នៅព្រឹកថ្ងៃទី២៥ ខែវិច្ឆិកា ឆ្នាំ២០២៤នេះ មន្ទីរពេទ្យកុមារអង្គរ ខេត្តសៀមរាប បានរៀបចំសន្និសីទសារព័ត៌មាន ស្ដីពីការបង្កើតយុទ្ធនាការរៃអង្គាសថវិកា “រួមគ្នាដើម្បីព្យាបាលកុមាររងរបួសធ្ងន់ធ្ងរ” ដើម្បីបន្តអភិវឌ្ឍមជ្ឈមណ្ឌលជំងឺធ្ងន់ និងរបួសប៉ះទង្គិច ដែលយុទ្ធនាការនេះ ធ្វើឡើងចាប់ពីថ្ងៃទី២៥ ខែវិច្ឆិកា ដល់ថ្ងៃទី២០ខែធ្នូ ឆ្នាំ២០២៤នេះ។
លោកសាស្ត្រាចារ្យ វេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានបញ្ជាក់ថា យុទ្ធនាការនេះមានគោលបំណងលើកកម្ពស់ការយល់ដឹងអំពីសេវាកម្មរបស់មជ្ឈមណ្ឌលព្យាបាលជំងឺធ្ងន់ និងរបួសប៉ះទង្គិច នៅមន្ទីរពេទ្យកុមារអង្គរ និងជាពិសេស គឺដើម្បីរៃអង្គាសថវិកាចំនួន ១៥០.០០០ដុល្លារអាមេរិក ដើម្បីដំណើរការមជ្ឈមណ្ឌលទាំងមូលផងដែ។ មន្ទីរពេទ្យកុមារអង្គរគឺជាមន្ទីរពេទ្យសម្រាប់កុមារគ្រប់ៗរូប និងជាអនាគតរបស់យើងទាំងអស់គ្នា ដែលនឹងបន្តរួមចំណែកដើម្បីអភិវឌ្ឍសេវាថែទាំសុខភាពដ៏មានសារៈសំខាន់ ជាមួយនឹងឧបករណ៍វេជ្ជសាស្ត្រត្រឹមត្រូវ ដើម្បីឱ្យកុមារគ្រប់រូបអាចទទួលបានការថែទាំសុខភាពប្រកបដោយគុណភាព។ ដូច្នេះសូមអំពាវនាវដល់សប្បុរសជន ក្រុមហ៊ុន អាជីវកម្ម សិល្បករ និងប្រជាជនទាំងក្នុង និងក្រៅប្រទេសទាំងអស់គ្នា ជួយគាំទ្រ ក៏ដូចជាបរិច្ចាគដល់យុទ្ធនាការរៃអង្គាសថវិកា“រួមគ្នាដើម្បីព្យាបាលកុមាររងរបួសធ្ងន់ធ្ងរ” និងជួយពួកយើងកសាងអនាគតដ៏ត្រចះត្រចង់ និងមានសុខភាពល្អសម្រាប់កុមារកម្ពុជា។
បើតាមលោកវេជ្ជបណ្ឌិត ឡេង ណារ៉ា វេជ្ជបណ្ឌិតវះកាត់នៃមន្ទីរពេទ្យកុមារអង្គរ បង្ហាញថា គ្រោះថ្នាក់អាចកើតឡើងចំពោះកុមារគ្រប់ពេលវេលា ប៉ុន្តែមរណភាព និងពិការភាពជាច្រើនអាចត្រូវបានជៀសសវាងបាន ប្រសិនបើកុមារទទួលបានការថែទាំត្រឹមត្រូវ និងទាន់ពេលវេលា។ ហើយក្នុងនោះកុមារដែលមកទទួលសេវានៅមន្ទីរពេទ្យកុមារអង្គរ ភាគច្រើនគ្មានកន្លែងណាទៀតត្រូវទៅនោះទេ ហើយយើងមិនអាចទុកពួកគេចោលបានដែរ។ ក្នុងឆ្នាំ២០២៣កន្លងមក មន្ទីរពេទ្យកុមារអង្គរបានអភិវឌ្ឍមជ្ឈមណ្ឌលព្យាបាលជំងឺធ្ងន់ និងរបួសប៉ះទង្គិចដំបូងបង្អស់របស់ខ្លួន។ មជ្ឈមណ្ឌលនេះគឺជាមជ្ឈមណ្ឌលឯកទេសដែលផ្តល់ការថែទាំ និងវះកាត់យ៉ាងទូលំទូលាយសម្រាប់អ្នកដែលមានជំងឺធ្ងន់ធ្ងរ និងរបួសប៉ះទង្គិចនានា។ មជ្ឈមណ្ឌលផ្តល់ជូននូវសេវាជាច្រើន ដូចជា ការសង្គ្រោះបន្ទាន់ ព្យាបាលជំងឺធ្ងន់ធ្ងរ ការវះកាត់ ការព្យាបាលដោយចលនា អាហារូបត្ថម្ភ និងសេ វាសង្គមកិច្ចវេជ្ជសាស្ត្រ។
ព័ត៌មានជាតិ ថ្មីៗ
លោកវេជ្ជបណ្ឌិត សរ វុទ្ធី ប្រធានផ្នែកវះកាត់របស់របស់មន្ទីរពេទ្យកុមារអង្គរ ក៏បានឱ្យដឹងដែរថា មជ្ឈមណ្ឌលព្យាបាលជំងឺធ្ងន់ និងរបួសប៉ះទង្គិច ផ្តល់ការថែទាំ និងវះកាត់ដល់កុមារដែលមានរបួសប៉ះទង្គិច ឬជំងឺដែលគំរាមកំហែងដល់អាយុជីវិត រួមមានអ្នកជំងឺដែលមកពីគ្រោះថ្នាក់ដូចជាការដួល ធ្លាក់ពីទីខ្ពស់ គ្រោះថ្នាក់ចរាចរណ៍ និងរលាកធ្ងន់ធ្ងរ។ នៅឆ្នាំ២០២៤នេះ យើងរំពឹងថានឹងផ្តល់សេវាព្យាបាល និងវះកាត់ ឱ្យកុមារបានប្រហែល ១.០៦៨នាក់ សង្គ្រោះជីវិតដល់កុមារដែលមានជំងឺធ្ងន់ចំនួន ១.៤៧៨នាក់ និងសង្គ្រោះបន្ទាន់ដល់កុមារចំនួន ១.៧២២នាក់៕
អត្ថបទ និងរូបភាព៖ មន្ត្រីមន្ទីរព័ត៌មានខេត្ត
កែសម្រួល៖ លោក អ៊ុន ណារាជ្យ
