នាព្រឹកថ្ងៃទី១៩ ខែវិច្ឆិកា ឆ្នាំ២០២៤ ឯកឧត្តម សុខ សូកេន តំណាងគណបក្សប្រជាជនកម្ពុជាក្នុងយុវជន IDC-CDI និងជារដ្ឋមន្រ្តីក្រសួងអធិការកិច្ចកម្ពុជា បានដឹកនាំគណៈប្រតិភូជាន់ខ្ពស់ប្រមាណជិត ១០០រូប មកពី ២៤គណបក្ស ២២ប្រទេស ក្នុងទ្វីបទាំង៥ នៃកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ IDC-CDI អញ្ជើញធ្វើទស្សនកិច្ចនៅតំបន់បេតិកភណ្ឌប្រវត្តិសាស្រ្តអង្គរ នៃខេត្តសៀមរាប បន្ទាប់ពីកិច្ចប្រជុំត្រូវបានបញ្ចប់កាលពីម្សិលមិញ។
បើតាមមមន្ត្រីរៀបចំកម្មវិធីបានឱ្យដឹងថា ការរៀបចំដំណើរទស្សនកិច្ចមកកាន់តំបន់រមណីដ្ឋានអង្គរនាពេលនេះ គឺដើម្បីបង្ហាញដល់ប្រតិភូបរទេសទាំងអស់ ឱ្យបានដឹង និងស្គាល់ពីសម្បត្តិបេតិកភណ្ឌប្រវត្តិសាស្រ្តរបស់ខ្មែរយើង ដែលជាស្នាដៃដ៏ធំអស្ចារ្យ និងមានឈ្មោះល្បីល្បាញរន្ទឺសុះសាយ ទៅគ្រប់ទិសទីលើពិភពលោក ជាប្រាសាទដែលនៅគង់វង្សល្អបំផុតតែមួយគត់ ដែលបានបន្សល់ទុកនូវមជ្ឈមណ្ឌលសាសនាដ៏សំខាន់មួយចាប់តាំងពីមូលដ្ឋានគ្រឹះរបស់ខ្លួន ស្ថិតនៅក្នុងរចនាបថបុរាណជាន់ខ្ពស់កំពូលនៃស្ថាបត្យកម្មខ្មែរ បានក្លាយជានិមិត្តរូបកម្ពុជា ដែលរំលេចលើទង់ជាតិរបស់ប្រទេស ជារូបភាពតំណាងប្រទេសជាតិខ្មែរ។
មន្ត្រីដដែលបន្តថា ការប្រព្រឹត្តទៅនូវកិច្ចប្រជុំ IDC-CDI នៅខេត្តសៀមរាប វាបានផ្តល់ឱកាសដ៏ពិសេស ដើម្បីជាការបង្ហាញ និងផ្សព្វផ្សាយពីភាពលេចធ្លោដ៏សម្បូរបែប ទាំងអរិយធម៌បុរាណ កេរដំណែលបេតិកភណ្ឌប្រវត្តិសាស្រ្ត តំបន់ទេសចរណ៍ នៃវប្បធម៌ ប្រពៃណីចម្រុះ របស់ប្រទេសកម្ពុជា ទៅកាន់ពិភពលោក ជាការលើកកម្ពស់ការយល់ដឹង និងការអត់ឱនជាអន្តរវប្បធម៌ ក៏ដូចជាការទទួលយកភាពចម្រុះដោយការគោរពគ្នាទៅវិញទៅមក គឺពិតជាចាំបាច់សម្រាប់ការរក្សាការបង្រួបបង្រួម ដើម្បីរក្សាសហត្ថិភាពដោយសន្តិភាព និងសម្រាប់ការរក្សាសន្តិភាព និងស្ថិរភាព។
ព័ត៌មានជាតិ ថ្មីៗ
សូមបញ្ជាក់ថា បន្ទាប់ពីកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ IDC-CDI ត្រូវបានបញ្ចប់ គណៈប្រតិភូពាក់ព័ន្ធនឹងអញ្ជើញបន្តចូលរួមកិច្ចប្រជុំមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាសុី ICAPP លើកទី១២ និងកិច្ចប្រជុំពាក់ព័ន្ធ ដែលនឹងប្រព្រឹត្តទៅពីថ្ងៃទី២១-២៤ ខែវិច្ឆិកា ឆ្នាំ២០២៤ នៅរាជធានីភ្នំពេញ ផងដែរ៕
អត្ថបទ៖ លោក អ៊ុន ណារាជ្យ
រូបថត៖ លោក ធន់ ពូថេ
