នៅព្រឹកថ្ងៃទី២០ ខែកក្កដា ឆ្នាំ២០២០ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានដឹកនាំ កិច្ចប្រជុំសាមញ្ញប្រចាំសប្តាហ៍ ដែលមានការចូលរួមពី ឯកឧត្តម លោកជំទាវ ជាអគ្គនាយក ទាំង ៥ ចំណុះឲ្យក្រសួង ឯកឧត្តម លោកជំទាវ ជា រដ្ឋលេខាធិការ អនុរដ្ឋលេខាធិការ ទទួលបន្ទុកតាមផ្នែក និងជំនាញនីមួយៗ ធ្វើរបាយការណ៍បូកសរុបជម្រាបជូនពីវឌ្ឍនភាពការងាររួមសំខាន់ៗ សម្រេច និងអនុវត្តន៍បានក្នុងរយៈពេលពេញមួយសប្តាហ៍កន្លងមក និងលើកជាទិសដៅផែនការ សម្មភាពការងារ ដែលបន្ត សម្រាប់សប្តាហ៍បន្ទាប់ឲ្យបានកាន់តែល្អប្រសើរបន្ថែមទៀត ។
នៅក្នុងឱកាសនៃកិច្ចប្រជុំនោះដែរ ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា បានជម្រាបជូនពីគម្រោងកម្មវិធីថ្មីមួយរបស់ ទូរទស្សន៍ជាតិកម្ពុជា (ទទក) ក្នុងការត្រៀមរៀបចំ ការប្រកួតកីឡាប្រដាល់ ក្បាច់គុណបុរាណខ្មែរ តាមរយៈកិច្ចសហការជាមួយ ស្ថាប័នប្រដាល់ប្រទេស ថៃ នឹង មានការគាំទ្រពី គណៈកម្មការប្រដាល់កម្ពុជា ផងដែរ ។
សម្រាប់ការឈប់សម្រាក ៥ ថ្ងៃ រួមនិងថ្ងៃសៅរ៍ អាទិត្យ ទៀត សរុប៩ ថ្ងៃ ឯកឧត្តមរដ្ឋមន្រ្តី បានជំរុញដល់ មន្ទីរ ព័ត៌មាន តាមបណ្តាខេត្ត ត្រូវផ្សព្វផ្សាយពីសម្មភាពការងារនានា របស់អាជ្ញាធរខេត្តក្នុងការរៀបចំ សណ្តាប់ធ្នាប់ សន្តិសុខ សោភណ្ឌភាពតំបន់ទេសចរណ៍ ក៏ដូចជាការបើកដំណើរការ ឡើងវិញនៃ សណ្ឋាគារ ផ្ទះសំណាក់ ដែលគោរពតាមវិធានសុវត្ថិភាពរបស់ក្រសួងសុខាភិបាល ក្នុងការបង្ការ ការពារទប់ស្កាត់ជំងឺកូវីត១៩។
ទន្ទឹមនោះ ឯកឧត្តមរដ្ឋមន្រ្តី បានណែនាំដល់ ថ្នាក់ដឹកនាំ មន្រ្តីជំនាញគ្រប់ផ្នែក របស់ក្រសួង ត្រូវខ្លួនត្រៀមបំពេញកិច្ចការងារសំខាន់ជាច្រើនទៀត ទាំងនៅថ្នាក់ជាតិ ថ្នាក់ក្រោមជាតិ ក៏ដូច ជាមួយអន្តរជាតិ ។ ជាមួយនេះ ក្រសួង ក៏នឹងត្រៀមធ្វើការបណ្តុះបណ្តាលការងារ យកព័ត៌មាននៅតាម បណ្តាខេត្ត-រាជធានី តាមរយៈ ទូរសព្ទ័ដៃវៃឆ្លាត ដែលមានភាពងាយស្រួល និងឆាប់រហ័ស ជាងមុន។ ឯកឧត្តម រដ្ឋមន្រ្តី ក៏បានជំរុញលើកទឹកចិត្ត ឲ្យប្រពន្ធ័ផ្សព្សាយរបស់ជាតិ បន្តរួម សហការគ្នាសរសេរព័ត៌មាន ឲ្យបានកាន់តែស៊ីជម្រៅបន្ថែមទៀត ពិសេសដំណឹងថ្មីៗ ហើយរួមគ្នាផ្សាយពីគ្នាទៅវិញទៅមក ឲ្យបានកាន់តែទូលំទូលាយ ។
