អាជ្ញាធរខេត្តសៀមរាប បានជំរុញដល់អាជ្ញាធរមូលដ្ឋានគ្រប់ជាន់ថ្នាក់ និងអ្នកពាក់ព័ន្ធ ពិសេសមន្ត្រីជំនាញត្រូវផ្សព្វផ្សាយឱ្យប្រជាពលរដ្ឋយល់ពីសារៈប្រយោជន៍នៃអត្រានុកូលដ្ឋានឱ្យច្បាស់ ថាសំបុត្រអត្រានុកូលដ្ឋានទាំងអស់មានសារៈសំខាន់កម្រិតណាសម្រាប់យើងម្នាក់ៗ ដើម្បីបង្កលក្ខណៈងាយស្រួលក្នុងការអនុវត្តការងារឱ្យមានប្រសិទ្ធភាព ទាន់ពេលវេលា ជូនប្រជាពលរដ្ឋកាត់បន្ថយបាតុភាពនានាជាយថាហេតុ។
ក្នុងឱកាសបើកវគ្គបណ្តុះបណ្តាលការងារអត្រានុកូលដ្ឋានស្របតាមច្បាប់ ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម និងលិខិតបទដ្ឋានគតិយុត្តក្រោមច្បាប់ ជូនដល់អ្នកពាក់ព័ន្ធក្នុងខេត្តសៀមរាប ដែលមានរយៈពេលពីរថ្ងៃ ចាប់ពីថ្ងៃទី២១-២២ ខែវិច្ឆិកា ឆ្នាំ២០២៤នេះ លោក លី សារី អភិបាលរងខេត្ត មានប្រសាសន៍ថា វគ្គបណ្តុះបណ្តាលនេះពិតជាមានសារៈសំខាន់ណាស់ ដើម្បីពង្រឹងសមត្ថភាពដល់អ្នកអនុវត្តផ្ទាល់។ ជាពិសេសអាជ្ញាធរមូលដ្ឋានត្រូវបន្តយកចិត្តទុកដាក់ក្នុងការអនុវត្តការងារ ជំរុញការចុះបញ្ជីអត្រានុកូលដ្ឋានជូនប្រជាពលរដ្ឋឱ្យបានត្រឹមត្រូវ ស្របតាមបទដ្ឋាន គតិយុត្តពាក់ព័ន្ធ និងសេចក្តីណែនាំស្តីពីអត្រានុកូលដ្ឋាន ដើម្បីឱ្យការអនុវត្តច្បាប់ដ៏សំខាន់មួយនេះកាន់តែមានប្រសិទ្ធភាព បន្ទាប់ពីច្បាប់ថ្មីចូលជាធរមានកាលពីថ្ងៃទី០១ ខែកក្កដា ឆ្នាំ២០២៤កន្លងទៅ។
លោកអភិបាលរងខេត្ត ក៏បានឱ្យដឹងថា កន្លងមកប្រជាពលរដ្ឋមួយចំនួនបានជួបបញ្ហាប្រឈមលើកំហុសទិន្នន័យអត្តសញ្ញាណរបស់ខ្លួន និងក្នុងគល់បញ្ជីអត្រានុកូលដ្ឋាន និងសំបុត្រអត្រានុកូលដ្ឋាន ជាមួយឯកសារអត្តសញ្ញាណដទៃទៀត។ ទន្ទឹមនឹងនេះប្រជាពលរដ្ឋខ្លះបានចុះបញ្ជីអត្រានុកូលដ្ឋានប្រភេទតែមួយលើសពីមួយដង ដែលជាហេតុធ្វើឱ្យគាត់ជួបការលំបាកក្នុងការស្នើសុំសេវាផ្សេងៗ។
លោក សុខ ចំរើន អគ្គនាយករង នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ មានប្រសាសន៍ថា ការផ្តល់សេវាចុះបញ្ជីអត្រានុកូលដ្ឋានជូនប្រជាពលរដ្ឋបានទាន់ពេលវេលា និងត្រឹមត្រូវ គឺជាការចាំបាច់ និងតម្រូវឱ្យមានការទទួលខុសត្រូវខ្ពស់ ចៀសវាងមានកំហុសបច្ចេកទេស ឬអាក់ខានក្នុងការផ្តល់ជូនប្រជាពលរដ្ឋ ពីព្រោះសំបុត្រអត្រានុកូលដ្ឋានមានសារៈសំខាន់ណាស់ ពិសេសបងប្អូនប្រជាពលរដ្ឋម្នាក់ៗ។ ការចុះសំបុត្រអត្រានុកូលដ្ឋាននេះធ្វើឱ្យបុគ្គលម្នាក់ៗទទួលបានសិទ្ធិ សេដ្ឋកិច្ច សង្គម នយោបាយ និងករណីយកិច្ចនានា រួមមានសិទ្ធិក្នុងការបោះឆ្នោត និងឈរឈ្មោះបោះឆ្នោត សិទ្ធិទទួលបានការអប់រំ និងការងារ សិទ្ធិទទួលបានយុត្តិធម៌ និងការជំនុំជម្រះក្តីដោយយុត្តិធម៌ និងសិទ្ធិកាន់កាប់កម្មសិទ្ធិ។
លោក សុខ ចំរើន បានឱ្យដឹងថា ចាប់តាំងពីឆ្នាំ២០០២ ដល់បច្ចុប្បន្ន ការចុះបញ្ជីអត្រានុកូលដ្ឋានមន្ត្រីជំនាញបានចុះជាង ២១លានបញ្ជី ដូចជាការចុះបញ្ជីកំណើត បញ្ជីអាពាហ៍ពិពាហ៍ បញ្ជីមរណភាព។ ទន្ទឹមនឹងលទ្ធផលនេះ យើងពិនិត្យឃើញថា កន្លងមកកើតមានបញ្ហានៅឃុំសង្កាត់មួយចំនួនតូចដែលធ្វើឱ្យមានកំហុសឆ្គងទៅនឹងនីតិវិធី ហើយកំហុសខ្លះមកពីប្រជាពលរដ្ឋជាអ្នកសុំចុះបញ្ជី មានភាពស្រពិចស្រពិល ឬមិនច្បាស់របស់គាត់។ លោកបានជំរុញដល់អាជ្ញាធរគ្រប់ជាន់ថ្នាក់ ជំរុញការផ្សព្វផ្សាយព័ត៌មាន និងណែនាំឱ្យប្រជាពលរដ្ឋទៅចុះឈ្មោះក្នុងបញ្ជីអត្រានុកូលដ្ឋាននៅប៉ុស្តិ៍នគរបាល ជួយសម្រួល និងផ្ទៀងផ្ទាត់ឈ្មោះ និងថ្ងៃខែឆ្នាំកំណើត មុននឹងចេញឯកសារអត្រានុកូលដ្ឋានឱ្យគាត់ប្រើប្រាស់ ដើម្បីកាត់បន្ថយនូវកំហុសឆ្គងផ្សេងៗ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
