នៅព្រឹកថ្ងៃទី១០ ខែកុម្ភៈ ឆ្នាំ២០២២ កម្មសិក្សាការីបម្រើការងារនៅតាមមន្ទីរអង្គភាពនានាក្នុងខេត្តសៀមរាប ចំនួន ៣០នាក់ ដែលបានបញ្ចប់វគ្គបណ្តុះបណ្តាល នៅសាលាភូមិន្ទរដ្ឋបាលមានរយៈពេលចំនួន ៩ខែ ឆ្នាំ២០២១ បានជួបសំដែងការគួរសម ជាមួយឯកឧត្តម ទៀ សីហា អភិបាលខេត្ត ដើម្បីស្តាប់អនុសាសន៍ និងបទពិសោធសម្រាប់យកទៅបំពេញការងារ ភារកិច្ចជូនអង្គភាព ប្រកបដោយចំណេះ ជំនាញ វិជ្ជាជីវៈ និងស្មារតីទទួលខុសត្រូវខ្ពស់ ជាប្រយោជន៍ជូនជាតិ មាតុភូមិយើងទាំងអស់គ្នា។
បើតាមលោក រិន ឡូត តំណាងកម្មសិក្សាការី បានបង្ហាញការតាំងចិត្តយ៉ាងមុតមាំថា នឹងយកចំណេះដឹង បទពិសោធន៍ល្អៗ ដែលបានក្រេបជញ្ជក់ ពីសំណាក់ឯកឧត្តម លោកជំទាវ សាស្ត្រាចារ្យឧទ្ទេសក្នុងវគ្គសិក្សាទាំងអស់ រួមទាំងអនុសាសន៍ ដ៏ខ្ពង់ខ្ពស់របស់ឯកឧត្តមអភិបាលខេត្ត សម្រាប់យកទៅអនុវត្តជាក់ស្តែងនៅតាមបណ្តាអង្គភាព និងមូលដ្ឋានរបស់ខ្លួន ប្រកបដោយប្រសិទ្ឋផល តម្លាភាព គណនេយ្យភាព និងរក្សាសាមគ្គីផ្ទៃក្នុងឱ្យកាន់តែមានប្រសិទ្ឋភាព និងលទ្ឋផលល្អប្រសើរ។ លោក រិន ឡូត បានរម្លឹកក្នុងវគ្គសិក្សាកន្លងមកថា ក្នុងស្ថានភាពបញ្ហាប្រឈម ពាក់ព័ន្ទទៅនឹងជំងឺកូវិត-១៩ ថ្នាក់ដឹកនាំគ្រប់ជាន់ថ្នាក់នៃសាលាភូមិន្ទរដ្ឋបាល និងសាស្ត្រាចារ្យឧទ្ទេសទាំអស់ បានខិតខំយកចិត្តទុកដាក់ក្នុងដំណើរការបណ្តុះបណ្តាល កម្មសិក្សាការីតាមកម្មវិធីរបស់សាលា ដែលបានគ្រោងទុកតាមរយៈប្រព័ន្ធសិក្សាពីចម្ងាយ Microsoft Teams ដោយអនុលោមតាមគោលការណ៍ដ៏មានប្រសិទ្ធភាពខ្ពស់បំផុតរបស់សាលាគឺ វិន័យ គុណភាព គុណធម៌ និងនវានុវត្តន៍។
ព័ត៌មានជាតិ ថ្មីៗ
ថ្លែងសំណេះសំណាលក្នុងឱកាសនោះ ឯកឧត្តម ទៀ សីហា បានចាត់ទុកការទទួលបានការបណ្តុះបណ្តាលនេះជាចំណេះដឹងរួម និងជាទុនដ៍មានសារៈសំខាន់សម្រាប់មន្ត្រីដែលបានឆ្លងកាត់វគ្គបណ្តុះបណ្តាលរួចហើយយកទៅអនុវត្តការងារជាក់ស្តែង ក្នុងការបំរើសេវានានានៅតាមបណ្តាអង្គភាពមន្ទីរ និងមូលដ្ឋានរបស់ខ្លួនប្រកបដោយតម្លាភាព ស្របតាមវិជ្ជាជីវៈ ស្របគ្នាទៅនឹងបរិបទនៃការវីវដ្តរបស់សង្គមជាតិបច្ចុប្បន្នត្រូវការនូវធនធានមនុស្សដែលមានចំណេះដឹង និងសមត្ថភាព។ ចំណេះដឹង វាដើរទន្ទឹមគ្នាជាមួយនឹងការអនុវត្តជាក់ស្តែង ហេតុនេះស្នើដល់កម្មសិក្សាការីទាំងអស់បន្តស្វែងរកនូវធាតុចូលបន្ថែមទៀតទៅតាមជំនាញរៀងៗខ្លួន ជាពិសេសត្រូវសិក្សាភាសាអង់គ្លេសឱ្យបានច្បាស់លាស់ ដើម្បីងាយស្រួលក្នុងទំនាក់ទំនងកិច្ចការផ្សេងៗព្រោះសៀមរាប ជាខេត្តទេសចរណ៍ដ៍សំខាន់របស់ជាតិ។
ឯកឧត្តម បានបង្ហាញការជឿជាក់ថា លោកលោកស្រីទាំងអស់ដែលបានបញ្ចប់វគ្គបណ្តុះបណ្តាល នឹងបន្តជួយការងារដល់រដ្ឋបាលក្រុងស្រុកមន្ទីរអង្គភាពរបស់ខ្លួន បានប្រសើរជាក់ជាមិនខាន ជាពិសេសការផ្តល់សេវាសាធារណៈនានាជូនប្រជាពលរដ្ឋនឹងបានរហ័ស មានតម្លាភាពនិងគណនេយ្យភាព។ ឯកឧត្តមក៏បានជម្រុញផងដែរឱ្យជួយជំរុញដល់ប្រជាពលរដ្ឋនៅតាមមូលដ្ឋានទៅទទួលការចាក់វ៉ាក់សាំងការពារជំងឺកូវីដ-១៩ ដូសជំរុញឱ្យបានគ្រប់ៗគ្នា និងបន្តពង្រឹងការអនុវត្តការងារជំនាញរបស់ខ្លួនឱ្យមានប្រសិទ្ឋភាព ពង្រឹងសាមគ្គីភាព និងទំនាក់ទំនង សហការល្អជាមួយគ្រប់អង្គភាពមន្ទីរ និងអាជ្ញាធរមូលដ្ឋាននានាឱ្យកាន់តែស្អិតរមួតថែមទៀត។
សូមរម្លឹកថា ឆ្លងកាត់វគ្គបណ្តុះបណ្តាលរយៈពេល៩ខែ នៅសាលាភូមិន្ទរដ្ឋបាល លទ្ធផលនៃវគ្គបណ្តុះបណ្តាល ក្នុងវគ្គវិក្រឹត្យការមន្ត្រីគ្រប់គ្រងរដ្ឋបាលចំនួន ២៣នាក់ ស្រី៣នាក់ បានសិក្សាលើមុខវិជ្ជាចំនួន ២១មុខវិជ្ជា រួមនឹងបាឋកថា វគ្គវិក្រឹត្យការមន្ត្រីមធ្យមចំនួន៣នាក់ បានសិក្សាលើមុខវិជ្ជាចំនួន២០មុខវិជ្ជា រួមនឹងបាឋកថា វគ្គវិក្រឹត្យការមន្ត្រីក្រមការចំនួន ៤នាក់ ស្រី១នាក់ បានសិក្សាលើមុខវិជ្ជាចំនួន ១៩មុខវិជ្ជា រួមនឹងបាឋកថា៕
អត្ថបទ និង រូបភាព៖ លោក យូ វង្ស
