នៅព្រឹកថ្ងៃទី៣១ ខែតុលា ឆ្នាំ២០២៤នេះ រដ្ឋបាលក្រុងសៀមរាប បានរៀបចំវេទិកាផ្សព្វផ្សាយ និងពិគ្រោះយោបល់ អាណត្តិទី៤ របស់ក្រុមប្រឹក្សាក្រុងសៀមរាប ប្រចាំឆ្នាំ២០២៤ ក្រោមវត្តមាន លោកស្រី មឿន សុផល្លា ប្រធានក្រុមប្រឹក្សាក្រុងស្តីទី និង លោក នួន ពុទ្ធារ៉ា អភិបាលក្រុង ដោយមានការចូលរួមពីថ្នាក់ដឹកនាំមន្ទីរអង្គភាព សមាជិកសមាជិកាក្រុមប្រឹក្សាក្រុង គណៈអភិបាលក្រុង មន្ត្រីរាជការ អាជ្ញាធរមូលដ្ឋាន និងអ្នកពាក់ព័ន្ធជាច្រើនរូប។
លោកស្រី មឿន សុផល្លា មានប្រសាសន៍ថា ការរៀបចំវេទិកានៅថ្ងៃនេះ គឺដើម្បីឱ្យអ្នកពាក់ព័ន្ធធ្វើការប្រមូលនូវរាល់មតិយោបល់ បញ្ហាប្រឈម និងសំណូមពរនានា មកធ្វើការពិភាក្សា ស្រាយបំភ្លឺឱ្យបានច្បាស់លាស់ ប្រកបដោយតម្លាភាព ឈានទៅរកការដោះស្រាយចំគោលដៅ មានប្រសិទ្ធភាព និងទាន់ពេលវេលា ក្នុងករណីដោះស្រាយបានភ្លាមៗ នឹងធ្វើការដោះស្រាយជូន ចំពោះករណីមិនអាចដោះស្រាយបាន នឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា ឬគេចវេះពីបញ្ហា ដែលបានលើកឡើងក្នុងអង្គវេទិកានេះឡើយ។
លោកស្រីបន្តថា វេទិកាសាធារណៈ ពិតជាមានសារៈសំខាន់បំផុត ក្នុងការជួយជំរុញដល់ការអនុវត្តមុខងារគ្រប់ស្ថាប័នមានការពាក់ព័ន្ធ រួមនឹងអាជ្ញាធរមូលដ្ឋានឱ្យកាន់តែមានប្រសិទ្ធភាពបន្ថែមទៀត ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ចំពោះការពិនិត្យ និងដោះស្រាយបញ្ហា សំណួរសំណូមពររបស់ប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់ប្រជាពលរដ្ឋ នៅតាមបណ្ដាមូលដ្ឋានភូមិ សង្កាត់ នៃក្រុងសៀមរាបទាំងមូល។
បន្ទាប់ពីស្ដាប់នូវទុក្ខកង្វល់ បញ្ហាប្រឈម និងសំណូមពររបស់ប្រជាពលរដ្ឋរួចមក អង្គវេទិកាបានទទួលសំណួរផ្ទាល់មាត់ និងជាលាយលក្ខអក្សរ ចំនួន៤០សំណួរសំណូមពរ ដោយផ្តោតទៅលើបញ្ហាហេដ្ឋារចនាសម្ព័ន្ធផ្លូវថ្នល់ លូ ការងារដីធ្លី បរិស្ថាន អនាម័យ ការងារសន្តិសុខ សណ្តាប់ធ្នាប់ ការងារអាត្រានុកូលដ្ឋាន ដីតំបន់បុរាណដ្ឋាន និង បញ្ហាទឹកស្អាតជាដើម។ ចំពោះសំណួរសំណូមពរទាំងអស់នេះ លោក នួន ពុទ្ធារ៉ា អភិបាលក្រុង រួមនឹងអ្នកពាក់ព័ន្ធ បានធ្វើការស្រាយបំភ្លឺជូនដល់ម្ចាស់សំណួរសំណូមពរ ហើយចំពោះសំណួរសំណូមពរដែលមិនទាន់អាចដោះស្រាយបាន អ្នកពាក់ព័ន្ធនឹងដោះស្រាយជូនបងប្អូនជាម្ចាស់សំណួរសំណូមពរនៅពេលបន្តបន្ទាប់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
