និយ័តករមូលបត្រកម្ពុជា បានរៀបចំសិក្ខាសាលា ផ្សព្វផ្សាយពីការឈ្វែងយល់និងការវិនិយោគក្នុងទីផ្សារមូលបត្រកម្ពុជា ដល់សិស្សិត មន្ដ្រីរាជការមកពីតាមបណ្ដាអង្គភាពរបស់រដ្ឋ និងបុគ្គលិកក្រុមហ៊ុនផ្សេងៗ ដើម្បីលើកកម្ពស់ការយល់ដឹង និងផ្សព្វផ្សាយអំពីវឌ្ឍនភាពនៃវិស័យមូលបត្រនៅកម្ពុជា។សិក្ខាសាលានេះ ធ្វើឡើងនៅសាកលវិទ្យាល័យបៀលប្រាយខេត្ដសៀមរាប នាព្រឹកថ្ងៃទី២២ ខែវិច្ឆិកា ឆ្នាំ២០២៤នេះ ។
ឯកឧត្ដមបណ្ឌិត វិន ភក្ដី អគ្គនាយករង នៃនិយ័តករមូលបត្រកម្ពុជា មានប្រសាសន៍បើកសិក្ខាសាលានេះថា គឺជាកម្មវិធីដ៏ពិសេសមួយ ដើម្បីជំរុញការលើកកម្ពស់ការយល់ដឹង និងផ្សព្វផ្សាយអំពីវឌ្ឍនភាពនៃវិស័យមូលបត្រនៅកម្ពុជា ក៏ដូចជាអត្ថប្រយោជន៍នៃការវិនិយោគក្នុងវិស័យ មូលបត្រឱ្យកាន់តែទូលំទូលាយដល់គណៈគ្រប់គ្រង សាស្រ្តាចារ្យ និងនិស្សិតនៃសាកលវិទ្យាល័យ បៀល-ប្រាយ មន្រ្តីនៃរដ្ឋបាលខេត្តសៀមរាប សមាជិកនៃសភាពាណិជ្ជកម្មខេត្តសៀមរាប-ឧត្តរមានជ័យ និងសមាគមសហគ្រិនវ័យក្មេងកម្ពុជាផងដែរ។
ឯកឧត្ដមបន្ដថា បើទោះបីជាវិស័យនេះមានដំណើរការរយៈពេលជាងមួយទសវត្សរ៍ហើយក៏ដោយ ក៏វិស័យនេះហាក់នៅតែជាវិស័យថ្មីមួយសម្រាប់យើងទាំងអស់គ្នា ហើយមានសក្តានុពលនៃការរីកចម្រើនខ្ពស់ ដែលជំរុញនូវកំណើនសេដ្ឋកិច្ចជាតិតាមរយៈ ការផ្តល់នូវប្រភពនៃឱកាសសម្រាប់វិនិយោគិនខ្មែរ និងបរទេសធ្វើការវិនិយោគ។
ឯកឧត្ដមបន្ដថា អ្នកចូលរួមអាចសិក្សាស្វែងយល់នូវចំណេះដឹងថ្មីៗពាក់ព័ន្ធវិស័យមូលបត្រ ដែលនឹងផ្តោតទៅលើប្រធានបទសំខាន់ៗ មានដូចជា៖
(១) ទិដ្ឋភាពទូទៅនៃទីផ្សារមូលបត្រកម្ពុជា,
(២) អត្ថប្រយោជន៍នៃការវិនិយោគក្នុងផ្សារមូលបត្រកម្ពុជា,
(៣) ទិដ្ឋភាពទូទៅនៃទីផ្សារឧបករណ៍និស្សន្ទនៅកម្ពុជា និងបទប្បញ្ញត្តិគ្រប់គ្រង និង
(៤) ការជួញដូរឧបករណ៍និស្សន្ទនៅកម្ពុជា ដោយធ្វើបទបង្ហាញដោយមន្ត្រីជំនាញនិងក្រុមហ៊ុនមូលបត្រ ។
ឯកឧត្ដមសង្ឃឹមថា សិក្ខាកាមទាំងអស់នឹងទទួលបានពុទ្ធិបន្ថែមអំពីវិស័យមូលបត្រ និងអាចនាំយកចំណេះដឹងទាំងនេះទៅប្រើប្រាស់ និងចែករំលែកប្រកបដោយប្រសិទ្ធភាព។ឯកឧត្ដមក៍បានលើកទឹកចិត្តឱ្យនិស្សិតទាំងអស់ចាប់ផ្តើមបណ្តុះគំនិតទម្លាប់សន្សំ និងរៀនវិនិយោគ ជាពិសេសក្នុងវិស័យមូលបត្រ ដើម្បីក្លាយខ្លួនជាចំណែកនៃការអភិវឌ្ឍវិស័យមូលបត្រ អភិវឌ្ឍនូវចំណេះដឹងហិរញ្ញវត្ថុរបស់ខ្លួន និងលើកកម្ពស់សេដ្ឋកិច្ចនៅកម្ពុជាឱ្យកាន់តែរីកចម្រើនឡើងបន្ថែមទៀត។
ឯកឧត្ដមបន្ថែមថា ការលើកកម្ពស់ការយល់ដឹង និងការអភិវឌ្ឍធនធានមនុស្ស គឺជាការងារអាទិភាពមួយក្នុងចំណោមការងារអាទិភាពផ្សេងទៀតដែលបានកំណត់ ព្រោះថាវិស័យមូលបត្រនឹងមិនអាចរីកចម្រើនបានលឿននោះទេ ប្រសិនបើការយល់ដឹងពីវិស័យនេះនៅមានកម្រិតទាបនៅឡើយ។ ការលើកកម្ពស់ការយល់ដឹងពីវិស័យមូលបត្រ ត្រូវបានកំណត់យ៉ាងច្បាស់នៅក្នុង “ផែនការយុទ្ធសាស្ត្រជាតិ”។ ទីផ្សារមូលបត្រ គឺជាប្រភពនៃឱកាសសម្រាប់យើងគ្រប់គ្នា ជាប្រភពនៃឱកាសសម្រាប់ការសិក្សារៀនសូត្រនៅក្នុងការគ្រប់គ្រងហិរញ្ញវត្ថុ និងការវិនិយោគ, ជាប្រភពនៃឱកាសសម្រាប់ធ្វើពិពិធកម្មវិនិយោគដើម្បីបង្កើនចំណូលអកម្ម និងកាត់បន្ថយហានិភ័យ និងជាប្រភពនៃឱកាសសម្រាប់សហគ្រាសអាជីវកម្មនៅក្នុងការកៀរគរដើមទុន ដើម្បីពង្រីកអាជីវកម្ម ព្រមជាមួយនឹងកេរ្តិ៍ឈ្មោះល្អ។តាមរយៈទីផ្សារមូលបត្រគឺជាជម្រើសមួយសម្រាប់ធ្វើការវិនិយោគលើផលិតផលសំខាន់ៗ ចំនួន ៤ ដែលមានស្រាប់នៅក្នុងទីផ្សារ រួមមានមូលបត្រកម្មសិទ្ធិ ឬហៅថាភាគហ៊ុន និងមូលបត្របំណុល ឬហៅថាសញ្ញាបណ្ណ, ឧបករណ៍និស្សន្ទ និងឯកតាមូលនិធិនៃគម្រោងវិនិយោគរួម ដែលការវិនិយោគលើផលិតផលទាំងនេះ គឺទទួលបានអត្ថប្រយោជន៍។
សូមរំលឹកថា ក្នុងរយៈពេលជាងមួយទស្សវត្សរ៍កន្លងមកនេះ និយ័តករមូលបត្រកម្ពុជា(ន.ម.ក.) ដែលជាអាជ្ញាធរគ្រប់គ្រងត្រួតពិនិត្យ និងអភិវឌ្ឍន៍ទីផ្សារមូលបត្រ បានខិតខំយកចិត្តទុកដាក់ ដោយចាប់ផ្តើមពីចំណុចសូន្យរហូតដល់ពេលនេះ មានក្រុមហ៊ុនចំនួន ២៣ បោះផ្សាយលក់មូលបត្រ និងចុះបញ្ជីលក់មូលបត្រនៅផ្សារមូលបត្រកម្ពុជា ។ គិតមកដល់ថ្ងៃនេះ ន.ម.ក. បានផ្តល់អាជ្ញាបណ្ណ ការអនុញ្ញាត និងការទទួលស្គាល់ដល់ក្រុមហ៊ុនធ្វើអាជីវកម្ម និងផ្តល់សេវាក្នុងវិស័យមូលបត្រចំនួន ១៣១ ក្រុមហ៊ុន។
អត្ថបទ និងរូបភាព៖ លោកឈិត សាវី
កែសម្រួល៖ លោកហាំ ម៉េងហួត
