រាជរដ្ឋាភិបាលនីតិកាលទី៧ តាមរយៈក្រសួងអប់រំ យុវជន និងកីឡា បានយកចិត្តទុកដាក់ និងបានដាក់ចេញនូវកម្មវិធីផ្សេងៗជាច្រើន សំដៅលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សា រហូតដល់ថ្នាក់មធ្យមសិក្សា តាមរយៈការដាក់ចេញនូវវិធានការសំខាន់ៗចំនួន៤។
បើតាមខ្លឹមសារ ក្នុងសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងឱកាសបើកបវេសនកាលឆ្នាំសិក្សាថ្មី ២០២៤-២០២៥ វិធានការទាំង៤ រួមមាន៖ ទី១.ការពង្រឹងអភិបាលកិច្ច ,ទី២.ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ឱ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ,ទី៣.ការយកចិត្តទុកលើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤.ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យស្លោក ភាពជាដៃគូរដ្ឋ និងសហគមន៍ ដើម្បីការអប់រំ។
ក្នុងពិធីបើកបវេសនកាលឆ្នាំថ្មីឆ្នាំសិក្សា២០២៤-២០២៥ និងចែករង្វាន់ដល់សិស្សពូកែនៅសាលាបឋមសិក្សាបន្ទាយឈើ ក្នុងសង្កាត់ទឹកវិល ក្រុងសៀមរាប
នៅថ្ងៃទី០១ ខែវិច្ឆិកា ឆ្នាំ២០២៤ ព្រះសច្ចានុបាល នឿម វុទ្ធី ប្រធានកិត្តិយសគណៈកម្មការគ្រប់គ្រងសាលា បានអំពាវនាវឱ្យមានការចូលរួមពីសំណាក់មាតាបិតា អាណាព្យាបាលសិស្ស និងមហាជន ជួយគាំទ្រសាលា ដើម្បីឱ្យមានរីកចម្រើនទៅមុខទៀត ចូលរួមក្នុងកំណែទម្រង់វិស័យអប់រំដែលជាកត្តាសំខាន់ក្នុងការចូលរួមអភិវឌ្ឍន៍វិស័យអប់រំនៅកម្ពុជា។ ព្រះអង្គក៏សូមឱ្យអាណាព្យាបាល ត្រូវតាមដានលទ្ធផលសិក្សា អត្តចរិត សីលធម៌ និងសុជីវធម៌របស់កូនចៅ ទាំងនៅក្នុងគ្រួសារ និងក្នុងសហគមន៍ ព្រមទាំងជួយបង្រៀនកូនបន្ថែម ចូលរួមគាំទ្រដល់ការអភិវឌ្ឍសាលារៀន និងគាំទ្រដល់ គ្រូបង្រៀនតាមគ្រប់លទ្ធភាពផងដែរ។
ព្រះសនសត្ថា តង់ តន ព្រះបាឡាត់គណខេត្ត មានសង្ឃដីកាថា ការអប់រំលើវិស័យព្រះពុទ្ធសាសនា គឺមានសារៈសំខាន់ណាស់ សម្រាប់ការចូលរួមចំណែកអភិវឌ្ឍប្រទេសជាតិ និងសីលធម៌សង្គម ព្រោះប្រទេសកម្ពុជា បានចាត់ទុកព្រះពុទ្ធសាសនាជាសាសនារបស់រដ្ឋ ហើយព្រះសង្ឃគ្រប់អង្គ គឺជាកម្លាំងចលករដ៏សំខាន់ក្នុងការអភិវឌ្ឍប្រទេសជាតិ ទាំងពេលនៅជាព្រះសង្ឃ និងក្រោយពេលលាចាកសិក្ខាបទ។
ព្រះអង្គក៏បានជំរុញដល់សិស្សានុសិស្សទាំងអស់ ត្រូវខិតខំប្រឹងប្រែងរៀនសូត្រ ដើម្បីអនាគតខ្លួនឯង គ្រួសារ និងប្រទេសជាតិ ព្រោះប្អូនៗគឺជាសសរទ្រូងនៃប្រទេសជាតិ ជាទំពាំងស្នងឬស្សី ហើយដែលជាអ្នកកសាង និងអភិវឌ្ឍប្រទេសជាតិបន្តវេន ដូច្នេះការសិក្សារៀនសូត្រ វានឹងអាចជួយប្អូនៗ ក្នុងការជួយកែប្រែ និងអភិវឌ្ឍន៍ខ្លួនឯង ឱ្យមានការរីកចម្រើនជាបន្តបន្ទាប់ ជួយខ្លួនឯង គ្រួសារ និងសង្គមជាតិផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
