កាលពីរសៀលថ្ងៃទី១៩ ខែកក្កដា ឆ្នាំ២០២០នោះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី បានអញ្ជើញប្រគល់ផ្ទះមនុស្សធម៌ទី៧៣ ចំនួន១ខ្នង ជូនគ្រួសារលោក គី រី អាយុ៦៥ឆ្នាំ ជាជនពិការជើងឆ្វេង និងភរិយាឈ្មោះ ញ៉ឹក ម៉ុន អាយុ៥៩ឆ្នាំ មានសមាជិកគ្រួសារ៩នាក់ រស់នៅភូមិដូនស្វា ឃុំសំរោងយា ស្រុកពួក បច្ចុប្បន្នដើរស៊ីឈ្នួលគេ ដើម្បីបានចំណូលខ្លះដោះស្រាយជីវភាពប្រចាំថ្ងៃ ដែលមានទំហំ ៦ម៉ែត្រគុណនឹង៦ម៉ែត្រ មានពីរបន្ទប់ ដំបូលប្រក់ស័ង្កសីភ្លីក្បឿង ជញ្ជាំងស្មាតបត ក្រាលការ៉ូផុតពីដីកម្ពស់០,៤ម៉ែត្រ សង់លើដីផ្ទាល់ខ្លួនគាត់ទំហំ ៩ម៉ែតគុណនឹង១៤ម៉ែត្រ ដែលផ្ដួចផ្ដើមដោយឯកឧត្តម ទៀ សីហា ប្រធានគណៈកម្មាធិការសាខា និងបានការជួយឧបត្ថម្ភពី ឯកឧត្ដមឧកញ៉ា ទៀ វិចិត្រ និងលោកជំទាវ ។
ជាមួយនឹងការប្រគល់ផ្ទះ ក៏បានជូនជាអំណោយមនុស្សធម៌បន្ថែមរួមមាន៖ មុង២ , ភួយ២ , សារុង២ , ក្រមា២ , កន្ទេល២ , អង្ករ៦០គីឡូក្រាម , មី២កេស , ត្រីខ២យួរ , ឡាំងទឹក២ , អាវយឺត១០ , សម្ភារផ្ទះបាយមួយចំនួន និងថវិកាចំនួន៤សែនរៀល ហើយជាមួយគ្នានេះដែរ ព្រះតេជគុណ ព្រះអនុប្រធានកិត្តិយសអនុសាខាកាកបាទក្រហមកម្ពុជា ស្រុកពួក បានឧត្ថម្ភបន្ថែម នូវទ័យទានមួយចំនួន និងថវិកាចំនួន១សែនរៀលផងដែរ។
មានប្រសសន៍ក្នុងឱកាសនោះ លោកជំទាវ ទាង អេង ទៀ សីហា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ។
លោកជំទាវ បានលើកទឹកចិត្តដល់បងប្អូនត្រូវចេះដាំដំណាំរួមផ្សំនៅជិតៗផ្ទះ ជាពិសេសសូមឲ្យសមាជិកគ្រួសារទាំងអស់ ត្រូវចេះសម្អាត ថែរក្សាផ្ទះថ្មីនេះ ដើម្បីបានជាជម្រកដ៏កក់ក្តៅតរៀងទៅ ។
ក្នុងឱកាសនោះដែរ ក៏មានការជូនអំណោយដល់លោកតា លោកយាយ ដែលអញ្ជើញចូលរួមក្នុងពិធីប្រគល់ផ្ទះមនុស្សធម៌នេះ ចំនួន២០នាក់ ដលម្នាក់ៗទទួលបាន៖ អង្ករ១៥គីឡូក្រាម , មី១កេស , ត្រីខ១យួរ , ក្រមា១ , អាវយឺត២ និងថវិកា៤ម៉ឺនរៀល។
សូមបញ្ជាក់ថាផ្ទះមនុស្សធម៌នេះជាសមិទ្ធផលថ្មីទី១ សម្រាប់សាខាកាកបាទក្រហមកម្ពុជា ខេត្តសៀមរាប ក្នុងអាណត្តិទី៥ និងជាផ្ទះមនុស្សធម៌ទី ៧៣ របស់សាខាកាកបាទក្រហមកម្ពុជា ខេត្តសៀមរាប ក្នុងរយៈពេលកន្លងមក៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
