ក្នុងឱកាសនិមន្តទស្សនាក្នុងតំបន់រមណីយដ្ឋានអង្គរ កាលពីរសៀលថ្ងៃទី១០ ខែកុម្ភៈនេះថា ព្រះមេធានុរក្ស វជិរប្បញ្ញោ បណ្ឌិត គូ សុភាព រាជាគណៈថ្នាក់កិត្តិយស មានសង្ឃដីការថា រមណីយដ្ឋានអង្គរជាទីកន្លែងសក្ការៈបូជាដ៏ស័ក្តសិទ្ធិរបស់ប្រជាពលរដ្ឋខ្មែរ លើសពីនេះក៏ជាបេតិកភណ្ឌពិភពលោក ដែលមិនអាចកាត់ថ្លៃបាន របស់មនុស្សជាតិ។ ព្រះអង្គមានទឹកព្រះទ័យសប្បាយរីករាយ នៅពេលនិមន្តឃើញ ទិដ្ឋភាពដ៏ស្រស់ស្អាតនៃរមណីយដ្ឋានអង្គរ ពិសេសប្រាសាទអង្គរវត្ត បានធ្វើការងារជួសជុល អភិរក្ស រួមទាំងបរិវេណនៅជុំវិញ រក្សាបាននូវទេសភាពបៃតងគ្រប់រដូវកាល។
ព្រះអង្គមានសង្សដីកាទៀតថា កិច្ចការទាំងនេះក្រោមការយកចិត្តទុកដាក់ពីអាជ្ញាធរជាតិអប្សរា ក្នុងការលើកតម្លៃរមណីយដ្ឋានអង្គរឱ្យកាន់តែល្បីល្បាញបន្ថែមទៀត។ បើប្រៀបធៀបកាលពីមុនសម័យរីករាលជំងឺកូវីដ-១៩ កន្លងមក បរិស្ថាន និងសោភណ្ឌភាពប្រាសាទអង្គរវត្ដមានភាពខុសគ្នាឆ្ងាយ ដែលព្រះយល់ថា ការរីករាលដាជំងឺកូវីដ-១៩ មានការអភិវឌ្ឍច្រើន។
ព្រះគ្រូ គូ សុភាព ក៏បានសំណូមពរដល់ភ្ញៀវទេសចរ ដែលមកទស្សនារមណីដ្ឋានអង្គរ ឱ្យចូលរួមថែរក្សា អនាម័យ កុំបោះចោលសំរាមពាសវាលពាសកាល និងកុំគូសវាសនៅតាមថ្មប្រាសាទ ដែលនាំឱ្យមានការខូចខាត បាត់បង់តម្លៃសម្បត្តិបេតិកភណ្ឌ ដែលជាស្នាដៃដូនតាបន្សល់ទុក។ ព្រះអង្គ ក៏បង្ហាញពីក្តីសង្ឃឹមថា ក្រោយពេលវិបត្តិនៃជំងឺកូវីដ-១៩ បានស្រាកស្រាន្ត នឹងមានភ្ញៀវទេសចរជាតិ និងអន្តរជាតិ មកទស្សនារមណីយដ្ឋានអង្គរកាន់តែច្រើន៕
អត្ថបទ និង រូបភាព៖ លោក បូ សាវី
កែសម្រួល៖ អ៊ុន ណារាជ្យ
