ប្រជាពលរដ្ឋក្រីក្រប្រមាណជាង៥០០គ្រួសារ នៅឃុំពាក់ស្នែង ស្រុកអង្គរធំ ខេត្ដសៀមរាប នាព្រឹកថ្ងៃទី១៨ ខែកក្កដាឆ្នាំ២០២០នេះ បានទទួលអំណោយពីពីក្រុមការងារចុះជួយឃុំពាក់ស្នែង ដើម្បីជួយដោះស្រាយជីវភាពប្រចាំថ្ងៃរបស់ពួកគាត់ ក្នុងអំឡុងពេលមានបញ្ហាជំងឺកូវីដ១៩ ក្រោមអធិបតីភាពឯកឧត្ដម ស ថាវី ប្រធានកិត្ដិយសនៃក្រុមការងារចុះជួយឃុំពាក់ស្នែង ស្រុកអង្គរធំ និងជាអនុរដ្ឋលេខាធិការក្រសួងមហាផ្ទៃ , ឯកឧត្ដម ផៃ សុខខេង អនុប្រធានក្រុមការងារចុះជួយឃុំពាក់ស្នែង និងជាអគ្គលេខាធិការវេទិការសម្ព័ន្ធសង្គមស៊ីវិល និង លោក ស្កុនីសិន ប្រធានអង្គការមូលនិធិកុមារកម្ពុជា ដោយមានការចូលរួមពីសំណាក់ឯកឧត្ដម លោក លោកស្រី ជាអនុប្រធាននិងសមាជិកនៃក្រុមការងារ និង អាជ្ញាធរមូលដ្ឋាន ។
ឯកឧត្ដម ស ថាវី មានប្រសាសន៍ថា អំណោយនេះមិនច្រើនណាស់ណានោះទេ ប៉ុន្ដែអាចដោះស្រាយបានមួយគ្រាៗដែរ ក្នុងអំឡុងពេលដែលកំពុងមានបញ្ហាជំងឺកូវីដ១៩ទូទាំងសកលលោក ប៉ុន្តែសំខាន់សូមឲ្យបងប្អូនប្រជាពលរដ្ឋទាំងអស់ ត្រូវធ្វើការរកស៊ីទទួលទានជាប្រចាំ ដើម្បីដោះស្រាយជីវភាពគ្រួសារដល់ថ្ងៃអនាគត ព្រោះអំណោយបន្ដិចបន្ដួចនេះ មិនអាចដោះស្រាយបានយូរថ្ងៃនោះទេ។
ក្នុងឱកាសនោះដែរ ឯកឧត្ដម ស ថាវី បានផ្តាំផ្ញើរចំពោះបងប្អូនប្រជាពលរដ្ឋទាំងអស់ សូមចូលរួមថែរក្សាសុខភាពទាំងអស់គ្នា ដើម្បីការពារពីការឆ្លងរោគផ្សេងៗ ពិសេសជំងឺកូវីដ១៩ ដោយជំងឺនេះបានកើតឡើងពាសពេញពិភពលោក ហើយក៏មានអ្នកស្លាប់ច្រើនផងដែរ បើទោះបីនៅកម្ពុជាយើង មានករណីឆ្លងតិចតួចនិងជាសះស្បើយច្រើនក៏ពិតមែនប៉ុន្តែសូមកុំមានការធ្វេសប្រហែស ពីព្រោះជំងឺនេះវាឆ្លងរហ័សណាស់ ប្រសិនជាយើងមើលស្រាលវា ជាពិសេសអនុវត្តនូវវិធានការនានាតាមការណែនាំរបស់ក្រសួងសុខាភិបាល ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
