នៅព្រឹកថ្ងៃទី០៥ ខែវិច្ឆិកា ឆ្នាំ២០២៤នេះ ក្រសួងសង្គមកិច្ច អតីតយុទ្ធជន យុវនីតិសម្បទា បានបើកវេទិកាសាធារណៈផ្សព្វផ្សាយ “សៀវភៅថវិកាពលរដ្ឋ និងថវិកាសង្ខេប” នៅសណ្ឋាគារអុីមព្រីសន៍អង្គរ ខេត្តសៀមរាប ក្រោមអធិបតីភាព ឯកឧត្តម រឿន រិទ្ធីរ័ត្ន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានកិច្ចការរដ្ឋបាល និងហិរញ្ញវត្ថុ ក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការចូលរួមពីអ្នកពាក់ព័ន្ធជាច្រើនរូប។
សូមជម្រាបថា វេទិកានេះទទួលបាននូវមតិយោបល់ជាច្រើន ពីសំណាក់តួអង្គពាក់ព័ន្ធ ពិសេសអង្គភាពអនុវត្តថវិកា អង្គភាពជំនាញ ក្រោមឱវាទក្រសួងសង្គមកិច្ច ដែលបានចែករំលែក និងប្រមូលចងក្រងធាតុចូលសម្រាប់ពិចារណាបំពេញបន្ថែម លើការងារសេសសល់ បញ្ហាប្រឈមចំពោះមុខ និងទិសដៅការងារបន្ត។
ថ្លែងបូកសរុបបិទអង្គវេទិកា ឯកឧត្តម រឿន រិទ្ធីរ័ត្ន មានប្រសាសន៍ថា សៀវភៅថវិកាពលរដ្ឋ និងថវិកាសង្ខេបរបស់ក្រសួងសង្គមកិច្ច ដែលបានផ្សព្វផ្សាយនាពេលនេះ ពិតជាបានបង្កើនចំណេះដឹង ផ្លាស់ប្តូរគំនិត និងធាតុចូលពីគ្រប់តួអង្គពាក់ព័ន្ធ ប្រកបដោយប្រសិទ្ធភាពខ្ពស់ និងជាមូលដ្ឋានចម្បងសម្រាប់ការងារបន្ទាប់នាពេលខាងមុខ ដូចជាការបង្កើនការយល់ដឹងកាន់តែប្រសើរ ចំពោះមន្ត្រីរាជការ ក៏ដូចជាភាគីដែលពាក់ព័ន្ធអំពីការប្រើប្រាស់នូវថវិការបស់ក្រសួង ការបែងចែកភោគផលឱ្យអ្នកប្រើប្រាស់ចុងក្រោយ។ ក្រៅពីនោះក៏ជាការបង្កើននូវគុណភាពនៃការរៀបចំ ការអនុវត្ត ការផ្សព្វផ្សាយនូវឯកសារថវិកាជូនដល់ប្រជាពលរដ្ឋនិងភាគីពាក់ព័ន្ធ ដើម្បីទទួលបាននូវព័ត៌មានអំពីការប្រើប្រាស់ថវិកាកាន់តែទូលាយជាងមុន។ បង្កើនការទទួលខុសត្រូវកាន់តែខ្ពស់ជាងមុន ចំពោះការប្រើប្រាស់ថវិការបស់អង្គភាពសាម៉ីនីមួយៗ។
ឯកឧត្តមបញ្ជាក់ថា គុណតម្លៃដ៏សំខាន់មួយនៃអភិក្រម គឺរៀនបណ្តើរ-ធ្វើបណ្តើរ ជាស្មារតីដែលថ្នាក់ដឹកនាំយើងតែងតែប្រកាន់យក ហើយ ការកែទម្រង់ការគ្រប់គ្រងហិរញ្ញវត្ថុសាធារណៈត្រូវបោះជំហានជាដំណាក់កាលៗ នោះគឺជាការផ្តល់លទ្ធភាពឱ្យយើងអាចដោះស្រាយបញ្ហាចំពោះមុខដែលជាអាទិភាពបន្ទាប់ផង ទន្ទឹមនឹងការអាចចាប់ផ្តើមអនុវត្តសាកល្បង នូវសមាសធាតុគន្លឹះនានា ដែលចាំបាច់សម្រាប់ត្រៀមលក្ខណៈមុនការមកដល់នៃដំណាក់កាលបន្ទាប់ផង។ កិច្ចការនេះ អាចកើតឡើងបានតាមរយៈការចូលរួមយ៉ាងសកម្មពីគ្រប់តួអង្គពាក់ព័ន្ធ ដែលជាកម្លាំងចលករប្រកបដោយឆន្ទៈ ភាពជាម្ចាស់ និងស្មារតីទទួលខុសត្រូវខ្ពស់យើងទាំងអស់គ្នា៕
អត្ថបទ និងរូបថត៖ លោក យូ វង្ស
កែសម្រួល៖ លោក អ៊ុន ណារាជ្យ
