសម្រួលដល់ពួកគាត់ក្នុងការទទួលបានសេវាផ្សេងនៅក្នុងសង្គម។ ទោះជាយ៉ាងណា ការទទួលបានការកំណត់អត្តសញ្ញាណជនមានពិការភាពនេះ ក៏នៅមិនទាន់មានការផ្សព្វផ្សាយទូលំទូលាយនៅឡើយ ហើយអាជ្ញាធរនៅតាមឃុំសង្កាត់មួយចំនួន ក៏នៅមិនទាន់មានការយល់ដឹងច្បាស់ អំពីលក្ខខណ្ឌមួយចំនួនពាក់ព័ន្ធនឹងពិការភាពទាំង៥ ផងដែរ។
ព័ត៌មានជាតិ ថ្មីៗ
លោកអនុប្រធានបានឱ្យដឹងទៀតថា រយៈពេលមួយឆ្នាំ ឆ្នាំ២០២៤នេះ ជនពិការដែលមកទទួលសេវាទូទៅនៅមជ្ឈមណ្ឌលស្តារនិតិសម្បទាមានចំនួន ១.០២២នាក់ ខណៈការផ្តល់សេវានេះ គឺជាការជួយសម្រួលទៅកាន់ពួកគាត់ក្នុងការរស់ប្រចាំថ្ងៃបានច្រើនប្រភេទ។ ជាមួយនោះលោកបានសំណូមពរទៅកាន់ជនមានពិការភាពទាំងអស់ មិនថានៅក្នុងខេត្ត ឬក្រៅខេត្តនោះទេ បើមានពិការភាពផ្នែកណាមួយ សូមធ្វើការទាក់ទងសួរព័ត៌មានផ្សេងៗនៅតាមឃុំសង្កាត់ដែលខ្លួនរស់នៅ ដើម្បីធ្វើការកំណត់អត្តសញ្ញាណជនមានពិការភាព ក្នុងការទទួលបានសេវាសង្គមនានា ដោយមិនមានការរើសអើងវណ្ណៈ ពណ៌សម្បុរ និងនិន្នាការនយោបាយឡើយ ឱ្យតែមានពិការភាព គឺមានទទួលកំណត់ជូនដោយឥតគិតថ្លៃ៕
អត្ថបទ៖ លោកស្រី ភី រចនា
កែសម្រួល៖ លោក អ៊ុន ណារាជ្យ
