នៅថ្ងៃទី១៩ ខែវិច្ឆិកា ឆ្នាំ២០២៤នេះ វិទ្យាស្ថានជាតិស្ថិតិ នៃក្រសួងផែនការ សហការជាមួយមន្ទីរផែនការខេត្តសៀមរាប បានរៀបចំសិក្ខាសាលាផ្សព្វផ្សាយរបាយការណ៍ ស្តីពីលទ្ធផលអង្កេតនវានុវត្តន៍រាជធានីខេត្តនៅកម្ពុជាឆ្នាំ២០២២ ក្រោមអធិបតីភាព ឯកឧត្តម ខៀវ សារី អនុរដ្ឋលេខាធិការក្រសួងផែនការ ដោយមានការចូលរួមពី លោក សុខ ថុល អភិបាលរងខេត្តសៀមរាប ប្រតិភូអមដំណើរ មន្ទីរអង្គភាពពាក់ព័ន្ធ រួមនិងវិស័យឯកជនជាច្រើនរូប។
លោក សុខ ថុល អភិបាលរងខេត្ត មានប្រសាសន៍ថា ការអង្កេតនវានុវត្តន៍២០២២ គឺដើម្បីឆ្លើយតបទៅនឹងការកើនឡើងនៃតម្រូវការរបស់ប្រទេសជាតិ ក្នុងការប្រកួតប្រជែងក្នុងតំបន់ និងសកលលោកកាន់តែខ្លាំង ដែលជំរុញយើងត្រូវរួមគ្នាខិតខំអភិវឌ្ឍវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ឱ្យបានជាកម្លាំងជំរុញ និងជាកាតាលីករសម្រាប់ជួយឱ្យសម្រេចបាននូវតម្រូវការអភិវឌ្ឍ ស្របទៅនឹងគោលនយោបាយជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២០-២០៣០ ឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។
លោក ឡាយ ឆាន អគ្គនាយករងវិទ្យាស្ថានជាតិស្ថិតិ បានឱ្យដឹងថា អង្កេតនវានុវត្តន៍ គឺជាការអង្កេតលើកដំបូងនៅកម្ពុជា កាលពីឆ្នាំ២០២២ ដោយវិទ្យាស្ថានជាតិស្ថិតិ និងក្រសួងផែនការ ដោយជ្រើសរើសខេត្តចំនួន៣ សម្រាប់ធ្វើអង្កេតនេះ មានរាជធានីភ្នំពេញ ខេត្តសៀមរាប និងខេត្តព្រះសីហនុ ហើយត្រូវបានទទួលស្គាល់ថា ជាកត្តាចម្បងក្នុងការជំរុញប្រទេសជាតិមួយ ឱ្យក្លាយជាប្រទេសអភិវឌ្ឍន៍។ ក្នុងន័យនេះ កម្ពុជាត្រូវការនវានុវត្តន៍ជាកម្លាំងនាំមុខសម្រាប់បង្កើនសន្ទុះនៃការអភិវឌ្ឍសេដ្ឋកិច្ចសង្គម ការបង្កើនផលិតភាព ការបង្ហាញពីគំនិត និងផលិតផលថ្មីនៅទីផ្សារ ជួយដោះស្រាយបញ្ហាការកាត់បន្ថយថ្លៃដើម ប្រព័ន្ធដំណើរការលឿន ឬប្រសើរជាងមុន ធ្វើឱ្យរចនាសម្ព័ន្ធគ្រប់គ្រងប្រសើរឡើងតាមការអភិវឌ្ឍប្រព័ន្ធថ្មី និងការរក្សានិរន្តរភាពកំណើនរយៈពេលវែង។
ព័ត៌មានជាតិ ថ្មីៗ
ជាមួយគ្នានោះ ឯកឧត្តម ខៀវ សារី អនុរដ្ឋលេខាធិការក្រសួងផែនការ មានប្រសាសន៍បញ្ជាក់ថា ការធ្វើអង្កេតស្តីពីនវានុវត្តន៍ វាគឺជាកូនសោគន្លឹះសម្រាប់វិស័យកម្មន្តសាល និងវិស័យសេវាកម្ម ដើម្បីទទួលបាននូវឧត្តមភាពក្នុងការប្រកួតប្រជែងជាសាកលដែលកំពុងរីកចម្រើន។ ការធ្វើអង្កេតមានគោលបំណង ប្រមូលទិន្នន័យ ចងក្រង និងផ្សព្វផ្សាយព័ត៌មានអំពីនវានុវត្តន៍ នៃផលិតផល វិធីសាស្ត្រ រចនាសម្ព័ន្ធ និងទីផ្សារ រួមទាំងការស្រាវជ្រាវនិងអភិវឌ្ឍន៍ នឹងជាភ្នែកមួយសំខាន់ជួយឱ្យរាជរដ្ឋាភិបាលនិងស្ថាប័នដទៃទៀត មានការយល់ដឹងអំពីនវានុវត្តន៍នៃគ្រឹះស្ថានធុរកិច្ចនៅក្នុងប្រទេសកម្ពុជា ការរីកចម្រើនផ្នែកបច្ចេកវិទ្យា ឌីជីថលភាវូបនីយកម្ម ពិសេសផ្តល់នូវកាលានុវត្តភាពថ្មីក្នុងការបង្កើតមុខរបរ និងធុរកិច្ចថ្មីៗជាច្រើនបន្ថែមទៀត ព្រមទាំងជំរុញល្បឿននៃការអភិវឌ្ឍសេដ្ឋកិច្ច និងសង្គមឌីជីថលនៅកម្ពុជាផងដែរ៕
អត្ថបទ និងរូបថត៖ លោក ស៊ុំ គីន
កែសម្រួល៖ លោក អ៊ុន ណារាជ្យ
