ព្រឹកថ្ងៃទី១៩ ខែកក្កដា ឆ្នាំ២០២០ ក្រុមយុវជនប្រមាណជាង២០០នាក់ និងបន្ថែមពីលើចំនួននេះដោយព្រះសង្ឃ អាជ្ញាធរដែនដី មន្រ្តីបុគ្គលិកអាជ្ញាធរជាតិអប្សរាផងដែរ បានជួបជុំគ្នានៅក្នុងពិធីដាំកូនឈើប្រណិតចំនួន២ពាន់ដើម ក្នុងនោះ រួមមានជាប្រភេទកូនឈើក្រញូង១ពាន់ដើម បេង៥០០ដើម និង កូនឈើធ្នង់៥០០ដើម។ កូនឈើទាំងនេះ ត្រូវបានដាំលើផ្ទៃដីទំហំ២ហិចតា ស្ថិតនៅក្នុងតំបន់ឧទ្យានប្រវត្តិសាស្រ្តអង្គរ ( ភូមិលាងដៃ ឃុំលាងដៃ ស្រុកអង្គរធំ នៃខេត្តសៀមរាប )។
ពិធីដាំកូនឈើនេះ រៀបចំឡើងដោយរាជបណ្ឌិត្យសភាកម្ពុជា គាំទ្រដោយអាជ្ញាធរជាតិអប្សរា ហើយបណ្តាយុវជន យុវនារី ដែលបានចូលរួមទាំងនោះ គឺជាក្រុមនិស្សិតមកពីរាជធានីភ្នំពេញ ខេត្តបាត់ដំបង និងកំពង់ចាម។ ក្នុងនេះដែរការចូលរួមរបស់ក្រុមយុវជនខេត្តសៀមរាប រួមមានទាំងសិស្សនិងនិស្សិត ហើយបន្ថែមពីលើនេះគឺក្រុមសហភាពសហព័ន្ធយុវជនកម្ពុជា។
លោក មាឃ សារី ប្រធានផ្នែកវិទ្យាសាស្រ្តអប់រំនៃរាជបណ្ឌិត្យសភាកម្ពុជា មានប្រសាសន៍ថា៖ នេះគឺជាការបំផុសចលនាយុវជនកម្ពុជា បណ្តុះឆន្ទៈឲ្យចេះស្រឡាញ់ធម្មជាតិនិងបរិស្ថាន តាមរយៈនៃការដាំកូនឈើ ស្តារនិងជួសជុលគម្របបៃតងឡើងវិញ ដោយផ្តោតសំខាន់គឺសំដៅមកកាន់តំបន់ឧទ្យានប្រវត្តិសាស្រ្តអង្គរ ដែលជាសក្ខីភាពនៃការបំផុសចលនាយុវជនទូទាំងប្រទេស។
ឆ្នាំ២០២០នេះ គឺជាឆ្នាំទី៤ហើយ ដែលរាជបណ្ឌិតសភាកម្ពុជា បានរៀបចំពិធីដាំកូនឈើនៅក្នុងភូមិសាស្រ្តភូមិលាងដៃនៃឧទ្យានអង្គរ រួមទាំងលើកនេះផងដែរ កូនឈើប្រណិតប្រមាណជិត៧ពាន់ដើមត្រូវបានដាំនៅទីនេះ និងមានគម្រោងដាំបន្តទៀត ឲ្យបានគម្រប់រយៈពេល១០ឆ្នាំ៕
អត្ថបទ និង រូបថត ៖ លោក ងិន គឹមឡេង
