បន្ទាប់ពីជំនួបរវាងឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងគណៈប្រតិភូ នៃនាយកដ្ឋានព័ត៌មាន ការិយាល័យកិច្ចសហប្រតិបត្តិការយោធាអន្តរជាតិ នៃគណៈកម្មាធិការយោធាមជ្ឈិមចិន នៅរាជធានីភ្នំពេញ នៅរសៀលថ្ងៃទី៩ ខែវិច្ឆិកានេះ លោក វរសេនីយ៍ឯក អូ ឈាន (Wu Qian) បានដឹកនាំគណៈប្រតិភូ មកកាន់ខេត្តសៀមរាប និងមានការសម្របសម្រួលពីក្រសួងការពារជាតិ ដោយលោកឧត្តមសេនីយ៍ត្រី គឹម អ៊ុក នាយករងនាយកដ្ឋានព័ត៌មាន។
អញ្ជើញជាអធិបតីក្នុងឱកាសនោះ ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងទទួលបន្ទុកមន្ទីរព័ត៌មានខេត្តសៀមរាប បានបង្ហាញការស្វាគមន៍យ៉ាងកក់ក្ដៅ ចំពោះការអញ្ជើញមកទស្សនកិច្ចនៅមន្ទីរព័ត៌មានខេត្តសៀមរាប ដោយឯកឧត្តមបញ្ជាក់ថា ជំនួបជាលើកដំបូងនេះ នឹងក្លាយជាស្ពាននៃទំនាក់ទំនងរវាងនាយកដ្ឋានព័ត៌មាន ការិយាល័យកិច្ចសហប្រតិបត្តិការយោធាអន្តរជាតិ ចិន និងខេត្តសៀមរាប។
ជាមួយនោះ ឯកឧត្តម ជា ច័ន្ទបរិបូរណ៍ ក៏បានថ្លែងអំណរគុណដល់មិត្តចិន ដែលតែងតែបានជួយជ្រោមជ្រែងលើការអភិវឌ្ឍធំៗជាច្រើននៅកម្ពុជា ជាក់ស្ដែងនៅខេត្តសៀមរាប ដែលមានអាកាសយានដ្ឋានអន្តរជាតិសៀមរាប អង្គរ ជាដើម។ ក្នុងនោះ ឯកឧត្តម ក៏សង្ឃឹមថា មិត្តចិន ក៏នឹងអាចសិក្សាស្វែងយល់ពីវិស័យព័ត៌មាន និងសោតទស្សន៍ នៅក្នុងខេត្តសៀមរាប និងបង្កើតឱ្យមានកិច្ចសហការតាមរយៈក្រសួងព័ត៌មានផងដែរ។
មានប្រសាសន៍ក្នុងជំនួបនោះ លោក វរសេនីយ៍ឯក អ៊ូ ឈាន (Wu Qian) នាយក នៃនាយកដ្ឋានព័ត៌មាន ការិយាល័យកិច្ចសហប្រតិបត្តិការយោធាអន្តរជាតិ នៃគណៈកម្មាធិការយោធាមជ្ឈិមចិន បានបង្ហាញនូវចិត្តសប្បាយរីករាយ ក្នុងឱកាសមកធ្វើទស្សនកិច្ចក្នុងខេត្តសៀមរាប ដែលជាខេត្តទេសចរណ៍ដ៏ធំរបស់កម្ពុជា។ នៅថ្ងៃនេះដែរ លោក និងគណៈប្រតិភូ សូមចូលរួមអបអរ នៅឱកាសបុណ្យឯករាជ្យជាតិរបស់កម្ពុជា។ ជាមួយនោះ លោក វរសេនីយ៍ឯក អ៊ូ ឈាន ក៏ចង់ស្វែងយល់ពីប្រព័ន្ធផ្សព្វផ្សាយក្នុងខេត្តសៀមរាប ជាពិសេសមន្ទីរព័ត៌មាន ក៏ដូចជាដំណើរការនៃការប្រមូលព័ត៌មានក្នុងមូលដ្ឋាន ដើម្បីជាប្រយោជន៍សម្រាប់សាធារណជនទូទៅ។
បន្ទាប់ពីការបង្ហាញពីស្ថានភាពទូទៅ នៃប្រព័ន្ធផ្សព្វផ្សាយក្នុងខេត្ត ថ្នាក់ដឹកនាំ នៃមន្ទីរព័ត៌មានខេត្តសៀមរាប បានធ្វើបទបង្ហាញផ្ទាល់នៅក្នុងបន្ទប់ផ្សាយវិទ្យុ និងទូរទស្សន៍ ជូនគណៈប្រតិភូចិន និង ក្រសួងការពារជាតិកម្ពុជា នៃដំណើរការផលិតកម្មវិធីផ្សាយផ្ទាល់ប្រចាំថ្ងៃ និងការផលិតព័ត៌មានប្រចាំថ្ងៃនៅតាមមូលដ្ឋាន នៃក្រុង ស្រុកទាំង១៣ របស់ខេត្តផងដែរ។
