នៅថ្ងៃទី១៧ ខែកក្កដា ឆ្នាំ២០២០នេះ រដ្ឋបាលខេត្តសៀមរាប បានបើកកិច្ចប្រជុំត្រួតពិនិត្យលើការអនុវត្តគម្រោងសេវាសង្គមរបស់រដ្ឋបាលថ្នាក់ក្រុង ស្រុក និងឃុំ សង្កាត់ ក្រោមអធិបតីភាពលោកស្រី យូ សុភា អភិបាលរងខេត្ត និងជាប្រធានគម្រោងលើកកម្ពស់វិស័យសេវាសង្គមខេត្តសៀមរាប និង លោកជំទាវប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្ត ដោយមានការអញ្ជើញចូលរួមពីសំណាក់លោក លោកស្រីជាតំណាងទីចាត់ការផែនការវិនិយោគខេត្ត , មន្ទីរជំនាញពាក់ព័ន្ធ , ថ្នាក់ដឹកនាំនិងមន្រ្តីជាជនបង្គោលរបស់គម្រោងសេវាសង្គមនៅរដ្ឋបាលក្រុងស្រុក។
លោកស្រី យូ សុភា អភិបាលរងខេត្ត មានប្រសាសន៍ថា គម្រោងលើកកម្ពស់វិស័យសេវាសង្គម នេះគឺផ្តោតសំខាន់ទៅលើបញ្ហាសុខភាពមាតា ទារក និងអាហារូបត្ថម្ភ បញ្ហាទឹកស្អាតនិងអនាម័យ បញ្ហាកិច្ចការពារកុមារ បញ្ហាការអប់រំកុមារតូច និងបញ្ហាភាពងាយរងគ្រោះ របស់ប្រជាពលរដ្ឋ ហើយកិច្ចសំខាន់នៃកិច្ចប្រជុំនាថ្ងៃនេះ ដើម្បីធ្វើការត្រួតពិនិត្យវឌ្ឍនភាពនៃការអនុវត្តគម្រោងសេវាសង្គម ដែលប្រើប្រាស់ថវិកាមូលនិធិក្រុង ស្រុក និងឃុំ សង្កាត់ សម្រាប់ឆ្នាំ២០២០ ក្នុងឆមាសទី១ ឆ្នាំ២០២០ ពិសេសសពិនិត្យលើការរៀបចំនៃការកំណត់បញ្ហាតាមរយៈការគូសផែនទីសេវាសង្គមភូមិ ដើម្បីធ្វើការវិភាគ និងការចាត់អាទិភាពនៃបញ្ហាដាក់បញ្ចូលទៅក្នុងផែការកម្មវិធីវិនិយោគ និងផែនការយុទ្ធសាស្រ្តថវិកាឆ្នាំ២០២១-២០២៣។
ក្នុងឱកាសនោះដែរ លោកស្រី យូ សុភា បានជំរុញឲ្យរដ្ឋបាលក្រុង ស្រុក ត្រូវ ៖ ១. ធ្វើការពិនិត្យឲ្យបានហ្មត់ចត់ ចំពោះការគូសផែនទីសេវាសង្គមនៅតាម ភូមិ ឃុំ សង្កាត់នីមួយៗ ជៀសវាងការធ្វើឲ្យបាត់បង់អត្ថប្រយោជន៍របស់ប្រជាពលរដ្ឋ ពិសេសគ្រួសារក្រីក្រ និងងាយរងគ្រោះ , ២. ត្រូវផ្តល់ព័ត៌មានដល់ប្រជាពលរដ្ឋ អំពីកាលបរិច្ឆេទនៃការប្រជុំកូសផែនទីភូមិ , ៣. សហការនិងសម្របសម្រួលជាមួយអ្នកពាក់ព័ន្ធ ពិសេសរដ្ឋបាលឃុំ សង្កាត់ ក្នុងការរៀបចំផែនទីសេវាសង្គមភូមិ , ៤. ត្រូវតាមដាននិងត្រួតពិនិត្យលើការរៀបចំផែនការ និងការប្រើប្រាស់កញ្ចប់ថវិកាមូលនិធិ ឃុំ សង្កាត់ ដើម្បីធានានូវតម្លាភាព គណនេយ្យភាព និងប្រសិទ្ធិភាព និង ៥. ត្រូវធ្វើបច្ចុប្បន្នភាពឲ្យបានច្បាស់លាស់ អំពីផែនទីសេវាសង្គមភូមិ ៕