កាលពីថ្ងៃទី០៥ ខែវិច្ឆិកា ឆ្នាំ២០២៤កន្លងទៅនេះ លោកជំទាវ សុខ ណារ៉ូ ពៅ ហេង អនុប្រធានក្រុមការងារឥស្សរជនឆ្នើមថ្នាក់ជាតិសាខាខេត្តសៀមរាប និងសហការី បានអញ្ជើញជួបសួរសុខទុក្ខ និងនាំយកអំណោយផ្ដល់ជូនដល់គ្រួសារស្រ្ដីកូនតូចក្រីក្រចំនួន ៨គ្រួសារ រស់នៅក្នុងស្រុកសូទ្រនិគម ខេត្តសៀមរាប ដោយអំណោយក្នុង១គ្រួសារៗ ទទួលបាន ឃីត១កញ្ចប់ អង្ករ៣០គីឡូក្រាម សម្ភារៈទារក១កញ្ចប់ ក្រមាពោះគោធំ១ សាប៊ូក្រអូប២ដុំ មី១កេស ទឹកស៊ីអុីវ១យួរ ត្រីខ១យួរ អំបិល១គីឡូក្រាម និងថវិកា៥ម៉ឺនរៀល។
មានប្រសាសន៍ក្នុងឱកាសនោះ លោកជំទាវ សុខ ណារ៉ូ ពៅ ហេង បាននាំនូវការផ្ដាំផ្ញើ សួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្ដម ប្រាក់ សោភ័ណ ប្រធានគណៈកម្មាធិការសាខា ដែលតែងតែយកចិត្តទុកដាក់ ចំពោះប្រជាពលរដ្ឋគ្រប់រូប ដោយមិនប្រកាន់ វណ្ណៈ ពូជសាសន៍ ជំនឿសាសនា ឬនិន្នាការនយោបាយណាមួយឡើយ។ ជាពិសេសក្នុងនាមសម្ដេចជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ សម្ដេចបានគិតគូរខ្ពស់ចំពោះមាតា និងទារកក្រីក្រ ងាយរងគ្រោះនៅក្នុងសហគមន៍។
លោកជំទាវក៏បានក្រើនរំលឹកស្ត្រីជាមាតាដែលមានកូនតូច និងមានផ្ទៃពោះ ពេលមានផ្ទៃពោះត្រូវទៅពិនិត្យសុខភាពយ៉ាងតិច៤ដងមុនសម្រាល, ក្រោយសម្រាលកូនរួចសូមស្រ្តីជាមាតាទៅពិនិត្យសុខភាព និងនាំកូនទៅចាក់វ៉ាក់សាំង១១មុខ តាមពេលវេលាកំណត់ និងតាមដានការរីកលូតលាស់របស់ទារកនៅមណ្ឌលសុខភាព, សូមយកកូនទៅមន្ទីរពេទ្យភ្លាមនៅពេលឃើញសញ្ញាគ្រោះថ្នាក់ណាមួយ នៃជំងឺរលាកផ្លូវដង្ហើម រាក ឬជំងឺផ្សេងៗទៀត។ល។ និងសូមនាំកុមារីអាយុ៩ឆ្នាំ ទៅទទួលការចាក់វ៉ាក់សាំងបង្ការជំងឺមហារីកមាត់ស្បូនឱ្យបានគ្រប់គ្នា៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
