ឯកឧត្តម ទៀ សីហា អភិបាលខេត្តសៀមរាប គ្រោងស្នើសុំទៅក្រសួងសុខាភិបាល ដើម្បីរៀបចំព្រឺត្តិការណ៍មួយចំនួន អំឡុងថ្ងៃឈប់សម្រាករយៈពេល៥ថ្ងៃ ចាប់ពីថ្ងៃទី១៧ ដល់ថ្ងៃទី២១ខែសីហា ឆ្នាំ២០២០ ដើម្បីឲ្យប្រជាពលរដ្ឋ ក៏ដូចជាទេសចរជាតិនិងអន្តរជាតិទស្សនាកម្សាន្ត នេះបើតាមប្រសាសន៍ឯកឧត្តម ថ្លែងក្នុង កិច្ចប្រជុំបូកសរុបលទ្ធផលការងារឆមាសទី១ និងលើកទិសដៅអុវត្ដបន្ដឆមាសទី២ឆ្នាំ២០២០ ក្រោមអធិបតីភាព សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប នៅសាលប្រជុំសាលាខេត្តសៀមរាប កាលពីថ្ងៃទី១៩ ខែកក្កដា ឆ្នាំ២០២០។
ព្រឺត្តិការណ៍ដែលរដ្ឋបាលគ្រោងនឹងបង្កើតនេះ រួមមាន កម្មវិធីសាសនា និងកម្មវិធីកីឡាផ្សេងៗ នៅក្នុងក្រុងសៀមរាប ដែលមានរយៈពេល២ថ្ងៃ។ ការស្នើបង្កើតព្រឹត្តិការណ៍ទាំងនេះ ស្របពេលនឹង ការបើកដំណើរការឡើងវិញ នូវផ្ទះសំណាក់ សណ្ឋាគារ ភោជនីយដ្ឋាននានាក្នុងក្រុង ដោយគោរពតាមវិធានសុវត្ថិភាពរបស់ក្រសួងសុខាភិបាល។
បើតាមការលើកឡើងរបស់ឯកឧត្តមអភិបាលខេត្ដ នៅក្នុងឆមាសទី១ ឆ្នាំ២០២០នេះ ខេត្តសៀមរាបទទួលបានភ្ញៀវទេសចរអន្តរជាតិ ចូលមកទស្សនាចំនួនត្រឹមតែ ជិត៤០ម៉ឺននាក់ប៉ុណ្ណោះ មានការថយចុះរហូតដល់ជិត៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០១៩ ដែលមានរហូតដល់ចំនួន ជាងមួយលាន ពីរសែននាក់។ ការធ្លាក់ចុះនៃភ្ញៀវទេសចរយ៉ាងកំហុគនេះ បន្ទាប់ពីមានការបិទជើងហោះហើរចូលមកកាន់ខេត្តសៀមរាបនាចុងខែមីនា ឆ្នាំ២០២០និងបានធ្វើឲ្យប្រតិបត្តិករទេសចរណ៍ទាំងអស់ក្នុងខេត្តសៀមរាប ជួបប្រទះនូវបញ្ហាយ៉ាងធ្ងន់ធ្ងរក្នុងអាជីវកម្មរបស់ខ្លួន។
សូមជម្រាបផងដែរថា កិច្ចប្រជុំគណៈកម្មការអន្តរក្រសួងលើសេចក្តីព្រាងផែនការមេអភិវឌ្ឍន៍វិស័យទេសចរណ៍ខេត្តសៀមរាប ២០២០-២០៣៥ ដែលមានក្រសួងទេសចរណ៍ជាប្រធាន រួមសហការដោយ ក្រសួងវប្បធម៌ ក្រសួងបរិស្ថាន និងរដ្ឋបាលខេត្តសៀមរាប កាលពីថ្ងៃទី០៨ ខែកក្កដា ឆ្នាំ២០២០ បានកំពុងរៀបចំ គម្រោងកែលម្អតំបន់ទេសចរណ៍ធម្មជាតិក្នុងខេត្ត កែលម្អរង្វង់មូលភ្នំគូលែន ក្នុងស្រុកបន្ទាយស្រី កែលម្អចំណតរថយន្ត សួនច្បារ និងផ្លូវក្នុងក្រុងសំខាន់ៗ សម្រាប់បម្រើដល់វិស័យទេសចរណ៍។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
