សមត្ថកិច្ចប៉ុស្តិ៍នគរបាលរដ្ឋបាលសង្កាត់ជា្រវ បានឱ្យដឹងថា កាលពីវេលាម៉ោងប្រមាណ២០និង៣០នាទី ថ្ងៃទី១៩ ខែកក្កដា ឆ្នាំ២០២០នេះ មានករណីអគ្គិភ័យមួយបានកើតឡើងដោយឆេះរោងដាក់គោ ស្ថិតនៅភូមិជ្រាវ សង្កាត់ជ្រាវ ក្រុងសៀមរាប ជារបស់ជនឈ្មោះ ហ៊ុម ប្រឹង ភេទប្រុស អាយុ៥៣ឆ្នាំ បណ្តាលឱ្យខូចខាតរោងគោធ្វើអំពីឈើប្រក់ស័ង្កសីទំហំ១២ម៉ែត្រគុណនឹង២៥ម៉ែត្រ , គោយន្តកន្រ្តៃយ៍ចំនួន០២គ្រឿង , ទូកស្មាច់ប្រវែង៨ ម៉ែត្រចំនួន១គ្រឿង ចំណែកឯសត្វគោដែលនៅក្នុងរោងនោះបានរត់ចេញផុតពុំមានងាប់ទេ ហើយក៏មិនបានរងគ្រោះដល់មនុស្សឡើយ ដោយសារម្ចាស់គោបានសម្រាកនៅឯផ្ទះរបស់គាត់មានចម្ងាយប្រហែល១.៥០០ម៉ែត្រពីរោងគោ ។
សមត្ថកិច្ចបានឱ្យដឹងទៀតថា មូលហេតុនេះ បណ្ដាលមកពីការដុតភ្លើងបំពក់សត្វគោទុកចោល ដើម្បីកុំឲ្យមូសខាំគោ ដោយមិនបានស្នាក់នៅជាមួយ ហើយបន្ទាប់ពីកើតហេតុជនរងគ្រោះបានទៅដល់កន្លែងកើតហេតុពិនិត្យមើល និងបានទាក់ទងមកសមត្ថកិច្ច ដើម្បីសុំរថយន្តពន្លត់អគ្គិភ័យចុះមកពន្លត់ជួយអន្តរាគមន៍ ហើយករណីអគ្គិភ័យនេះ បានប្រើប្រាស់រថយន្តពន្លត់អគ្គីភ័យអស់ចំនួន០២គ្រឿង របស់ស្នងការដ្ឋាននគរបាលខេត្តចំនួន០១គ្រឿង និងអធិការដ្ឋាននគរបាលក្រុងសៀមរាប ចំនួន០១គ្រឿង ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
