នៅថ្ងៃទី០៥ ខែវិច្ឆិកា ឆ្នាំ២០២៤នេះ គណៈកម្មការក្រុមប្រឹក្សាសកម្មភាពជនពិការខេត្ដសៀមរាប បានបើកកិច្ចប្រជុំគណ:កម្មការក្រុមប្រឹក្សាសកម្មភាពជនពិការ និងកិច្ចប្រជុំពិភាក្សាបន្ថែមដល់ការចុះឈ្មោះជនមានពិការភាពជាសមាជិកគ្រួសារក្នុងបណ្ណសមធម៌ ដឹកនាំដោយ លោក នាក់ ណេរ៉ុន អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
យោងតាមរបាយការណ៍របស់ក្រុមប្រឹក្សាសកម្មភាពជនពិការភាពខេត្ដ បង្ហាញថា គិតត្រឹមខែតុលា ឆ្នាំ២០២៤ ក្រុមការងារបានកំណត់អត្ដសញ្ញាណជនពិការភាពតាមគំរូសង្គម និងសិទ្ធិជាមូលដ្ឋាន ១០០ឃុំសង្កាត់ ដោយបានសម្ភាសន៍ជនពិការភាពចំនួន ២៩នាក់ ស្រី១២នាក់ រកឃើញជនពិការមានបណ្ណសមធម៌ ៧នាក់ និងមជ្ឍមណ្ឌលស្ដារលទ្ធភាពពលកម្ម បានផ្ដល់សេវាដល់ជនពិការភាព បំពាក់ជើងសិប្បនិម្មិត ផ្ដល់ឈើច្រត បំពាក់រណបជើង បំពាក់ដៃសិប្បនិម្មិត ទ្រាប់ស្បែកជើង ផ្ដល់រទេះរុញគ្រប់ប្រភេទ ជួសជុលឈើច្រតគ្រប់ប្រភេទ ជួសជុលជើងគ្រប់ប្រភេទ និងជួសជុលរទេះរុញគ្រប់ប្រភេទផងដែរ។ ដោយឡែកបញ្ហាប្រឈមខ្វះថវិកាសម្រាប់ការអនុវត្ដការងារពិការភាព និងរដ្ឋបាលក្រុងស្រុក មន្ទីរអង្គភាព ឃុំសង្កាត់ សាលារៀន គ្រឹះស្ថានសាធារណៈរបស់រដ្ឋមួយចំនួន ពុំទាន់មានហេដ្ឋារចនាសម្ព័ន្ធរូបវន្ដសម្រាប់បង្កលក្ខណៈងាយស្រួលសម្រាប់ជនពិការភាព។
មានប្រសាសន៍ក្នុងឱកាសនោះ លោក នាក់ ណេរ៉ុន បានសម្ដែងនូវការកោតសរសើរខ្ពស់ចំពោះការខិតខំប្រឹងប្រែង និងការសហការគ្នាបានល្អ ក្នុងការអនុវត្តសកម្មភាពការងារប្រកបដោយរលូន និងទទួលបានលទ្ធផលល្អប្រសើរ។ ជាមួយនោះលោកបានជំរុញឱ្យក្រុមការងារបន្តសហការគ្នាក្នុងការប្រមូល និងគ្រប់គ្រងទិន្នន័យធ្វើសមាហរណកម្មចំពោះជនពិការមួយចំនួនដែលពុំមានអាសយដ្ឋានជាក់លាក់ ត្រូវបន្តបណ្តុះបណ្តាល និងផ្សព្វផ្សាយបន្ថែមដល់ រដ្ឋបាលក្រុង ស្រុក មន្ទីរអង្គភាព ឃុំ សង្កាត់ សាលារៀន គ្រឹះស្ថានសាធារណៈរបស់រដ្ឋមួយចំនួន ឱ្យមានហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព។
លោកក៏បានណែនាំឱ្យក្រុមការងារ ត្រូវបន្តផ្តល់គ្រឿងឧបភោគ បរិភោគ ជូនជនមានពិការភាព មានជីវភាពខ្វះខាត និងផ្សព្វផ្សាយដំណឹងស្វែងរកការងារធ្វើជូនជនមានពិការភាព បន្តជំរុញស្ថាប័នរដ្ឋ វិស័យឯកជន រោងចក្រ សហគ្រាស ទទួលយកជនពិការភាពចូលបម្រើការងារ និងផ្តល់លក្ខខណ្ឌការងារសមរម្យជូនពួកគាត់ ហើយត្រូវពិនិត្យ និងឆ្លើយតប រាល់បញ្ហា សំណូមពរផ្សេងៗរបស់ជនមានពិការភាពឱ្យបានទាន់ពេលវេលា៕
អត្ថបទ និងរូបថត៖ លោក ឈិត សាវី
កែសម្រួល៖ លោក អ៊ុន ណារាជ្យ
