សមាគម វី ឆារីថេបល ហ្វោនដេសិន បាននាំយកថវិកាសប្បុរសជនចិនចំនួន៦ម៉ឺនដុល្លារអាមេរិក តាមរយៈសាខាកាកបាទក្រហមកម្ពុជាខេត្តសៀមរាប សម្រាប់សាងសង់អគារសិក្សាមួយខ្នង មាន៥បន្ទប់ នៃសាលាបឋមសិក្សាស្រីវិបុលកេរ្តិ៍ ស្ថិតក្នុងភូមិត្រាចឃុំបល្ល័ង្ក ស្រុកប្រាសាទបាគង ហើយត្រូវបានរៀបចំប្រារព្ធពិធីក្រុងពាលីបញ្ចុះបឋមសិលាដាក់ដំណើរការសាងសង់ នៅព្រឹកថ្ងៃទី១៧ ខែតុលា ឆ្នាំ២០១៨នេះ ក្រោមអធិបតីភាពឯកឧត្តម ឃឹមប៊ុនសុង អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងលោកជំទាវ ។
លោក នឹម សុវណ្ណ អភិបាលស្រុកប្រាសាទបាគងស្តីទី បានឱ្យដឹងថា ក្នុងទូទាំងស្រុក មានវិទ្យាល័យចំនួន៥កន្លែង , អនុវិទ្យាល័យចំនួន៧កន្លែង , សាលាបឋមសិក្សាមានចំនួន៤៥កន្លែង និង សាលាមត្តេយ្យគ្រប់ប្រភេទចំនួន៥២កន្លែង ប៉ុន្តែចំពោះសាលាបឋមសិក្សាស្រីវិបុលកេរ្តិ៍នេះ បច្ចុប្បន្នមានអគារសិក្សាតែមួយខ្នងទេ ចែកចេញជាបីបន្ទប់ បែងចែកជា៨ថ្នាក់ មានសិស្សចំនួន២៩៣នាក់ ស្រី១៤៩នាក់ មានគ្រូចំនួន៩នាក់ ស្រី៧នាក់ ហើយស្ថានភាពបន្ទប់រៀនមិនអាចធានាបាននូវចំនួនថ្នាក់នោះទេ ដែលគណៈគ្រប់គ្រងសាលា ក៏បានរៀបចំជារោងដោលស័ង្កសីមួយខ្នង មានពីរបន្ទប់ និង រៀបចំឱ្យការសិក្សាចែកចេញជាពីរវេនគឺព្រឹកនិងល្ងាច ។
ឯកឧត្តម ឃឹមប៊ុនសុង មានប្រសាសន៍ថា សមាគម វី ឆារីថេបល ហ្វោនដេសិន ជាដៃគូសហការល្អជាមួយកម្មវិធីសប្បុរសធម៌របស់ខេត្តសៀមរាប ខណៈកន្លងមកសមាគមបានជួយសាងសង់អគារសិក្សា និងផ្តល់សម្ភារមនុស្សធម៌ជាច្រើនជូនដល់សាខាកាកបាទក្រហមកម្ពុជាខេត្តសៀមរាប សម្រាប់ជួយដល់បងប្អូនជនរងគ្រោះដោយគ្រោះធម្មជាតិនានា ដូចជាសង់ផ្ទះសម្បែង អណ្តូងទឹក សាលារៀននៅក្នុងស្រុកមួយចំនួននៃខេត្តយើងនេះ ដែលជាក់ស្ដែង អគារសិក្សាជាជំនួយពីសមាគម វី ឆាយរីថេបល ហ្វោនដេសិន ដែលបានទទួលថ្មីនេះ នឹងជួយសម្រួលដល់ការសិក្សារៀនសូត្ររបស់កូនចៅប្រជាពលរដ្ឋក្នុងភូមិត្រាចនេះ ឱ្យមានស្ថានភាពល្អដូចភូមិដទៃទៀត នៃឃុំបល្ល័ង្ក ។
ឯកឧត្តមអភិបាលខេត្ត បានបញ្ជាក់ទៀតថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសព្វ របស់សម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា បានលើកកម្ពស់ និងចាត់ទុកវិស័យអប់រំ ជាវិស័យអាទិភាពមួយក្នុងចំណោមវិស័យអាទិភាពចម្បងៗមួយចំនួនរបស់រាជរដ្ឋាភិបាល ដោយបានធ្វើកំណែទម្រង់ស៊ីជំរៅលើវិស័យនេះ ព្រមទាំងបានខិតខំពង្រីក និងបង្ខិតសាលារៀនឱ្យមកនៅកៀកក្បែរលំនៅដ្ឋានរបស់បងប្អូនប្រជាពលរដ្ឋគ្រប់ទីកន្លែង នៅទូទាំងប្រទេស ដើម្បីបណ្តុះធនធានមនុស្សឱ្យមានចំណេះដឹង ពោរពេញដោយសមត្ថភាព សម្រាប់ជួយសង្គមគ្រួសារនិងសង្គមជាតិយើងឱ្យកាន់តែរីកចម្រើនឡើងថែមទៀត ៕
អត្ថបទ ៖ លោក យូ វង្ស
រូបថត ៖ សហការី
កែសម្រួលអត្ថបទ ៖ លីវ សាន្ត
#មន្ទីរព័ត៌មានខេត្តសៀមរាប
#សាលារៀន