ថ្នាក់ដឹកនាំមន្ទីរព័ត៌មានខេត្តសៀមរាប ទទួលជួបពិភាក្សា និងស្វែងយល់ការងារមួយចំនួន ជាមួយមន្ត្រីជាន់ខ្ពស់ស្ថានទូតសហរដ្ឋអាមេរិកប្រចាំនៅកម្ពុជា ដឹកនាំដោយលោក ឆែត រ៉ូដឹម៉ៃយ័រ មន្ត្រីព័ត៌មាន នៃការិយាល័យកិច្ចការសាធារណ: និងជាអ្នកនាំពាក្យស្ថានទូតសហរដ្ឋអាមេរិក អមដោយលោកស្រី ឆាយ ចាន់នីដា មន្ត្រីផ្នែកព័ត៌មានរបស់ស្ថានទូតអាមេរិកប្រចាំនៅកម្ពុជា នៅមន្ទីរព័ត៌មានខេត្តសៀមរាប ដើម្បីផ្លាស់ប្ដូរបទពិសោធន៍ និងស្វែងយល់ពីគ្នាទៅវិញ ទៅមកលើវិស័យព័ត៌មាន និងប្រព័ន្ធផ្សព្វផ្សាយ។
ក្នុងកិច្ចជំនួបនោះ ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្ត បានធ្វើការបង្ហាញអំពីតួនាទី ភារកិច្ច និងការបំពេញបេសកកម្មរបស់មន្ទីរ លើវិស័យព័ត៌មាន និងសោតទស្សន៍ ក្នុងនាមជាសេនាធិការ និងសម្របសម្រួលឱ្យក្រសួងព័ត៌មាន ជាមួយអាជ្ញាធរខេត្ត និងស្ថាប័នពាក់ព័ន្ធក្នុងខេត្ត ក្នុងការដឹកនាំ គ្រប់គ្រងលើវិស័យព័ត៌មាននៅថ្នាក់ក្រោមជាតិ ជាពិសេសផ្តោតសំខាន់លើការផ្សព្វផ្សាយព័ត៌មាន តាមប្រព័ន្ធនានារបស់រដ្ឋ ។
ឯកឧត្តម លីវ សុខុន បន្តថា រយ:ពេលជាង២ឆ្នាំកន្លមកនេះ ក្នុងវិបត្ដិជំងឺកូវីដ-១៩ ខេត្តសៀមរាប ជំងឺនេះបានឆ្លងរីករាលដាលយ៉ាងច្រើន រហូតឈានដល់រដ្ឋបាលខេត្ត ដាក់ចេញវិធានការបិទខ្ទប់សង្កាត់ជាច្រើន នៅក្នុងក្រុងសៀមរាប ពាក់ព័ន្ធករណីនេះការបំពេញភារកិច្ចរបស់អ្នកយកព័ត៌មានយើង ក៏ជួបបញ្ហាជាច្រើនផងដែរ បញ្ហានោះ គឺបារម្ភឆ្លងជំងឺកូវីដ-១៩ , លំបាកក្នុងការធ្វើដំណើរចុះយកព័ត៌មាន និងលំបាកទំនាក់ទងព័ត៌មាន។
ព័ត៌មានជាតិ ថ្មីៗ
លោក ឆែត រ៉ូដឹម៉ៃយ័រ មន្ត្រីព័ត៌មាន នៃការិយាល័យកិច្ចការសាធារណ: និងជាអ្នកនាំពាក្យស្ថានទូតសហរដ្ឋអាមេរិ បានបង្ហាញឱ្យដឹងថា ចំពោះការបំពេញបេសកកម្មការងារនៅខេត្តសៀមរាបនេះ ក្រុមការងាររបស់លោក ផ្តោតលើកិច្ចការសំខាន់ ២រួមមាន÷ ១- ស្វែងយល់អំពីវិស័យអប់រំ និងវប្បធម៌ , ២- ការផ្សព្វផ្សាយអាហារូបករណ៍ និងឱកាសបានទៅសិក្សានៅសហរដ្ឋអាមេរិក។ លោក ឆែត រ៉ូដឹម៉ៃយ័រ ក៏បានសម្តែងនូវសេចក្តីសោមនស្សរីករាយយ៉ាងខ្លាំង ចំពោះថ្នាក់ដឹកនាំខេត្ត និងស្ថាប័នពាក់ព័ន្ធទាំងអស់ ដែលបានសហការយ៉ាងល្អប្រសើរ ធ្វើឱ្យបេសកកម្មក្រុមការងាររបស់លោកប្រព្រឹត្តទៅដោយផ្លែផ្កាបំផុត។ លោក បន្តថា ក្នុងនាមរដ្ឋាភិបាលសហរដ្ឋអាមេរិក នឹងបន្តធ្វើកិច្ចសហប្រតិបត្ដិការ អាមេរិក កម្ពុជា ឱ្យបានរឹងមាំ និងរលូនថែមទៀត នាពេលអនាគត៕
អត្ថបទ និងរូបភាព: មន្ត្រីព័ត៌មាន នៃមន្ទីរព័ត៌មានខេត្តសៀមរាប!!!
