កាលពីរសៀលថ្ងៃទី១០ ខែតុលា ឆ្នាំ២០១៩ម្សិលមិញនេះ លោក នាក់ ណេរ៉ុន អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានអញ្ជើញជាអធិបតីក្នុងពិធីប្រកាសតែងតាំងលោក នួន ពុទ្ធារិទ្ធ ឋានន្តរស័ក្តិអនុមន្ត្រីថ្នាក់លេខ២ ជាមន្ត្រីសាលាខេត្តសៀមរាប ឱ្យកាន់មុខតំណែងអភិបាលរងស្រុកប្រាសាទបាគង តាមប្រកាសលេខ៨៨៦១ ប្រក របស់ក្រសួងមហាផ្ទៃ ។
លោក នួន ពុទ្ធារិទ្ធ អភិបាលរងស្រុកប្រាសាទបាគង ដែលទើបនឹងតែងតាំងថ្មី បានសម្ដែងនូវការដឹងយ៉ាងជ្រាលជ្រៅចំពោះប្រមុខរាជរដ្ឋាភិបាលកម្ពុជា ថ្នាក់ដឹកនាំក្រសួងមហាផ្ទៃ ប្រធានក្រុមប្រឹក្សាខេត្ត និង អភិបាលខេត្តសៀមរាប ដែលបានផ្ដល់ការទុកចិត្តមក លើរូបលោក ឲ្យធ្វើជាអភិបាលរងស្រុកប្រាសាទបាគង ហើយបានប្ដេជ្ញាចិត្តអនុវត្តន៍ឲ្យបានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តជាធរមាន , គាំទ្រនិងអនុវត្តន៍នូវកម្មវិធីនយោបាយ និង យុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា , គោលការណ៍ដឹកនាំចង្អុលបង្ហាញរបស់ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលខេត្ត គណៈអភិបាលស្រុកប្រាសាទបាគង និង ប្ដេជ្ញាខិតខំចូលរួមទប់ស្កាត់ លុបបំបាត់រាល់បាតុភាពអសកម្មទាំងឡាយ ដែលធ្វើឲ្យប៉ះពាល់ដល់ប្រជាពលរដ្ឋ ព្រមទាំងយកចិត្តទុកដាក់រៀបចំ កសាង និង អភិវឌ្ឍន៍លើគ្រប់វិស័យនៅក្នុងស្រុកប្រាសាទបាគង ជាពិសេសសហការ សាមគ្គីភាពផ្ទៃក្នុងឲ្យបានល្អប្រសើរបំផុត ។
មានប្រសាសន៍ក្នុងឱកាសនោះ លោក នាក់ ណេរ៉ុន អភិបាលរងខេត្ត បានថ្លែងនូវការកោតសរសើរដល់អាជ្ញាធរស្រុកប្រាសាទបាគង នូវសមទ្ធិផលដែលស្រុកទទួលបានមកនេះថា ៖ កត្តារីកចម្រើនរបស់ស្រុក កើតឡើងបានអាស្រ័យប្រទេសជាតិមានសន្តិភាព និងក្រោមការដឹកនាំដ៍ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បាននាំមកនូវសុខសន្តិភាព និងការអភិវឌ្ឍរីកចម្រើនលើគ្រប់វិស័យ ប៉ុន្តែសូមឲ្យអភិបាលរងស្រុកថ្មី នៃស្រុកប្រាសាទបាគង ដែលទើបចូលកាន់តំណែងនេះ ធ្វើយ៉ាងណាត្រូវខិតខំប្រឹងប្រែងធ្វើការអភិវឌ្ឍន៍ស្រុក ឲ្យមានការរីកចម្រើនបន្ថែមទៀត គឺយកចិត្តទុកដាក់ដល់សុខទុក្ខប្រជាពលរដ្ឋជាចំបង និង យកចិត្តទុកដាក់លើការងារសន្តិសុខ រួមទាំងការទប់ស្កាត់រាល់បទល្មើសផ្សេងៗដែលកើតឡើង នៅក្នុងដែនសមត្ថកិច្ចរបស់ខ្លួន ។
មានប្រសាសន៍បន្ថែមថា លើសពីនេះ ត្រូវពង្រីង និងពង្រីកនូវសក្តានុពលទេសចរណ៍ដែលមានស្រាប់នៅក្នុងសហគមន៍ ដោយសហការជាមួយមន្ទីរជំនាញ ស្ថាប័នពាក់ព័ន្ធ ដើម្បីជាផលប្រយោជន៍ជូនដល់ប្រជាពលរដ្ឋក្នុងមូលដ្ឋានស្រុកប្រាសាទបាគងទាំងមូល និង ត្រូវចេះសាមគ្គីភាពផ្ទៃជាមួយគណៈអភិបាលស្រុក ក្រុមប្រឹក្សា មន្ត្រីរាជការ កងកម្លាំងប្រដាប់អាវុធទាំង៣អង្គភាព និង អាជ្ញាធរគ្រប់លំដាប់ថ្នាក់ លើការដឹកនាំ ការគ្រប់គ្រង និង ការពង្រឹងនូវរបៀបរបបការងាររដ្ឋបាលនៅក្នុងសាលាស្រុក ពិសេសលើការផ្តល់សេវាសាធារណៈជូនប្រជាពលរដ្ឋក្នុងមូលដ្ឋាន ដោយតម្លាភាព គណនេយ្យភាព លឿនរហ័ស និងមានប្រសិទ្ឋភាព ៕
អត្ថបទ : លោក លីវ សាន្ត
រូបថត : លោក ខេង ឧត្តម
