មានប្រសាសន៍នៅក្នុងឱកាសបើកកិច្ចប្រជុំលើកទី១៥ របស់រដ្ឋមន្ត្រីបរិស្ថានអាស៊ាន នៅខេត្តសៀមរាប នៅព្រឹកថ្ងៃទី០៨ ខែតុលាឆ្នាំ២០១៩ម្សិលមិញនេះ ឯកឧត្ដម ទៀ សីហា អភិបាលខេត្តសៀម រាប បានសម្ដែងនូវការស្វាគមន៍ និងគាំទ្រចំពោះដំណើរការនៃកិច្ចប្រជុំលើកទី១៥ របស់រដ្ឋមន្ត្រីបរិស្ថានអាស៊ាន និង ចំពោះវត្តមានរបស់ប្រតិភូជាតិ និងអន្តរជាតិនៅលើទឹកដីនៃខេត្តសៀមរាប នាពេលនេះព្រោះថា នេះជាកិច្ចប្រជុំមួយមានសារៈសំខាន់បំផុត ដែលបណ្តាប្រទេសជាសមាជិកអាស៊ានទាំងអស់ ធ្វើកិច្ចសហប្រតិបត្តិការជាបន្ទាន់ ដើម្បីដោះស្រាយលើលំហូរកាកសំណល់ឆ្លងដែនខុសច្បាប់ដែលបានប៉ះពាល់ដល់ប្រទេសជាច្រើននៅអាស៊ាន ជាពិសេសកាកសំណល់ផ្លាស្ទិកខណៈអាជ្ញាធរខេត្តសៀមរាប បាននឹងកំពុងយកចិត្តទុកដាក់ជាខ្លាំង ដោយលើកជាគម្រោងផែនការជាអាទិភាពក្នុងការលើកកម្ពស់ និងកែលម្អបញ្ហាអនាម័យ និងបរិស្ថានក្នុងទូទាំងខេត្តជាពិសេសនៅក្នុងក្រុងសៀមរាប ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និង ជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា បញ្ហាកាកសំណល់ផ្លាស្ទិកនេះ ជាការគំរាមគំហែងលើប្រព័ន្ធអេកូឡូស៊ី , សុខភាព , សុខុមាលភាពរបស់ប្រជាជន ក៏ដូចជាភាពទាក់ទាញទេសចរណ៍របស់ប្រទេសនៅក្នុងតំបន់យើង ដូច្នេះត្រូវរៀបចំឱ្យមានការចែករំលែកព័ត៌មាន,ពង្រឹងកិច្ចសហប្រតិបត្តិការក្នុងចំណោមស្ថាប័នអនុវត្តផ្ទាល់ និងភាពជាដៃគូជាមួយប្រទេស ដែលជាប្រភពដើមនៃកាកសំណល់ ដើម្បីបញ្ឈប់លំហូរខុសច្បាប់នេះចេញពីប្រទេសដើម ជាពិសេស សូមឱ្យក្រុមការងារអាស៊ានទទួលបន្ទុកគីមី និងសំណល់ ផ្តល់អាទិភាពក្នុងការដោះស្រាយបញ្ហានេះ និងផ្តល់នូវវិធានការជាក់លាក់មួយចំនួនក្នុងរយៈពេលខ្លីខាងមុខ ដើម្បីឆ្លើយតបនឹងបញ្ហារួមនេះ ប្រកបដោយស្មារតីសហការ និងសហប្រតិបត្តិការ។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានកម្ពុជា និងជាប្រធានកិច្ចប្រជុំលើកទី១៥ របស់រដ្ឋមន្ត្រីបរិស្ថានអាស៊ាន បានមានប្រសាសន៍ថា ក្រៅពីបញ្ហាខាងលើកិច្ចប្រជុំនេះ នឹងបន្តពិភាក្សាផ្លាស់ប្តូរយោបល់និងពិនិត្យឡើងវិញនូវកិច្ចសហប្រតិបត្តិការក្នុងតំបន់លើបញ្ហាបរិស្ថានមួយចំនួន ជាពិសេសវិធានការទាក់ទង នឹងនិរន្តរភាពបរិស្ថានក្រោមសហគមន៍ផែនការវប្បធម៌អាស៊ាន ដើម្បីឈានទៅសម្រេចបាននូវគោលបំណងនៃការលើកកម្ពស់ការយល់ដឹងអំពីសារៈសំខាន់នៃសេវាកម្មជីវៈចម្រុះនិងប្រព័ន្ធអេកូឡូស៊ីនិងគុណតម្លៃរបស់វា ការលើកកម្ពស់ការចូលរួមជាសាធារណៈ ការវិនិយោគសាធារណៈ និងឯកជន ក្នុងការគ្រប់គ្រងនិងស្តារជីវៈចម្រុះ ដើម្បីធានាថាគោលនយោបាយនិងយុទ្ធសាស្ត្រក្នុងតំបន់ត្រូវបានគាំទ្រដោយសកម្មភាពមូលដ្ឋាននិងដោយយុវជន និងប្រជាជន។
សូមបញ្ជាក់ថា កិច្ចប្រជុំលើកទី១៥រដ្ឋមន្ត្រីបរិស្ថានអាស៊ាននេះ មានឯកសារសំខាន់ចំនួន ៣ នឹងត្រូវយកមកពិនិត្យ និងអនុម័ត រួមមាន ៖ ១. សេចក្តីព្រាងសេចក្តីថ្លែងការណ៍រួមអាស៊ានស្តីពីការប្រែប្រួលអាកាសធាតុនៅកិច្ចប្រជុំកំពូលលើកទី២៥ នៃអនុសញ្ញាក្របខណ្ឌសហប្រជាជាតិ ស្តីពីការប្រែប្រួលអាកាសធាតុ (COP25-UNFCCC) , ២. សេចក្តីព្រាងផែនការយុទ្ធសាស្ត្រអាស៊ានស្តីពីបរិស្ថាន និង ៣. សំណើសុំដាក់បញ្ចូលឧទ្យានជាតិរបស់ប្រទេសថៃ វៀតណាម មីយ៉ាន់ម៉ា សរុបចំនួន ៥ ទៅជាឧទ្យានបេតិកភណ្ឌអាស៊ាន។
នៅក្នុងក្របខណ្ឌនៃកិច្ចប្រជុំនេះដែរ កម្ពុជានឹងទទួលរៀបចំពិធីប្រគល់ពានរង្វាន់សាលាមេត្រីភាពបរិស្ថានអាស៊ានលើកទី៣ និងយុវជនឆ្នើមមេត្រីភាពបរិស្ថានអាស៊ានលើកទី១ សម្រាប់រដ្ឋជាសមាជិកអាស៊ានទាំងអស់ តាមរយៈមូលនិធិសមាហរណកម្មអាស៊ាន-ជប៉ុន ដែលប្រព្រឹត្តទៅក្រោមអធិបតីភាពឯកឧត្តម សាយ សំអាល់ រដ្ឋមន្ត្រីក្រសួងបរិស្ថានកម្ពុជា ជាប្រធានកិច្ចប្រជុំ និងរដ្ឋមន្ត្រីបរិស្ថានអាស៊ាន។
ដោយឡែកនៅថ្ងៃទី០៩ ខែតុលា ឆ្នាំ២០១៩ ដែលជាថ្ងៃទី៣ នៃកិច្ចប្រជុំលើកទី១៥ នឹងមានកិច្ចប្រជុំលើកទី១៥នៃសន្និសីទភាគីកិច្ចព្រមព្រៀងអាស៊ាន ស្ដីពីការបំពុលផ្សែងអ័ព្ទឆ្លងដែន ហើយនៅក្នុងអំឡុងពេលនៃកិច្ចប្រជុំលើកទី១៥ រដ្ឋមន្ត្រីបរិស្ថានអាស៊ាន ក៏មានកិច្ចប្រជុំលើកទី១៦ នៃ រដ្ឋមន្ត្រីបរិស្ថានអាស៊ានបូក ៣ (ចិន ជប៉ុន និងកូរ៉េខាងត្បូង) ដែលផ្ដោតសំខាន់លើកិច្ចសហប្រតិបត្តិការលើវិស័យបរិស្ថានរវាងអាស៊ាន និងប្រទេសដៃគូសន្ទនា ព្រមទាំងមានរៀបចំកិច្ចប្រជុំរដ្ឋមន្ត្រីបរិស្ថានអាស៊ាន-ជប៉ុន ដើម្បីពិនិត្យលើ វឌ្ឍនភាពការ ងារ សហប្រតិបត្តិការបច្ចុប្បន្ន និងគំនិតផ្តួច ផ្តើមសំណើថ្មីៗ រួមមានដូច ជា ប្រព័ន្ធផ្ទៀងផ្ទាត់បច្ចេក ទេសបរិស្ថាន ការផ្ទេរបច្ចេកវិទ្យា និងសំណល់ប្លាស្ទិកសមុទ្រ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
